Read Tobelo O MAZMUR 63 Bible Online

O MAZMUR 63 - Tobelo bible

O MAZMUR 63

¹ O Daud ai Mazmur, maöraha ünanga naga o Yehuda matonaka ikokakahaka.

²Ya Jou Madutu, Ngona ganga ahi Jou Madutu, toni lingiri de tonï hohininga Ngona. Hokä o tonaka madoongoro yokiriti madudungu o akere, hoko gënanga ngohi toni kiriti madudungu mangale Ngona.

³Mal̄aikala ngohi toni pulono Ngona Ani Tauoka, deʼ tamake Ani kuata deʼ Ani mulia.

⁴Ani dora maija iholoi deo ngango, hababu gënanga ngohi toni higiriri Ngona.

⁵Ahi umuru magurutu ngohi tosyukur Ngonaika; tagoraka ahi giama Ngonaika de ikali tomä niata.

⁶Toni higiriri Ngona de toulili tomorene, hababu Ngona ahi jiwa nasanangi hokä de o inomo ihemo-hemoro.

⁷Maöraha toma rubaiha o ngidu-ngiduoka, toma hininga Ngonaika; o hutu yahaiwatiki ngohi toni tiba-tibanga Ngona,

⁸hababu Ngona nohï riwoka ngohi; Ani gahuhu mahohohongo magoronaka ngohi tonyanyi tomorene.

⁹Toni sö Ngona takëkekete, Ani giama ihi tiki ngohi.

¹⁰Mä hagala o nyawa yömau-mau ihi toma ngohi aha youti o nyawa yohone-honenge manga duniauku.

¹¹Onanga aha yohonenge o parangi magoronaka, deʼ yodadi o aiwani madorou mainomo.

¹²Ma koano aha womorene karana ma Jou Madutu Ai roriwo; o nyawa yokö kobo-koboto de ma Jou Madutu aha imahi amo-amoko, mä o uru ielu-eluku aha yajumu.