Read Tobelo O MAZMUR 66 Bible Online

O MAZMUR 66 - Tobelo bible

O MAZMUR 66

¹Mangale yonyä nyanyi manga tutuda. Moi o nyanyi. Nima uli-ulili mangale ma Jou Madutu, hei o dunia ingodumu!

²Ninyanyi deʼ nia gorakil̄e Ai romanga, Unanga niwi himulia deo higiriri.

³Nia hetongo ma Jou Madutuika, ”Igoungu höheranga Ai manarama! Ani haturu ima ruku Ngonaika de manga modongo, hababu duru imako Ani kuaha.

⁴O dunia ingodumu yatilabukuku ini huba Ngona, önanga yonyanyi ihigiriri Ani romanga.”

⁵Niboa deʼ nia pulono ma Jou Madutu Ai manarama, igoungu hö heranga Ai gao-gao o nyawa manga hidogoronaka!

⁶ O ngöto Wangali idadi o tonaka madudungu, tongomi mia ete de mia tohora yatoaka mahonongaika de ima dagi yal̄ou-lou. Done ngomi mimorene karana Ai manarama.

⁷Unanga wopareta iputurungu mangale kahi ädo-ädonika. O hoana deo berera Wagoana Watailako, hupaya yolawa-lawani yakunua ima edenge Unangika.

⁸Niwi higiriri tongomi mia Jou Madutu, hei hagala o hoana deo berera, nihi böaka nia higiriri Unangika!

⁹Unanga womï goanoka ngomi hupaya kahirahi miwango, deʼ womï mal̄aikaua ngomi mïotaka.

¹⁰Ya Jou Madutu, Ngona nomi ujioka ngomi hokä o nyawa yatebini o haaka o uku magoronaka.

¹¹Ngona nomï mal̄aika ngomi imï otaka o modoi magoronauku, deʼ Ngona nomi hidöaka o gina duru madodubuho.

¹²Ngona nomï mal̄aika ngomi mia haturu imï doko-doko; ngomi miö ngohama o nguihi deʼ o uku. Mä o öraha nënanga Ngona nomi aoka ngomi o ngï mahasili ilamo-amokika.

¹³Ngohi aha toao o huba yatö tuhu-tuhuku Ani Tauika deʼ tatotomo ahi jaji Ngonaika,

¹⁴o jaji tahö heto-hetongo maöraha ngohi o huha magoronaka.

¹⁵Tohi huba Ngonaika o huhuba yatö tuhu-tuhuku o aiwani yairi-irikino, o kabingi de o duba de o hapi manauru, manofo ikuhuhulu o dihangil̄e.

¹⁶Niböa deʼ ni ihene, hei mata-mata o nyawa nia wowango itebi-tebini, aha tohi jaritaoka okia ma Jou Madutu wadodiai ngohino.

¹⁷Ngohi toma hiboakoka togahoko o roriwo Unangika; o öraha nënanga tohi nyanyi o higiriri Unangika.

¹⁸Nako ngohi tosanangi tapikiri o dorou, marai ma Jou woluku woihene.

¹⁹Mä ma Jou Madutu wohï gihenoka ngohi, Unanga watötailako ahi gogahoko.

²⁰Ngohi tihigiriri ma Jou Madutu hababu Unanga watilaua ahi niniata, deʼ Woma togumua Wohï dora ngohi.