Read Tobelo O MAZMUR 60 Bible Online

O MAZMUR 60 - Tobelo bible

O MAZMUR 60

¹Mangale yonyä nyanyi manga tutuda. Imoteke malugo: O bunga bakung ihohakihi. O Mazmur o dodotoko o Daudino,

² maöraha ünanga waparangi o Aram. O Mesopotamia manyawa deʼ o Aram. O Zoba manyawa, deʼ maöraha o Yoab wolio wahohihanga o Edom manyawa yangimoi de yahinoto o Asin ma Waioka.

³Ngona nomï umoka ngomi, ya Jou Madutu, deʼ nomï mal̄aika ngomi imï hohihanga. Ngona nomï ngamo ngomino; o öraha nënanga nadiai ngomi hoihira-hirali.

⁴Ngona nagiwi o dunia hiädono itororata; nohidiai ibö bela-belaka, hababu o dunia igiwi.

⁵Ngona nämal̄aika Ani umati yamao o huha deo hangihara madodubuho; ngomi milebo-leboto hokä o nyawa yädaluku.

⁶Ngona nohidöaka o hohininga hagala o nyawa manga wowango itebi-tebini, hupaya önanga yahirehene deo hukumanga.

⁷ Ngomi nomi hihalamati deʼ Ani kuaha, nöbaluhu tongomi mia niniata, hupaya hagala o nyawa Nä dora-dora yohalamati.

⁸Ai ngï itebi-tebinino ma Jou Madutu wotemo, ”Ngohi tomau toulili deʼ tohikodoku o Sikem matonaka; o Sukot ma Wai aha Ta undi.

⁹O Gilead deʼ o Manasye ganga Tongohi, O Efraim Ahi sapeo o waja, deʼ o Yehuda Ahi popareta madiki-diki.

¹⁰Mä o Moab ganga Ahi l̄ou magigihoro mangï; Ngohi tahiulili ahi gutumu mangale o Filistea. O Edomika Tahi kaweli Ahi hapato hokä manonako ünanga Tongohi madutu.”

¹¹O naguna aha wohi ao ngohi o Edomika? O naguna wohi tuda ngohi o kota dema dodatokika gënanga?

¹²Ya Jou Madutu, Ngona kononikua dede ngomi? Ngona notagiua mahimangika de tongomi mia tentara?

¹³Nomï riwo ngomi o haturu mahimangoka, hababu o nyawa manga roriwo koiwa mafaida.

¹⁴Kamamoi de ma Jou Madutu, ngone aha honauru de hoputurungu, Unanga ganga wähohihanga tongone nanga haturu.