Read Tobelo O MAZMUR 73 Bible Online

O MAZMUR 73 - Tobelo bible

O MAZMUR 73

¹O Asaf ai Mazmur. Igoungu ma Jou Madutu yaoa mangale Ai umati, mangale o nyawa manga hininga itebi-tebini.

²Mä ngohi tobinguoka, ahi ngongaku ngade-ngadeke ihihanga,

³hababu ngohi tädohata o nyawa ima ede-edengika, maöraha ngohi tämake o nyawa madorou manga utumu.

⁴Hababu önanga yamaoua o panyake, toönanga manga röehe ikuata deʼ madodumuloa.

⁵Onanga yatagongua o huha, yätapal̄ua o bodito hokä o nyawa mahomoa.

⁶Karana gënanga önanga ima edenge, deʼ salalu yodiai dema pakisa.

⁷Toönanga manga hiningaino ikopoa o dorou; önanga yotasibu deo datoro-o datoro madorou.

⁸Onanga yohohedu deʼ yotetemo, deʼ demanga edenge yodobuturungu yomau yatuku.

⁹Onanga iwi fitana ma Jou Madutu o horogaka, deʼ yoade-ade yoelu-eluku o dunia manyawaika,

¹⁰hiädono ma Jou Madutu Ai umati ma imakilioro onangika, deʼ yongaku toönanga manga demo-demoika.

¹¹Onanga yato, ”Ma Jou Madutu wohiorikua, Duru Wokö Kurutil̄e womangaratiua.”

¹²Hoko gënanga o nyawa madorou naga manga hali; manga wowango isanangi, manga arata igila-gila idogo.

¹³Parasuma dika ngohi tögoana ahi hininga itebini; koiwa mafaida ngohi toma hirehene o baradoha.

¹⁴Hababu o wange magurutu ngohi ihi tapal̄u o bodito; o ngorumino magetongo ngohi ihi hangihara.

¹⁵Nako ngohi totemo hoko gënanga, ngohi täfitana ani ngoha-ngohaka manga difauku.

¹⁶Mä maöraha tohidailako mangale tomangarati, o hali gënanga duru kohä huha ngohino.

¹⁷Mabaha ngohi towohama ma Jou Madutu Ai Tauika, deʼ ngohi tomangarati o nyawa madorou manga ngango mabaha.

¹⁸Onanga Näkelenga o ngekomo mabobaakoroka, deʼ nä mal̄aika önanga yoruba yobinaha.

¹⁹O lako dadawi magoronaka önanga yowedere, duru hömodongo toönanga manga ngango mabaha.

²⁰Hokä o nanere ima hihanga o ngoru-ngorumino; maöraha Ngona nomomiki, ya Jou önangaö makoyaiwa.

²¹Maöraha ngohi tamao tomanyasali deʼ ahi hininga hokä yatohoko.

²²Ngohi tobodo deʼ tomangaratiua, ngohi hokä o aiwani Ani himangoka.

²³Mä ngohi kahirahi Ani datekoka, Ngona nasö ahi giama maniraka.

²⁴Ngona nohi tuda ngohi de o nasihati, deʼ Ngona nohi tarima dema horomati.

²⁵O naguna toma hitongohi o horogaka sawaliua Ngona? Mahomoa de Ngona koiwa tonahihu o duniaka.

²⁶Ngaroko ahi röehe ahi jiwa idadi yabole, Ngona ganga ahi kuata, ya Jou Madutu; Ngona ganga hagala toma hitongohi mangale kahiado-adonika.

²⁷O nyawa inimö mal̄a-mal̄a Ngona aha yobodito, Nabinaha önanga yososatiaua Ngonaika.

²⁸Mä ngohino igoungu yaoa naga ma Jou Madutu Ai datekoka, Jou ma Jou Madutu tadiai ahi gogoana mangï, hupaya ngohi yakunu tohingangahu hagala Ai manarama.