Read Tobelo O MAZMUR 59 Bible Online

O MAZMUR 59 - Tobelo bible

O MAZMUR 59

¹ Mangale yonyä nyanyi manga tutuda. Imoteke malugo. Uha nia binaha. O Mazmur o Daudino, maöraha o Saul wähuloko o nyawa yogoana ai tau mangale ünanga iwi toma.

²Ya ahi Jou Madutu, nohi hihalamati ngohi hagala ahi haturuino, nohï datoko ngohi o nyawa ihi poparangino.

³Nohihilapahi ngohi de o nyawa yododiaino o dorou, nohi hirehene ngohi de o nyawa yotoma-tomaino.

⁴Namake önanga ihï damaoka yomau ngohi ihi toma, o nyawa yongamo-ngamo ima kodogo ihi lawani ngohi; ena hioko koigoungua karana ngohi todiaioka o baradoha ekola todiai o dodilakuru, ya Jou.

⁵Koigounguaoli karana ahi howono, önanga imatai-taiti deʼ imahidiai imä goana.

⁶Nomomiki, Jou Madutu Noko Kurutil̄e, ngohi nohï riwo. Ya o Israeloka manga Jou Madutu, nahakihi mahirete. Nomomiki deʼ nähukumu hagala o hoana deo berera manyawa, uha nädora o nyawa madorou yososatiaua.

⁷Maöraha imulaenge yöhutu önanga yomulaengoli, yoguguru hokä o kaho inoli yakiloliti o kota.

⁸Onanga kai taurika yokalekono deʼ yohohedu; toönanga manga demo-demo madoto hokä o dia, önanga yatobote moiua yoihene.

⁹Mä Ngona nägogiete önanga, ya Jou, mata-mata o hoana deo berera manyawa gënanga Ngona nahohedu.

¹⁰Ngona ahi kuata, ngohi toma hinganono Ngonaika, Ngona ahi dooara mangï ya Jou Madutu.

¹¹Karana Ai oa ahi Jou Madutu iboa ngohino, Unanga wohi mal̄aika ngohi tamake ahi haturu yahohihanga.

¹²Uha önanga nätoma, ya Jou, hupaya ahi hoana de ahi berera manyawa uha yawohanga, Nahi kokitingakoka deʼ önanga nahohihanga de Ani kuaha, ya Jou tongomi mia dadatoko.

¹³Hababu önanga yobaradoha de toönanga manga demo-demo; mal̄aikala önanga yäliko manga edenge magoronaka, karana önanga yöigo yololai deʼ yoeluku.

¹⁴Onanga näbinaha Ani dohata magoronaka, ya Jou Madutu, önanga näbinaha hiädono yohotumu. Done moi-moi o nyawa ihi öriki ma Jou Madutu wapareta o Israel, deʼ Ai popareta iamokika yamode-modekika o dunia.

¹⁵Maöraha imulaenge yöhutu önanga yomulaengoli, yoguguru hokä o kaho inoli yakiloliti o kota.

¹⁶Onanga yotagi-tagi yakaika yakaino yolingiri o inomo, deʼ yolau nako yäpunuhua.

¹⁷Mä ngohi tonyanyi mangale Ani kuata; o ngorumino magetongo ngohi tonyanyi takua-kuatil̄e mangale o dora deʼ Ani satia. Hababu Ngona tomahiditoko mangï, o ngï ngohi tomahitatoko o huha maorahoka.

¹⁸Ya Jou Madutu, ahi kuata, tohi nyanyi o higiriri Ngonaika, hababu Ngona o ngï ngohi tomahi tatoko, ya Jou Madutu nohï dora-dora.