Read Tobelo O MAZMUR 68 Bible Online

O MAZMUR 68 - Tobelo bible

O MAZMUR 68

¹Mangale yonyä nyanyi manga tutuda. O Daud ai Mazmur.

²Ma Jou Madutu womomiki wahi kabarihi Ai haturu, o nyawa iwï doha-dohata Unanga yopiringana Ai himangoka.

³Ma Jou Madutu wäduhu önanga yoiki, hokä o nofo yawuwu deʼ imahihanga. Hokä o lilin iuihi o uku magoronaka, hoko gënanga o nyawa madorou yohihanga ma Jou Madutu Ai himangoka.

⁴Mä o nyawa manga wowango itebi-tebini ima garago deʼ kayo more-morenika, önanga youli-ulili yomorene ma Jou Madutu Ai himangoka.

⁵Ninyanyi mangale ma Jou Madutu, nihigiriri Ai romanga, nihidiai o ngekomo ma amoko mangale Unanga wöbare-barene o lobi. Ai romanga o Jou — nimahi sosanangi Ai himangoka!

⁶Ma Jou Madutu wogogere Ai Tau itebi-tebinoka ganga o ngohaka o gohihi manga ama deʼ o ngoheka bobao manga roriwo.

⁷Ma Jou Madutu wahidöaka manga gogere mangï o nyawa manga dodiawo koiwa-iwaika; Unanga wahi bebasi o bui manyawa hiädono önanga yosanangi. Mä hagala o nyawa iwi lawa-lawani ma Jou kokiani yogogere o tonaka madoongoroka.

⁸Ya Jou Madutu, maöraha Ngona nätuda Ani umati yotagi yatilakuru o tonaka madü dudungu,

⁹ o dunia ihahara, o awana ikopoa Ani himangoka, karana o Sinai ma Jou Madutu woboa, o Israeloka manga Jou Madutu.

¹⁰Dema boboloi Ngona nohiguti o awana, deʼ Ani tonaka makokakaha nohigilio hoʼ ihira-hirali.

¹¹Done Ani umati dokengoka yogogere; Ani oa magoronaka, ya Jou Madutu, Ngona näpaliara o mihikini manyawa.

¹²Ma Jou wohidöaka o putuhu, daha o ngongoheka yoao o abari:

¹³”O kokoano deʼ manga duduono yopiringanoka!” Onanga yopiringana hokä o namodara ioiki ihoho. O ngongoheka o tauoka ihi kokodoku, o haaka deʼ o gurasi yamal̄a-mal̄aika. Ngaroko manga ngöe yonïkua yoparangi, ma Jou Madutu Ai umati yamakeoka o utumu.

¹⁵Maöraha Duru Woko Kuaha wahigerewoto o kokoano dokengoka, iuti o domoata o Salmon mal̄okuino.

¹⁶O Basyan mal̄oku ganga ol̄oku homodo-modongo, ol̄oku matubu iwöe.

¹⁷Yadodoaho anil̄oku matubu iwöe-wöe gënanga ngona napulono de ani dohata o Sion mal̄okuika ma Jou wairi-irikoka mangale Ai gogere? Ma Jou aha wogogere dokengoka kahiädo-ädonika.

¹⁸O kereta ikua-kuata dema säsana ma Jou Madutu woboa toönanga manga hidogoronaka Ai mulia magoronaka.

¹⁹ Ma Jou wodoa o ngï ikö kurutil̄e; manga ngöe o dagokino Wä hidotao. Unanga watarima o huhuba o nyawaino mangahidogorono idogoika o nyawa yolawa-lawanino; hupaya önanga yogogere kamamoi dema Jou Madutu.

²⁰Niwi higiriri ma Jou, hababu Unanga ganga ma Jou Madutu wonahi hohalamati ngone; o wange itagali o wange Unanga wamoku nanga gina.

²¹Tongone nanga Jou Madutu ganga ma Jou wohihohalamati, Unanga wonahibebasi ngone o honengino.

²²Ma Jou Madutu marai aha wawede-wederuku Ai haturu manga häeke, o nyawa kahokogenangika yowango o baradoha magoronaka.

²³Ma Jou wato, ”Hei Ahi umati, Tä ao nia haturu o Basyan deyaino Tä ao önanga o ngöto mabukuoka de tahikainoli,

²⁴hupaya ngini nia ihoro nia l̄ou de toönanga manga awunu, deʼ hagala nia kaho yaaleme imahi gogihounika.”

²⁵Mata-mata yamake Ani utumu ihiduono, ya Jou Madutu, ahi Jou Madutu, ahi Koano, inihiduono Ani gogere mangï ika.

²⁶Imä dagi mahimangoka yonyä nyanyi, maporetoka o kecapi ihi gogogule; yokokorona o momoholehe o damunu yotako-takoro; hoko nënanga toönanga manga nyanyi:

²⁷”Niwi higiriri ma Jou Madutu Ai umati madoomu mahidogoronaka, niwi higiriri ma Jou, hei mata-mata o Yakub aidifauku!”

²⁸O Benyamin, o hoana duru maiteteke, imä dagi mahimangoka, daha o Yehuda manga balu-baluhu yotuo-tuono manga poretoka o Zebulon deʼ o Naftali manga balu-baluhu.

²⁹Ani Jou Madutu wogahoko ani kuata; ya Jou Madutu, nohi kekete okianaga Nadodiaioka mangale ngomi.

³⁰O Kokoano yao manga huhuba, Ngonaika Ani Tauoka o Yerusalemoka

³¹Nodorohu o Mesir, o aiwani madorou gënanga o totuhuro mahidogoronaka. Nätaaere hagala o hoana deo berera, o banteng matika gënanga dema ngoha-ngohaka, ima kokodoko gënanga mangale yamake o haaka. Ma Jou Madutu wahi kabarihi hagala o hoana deo berera yoigo-igo yoparangi.

³²O Mesir manga pangkat ikökurutil̄e yoboa yoao o tabaga; o Sudan manyawa ima tai-taiti yoao o soungu ma Jou Madutuika.

³³Ninyanyi mangale ma Jou Madutu, hei mata-mata o popareta nihi nyanyi o higiriri mangale ma Jou.

³⁴mangale Unanga watotilakuru o gitawa mahiraino. Ni ihene! Ma Jou wotemo-temo, Ai ilingi maruruhu kahö modongo.

³⁵Nihigoungu ma Jou Madutu Ai kuaha o Israeloka wäkokuaha, Ai kuaha hiädono o dihangil̄e.

³⁶Igoungu hiheranga tongone nanga Jou Madutu maöraha Unanga wohupu Ai gogere mangï ino. O Israeloka manga Jou Madutu wahi döaka o kuaha deʼ o kuata Ai umatika. Higiriri ma Jou Madutu!