Read Tobelo O MAZMUR 71 Bible Online

O MAZMUR 71 - Tobelo bible

O MAZMUR 71

¹Ngonaika ngohi toma hohongo, ya Jou, uha nohi mal̄aika ngohi ihihimal̄eke.

²Ngohi nohihibebasi, hababu Ngona noadili, noihene deʼ nohihihalamati ngohi.

³Ngohino idadi hokä ol̄oku o helewo o ngï ngohi togogere salalu igapanga tomahiädono. Hababu Ngona naputuhoka mangale nohihihalamati ngohi, Ngona ganga mangï ngohi toma hidutuluku deʼ toma hohongo.

⁴Ya ahi Jou Madutu, nohihirehene ngohi deo nyawa madorou, o nyawa yorusi-rusi deʼ yohohatera manga kuahaino.

⁵Hababu Ngona ganga ahi ngonganono, ya Jou, Jou, ngohi tongaku Ngonaika katoma goduruikahi.

⁶Ahi wowango madekana ngohi tomahidiki Ngonaika; Ngona nohï goana ngohi kademadero tomakil̄au done ngohi salalu toni higiriri Ngona.

⁷Ahi wowango idadi o dulada o nyawa yowe-weika, hababu Ngona ganga ahi gogoana nokua-kuata.

⁸Ngohi salalu toni higiriri Ngona, o wange magurutu tohingangahu Ani mulia.

⁹Uha Nohi umo ngohi maöraha ihi perekioka uha nohi mal̄aika ngohi nako ahi kuata koiwaka,

¹⁰hababu hagala ahi haturu ihihi ade-ade ngohi, hagala o nyawa yömau-mau ihi toma ngohi imahikagaro.

¹¹Onanga yato, ”Ma Jou Madutu widogumal̄aikaka ünanga; niaino ngone hïginïki deʼ ngone hïtagoko ünanga, hababu moiua naga iwi hihalamati ünanga.”

¹²Uha Nokurutika dede ngohi, ya Jou Madutu, ahi Jou Madutu itaiti nohi riwo ngohi.

¹³Mal̄aikala o nyawa ihi poparangi ngohi yämal̄eke deʼ yahohihanga. Mal̄aikala o nyawa yömau-mau ihi bodito ngohi yobingu deʼ yahitamunuku o hikauku.

¹⁴Mä ngohi aha salalu toma hinganono Ngonaika, deʼ kaidogo yowöe ini higiriri Ngona.

¹⁵O wange magurutu aha tohi jarita hagala Ani manarama iadi-adili, deʼ o halamati Ngonaino haetongo hakunua.

¹⁶Tohigiriri Ani manarama ipoputurungu, ya Jou, Jou Madutu, tohingangahu okiaika honanga Ani adili, Ani adili dika.

¹⁷Ya Jou Madutu, Ngona nohï dotoko katoma goduruikahi, hiädono o öraha nënanga tohi jarita Ani gao-gao ihö hera-heranga.

¹⁸Ya Jou Madutu, uha nohi dogumal̄aika ngohi, hiädono ngohi ihi pereki deʼ ihi dudutu, hupaya ngohi tohingangahu Ani kuaha deʼ Ani buturungu mata-mata o ngohaka deo danongika aha yobö boa-boa.

¹⁹Ya Jou Madutu, Ani adili hö o dihanga magurutil̄e; iamoko hagala Ani manarama; o nagona yakunu imahitero Ngona?

²⁰Ngona nohihidöaka ngohi mangöe o huha deo hangihara madodubuho, mä Ngona aha nohigilioli ahi kuata homahiraoli deʼ o lungunoka ngohi nohihimomiki.

²¹Ngona aha nadiai ngohi iholoi ihihoromati, deʼ nohi laruoli ngohi.

²²Ngohi tomau toni higiriri Ngona de o gambus, hababu Ngona nosatia, ya ahi Jou Madutu. Ngohi tomau tohi nyanyi o higiriri Ngonaika de o kecapi, ya o Israel manga Jou Madutu notebi-tebini.

²³Ngohi toulili deʼ iomanga o garago, ikali tohi nyanyi o higiriri Ngonaika. Ahi jiwa de ahi röehe inyanyi dema morene, hababu Ngona nohi hihalamatoka ngohi.

²⁴O wange magurutu aha tohingangahu Ani adili, hababu hagala o nyawa yömau-mau ihihibodito ngohi yohihangoka deʼ yahi mal̄ekoka.