Read Tobelo O MAZMUR 74 Bible Online

O MAZMUR 74 - Tobelo bible

O MAZMUR 74

¹O Asaf ai dodotoko manyanyi. Ya Jou Madutu, kahiado-adonika Nomï mal̄aika ngomi? Yadodoaho Ngona gila-gila nängamo Ani umatika mahirete?

²Nähininga Ani umati nomä ngiri-ngiriki kama hirainohi, o hoana deo berera nahi bebasoka mangale idadi noma hito Ngona. Nomä hininga o Sion ma Doporono, Nadodiaioka Ani gogere mangï.

³Nödagi natailako o ngï imadadioka magilianga; hagala moi-moi Ani Tauoka Ani haturu yawede-wederoka.

⁴Ani haturu-haturu ima pöa-pöaka Ani Tauoka, deʼ ihi goko genangokadau o utumu mapaji-paji.

⁵Onanga hokä o gota yotol̄a-tol̄anga ihi wako manga bahuku, mangale yatol̄anga o gota-gota o honganoka.

⁶Mata-mata o gota igogarade önanga yawederoka deo bahuku deʼ o tataka.

⁷Onanga yätuhuku Ani Tau hiädono ibinaha; deʼ yapeseke o ngï ini huba-huba Ngona.

⁸Onanga yomau mata-mata kamamoi mima ponu onangika, deʼ yatuhuku yamata-mataka o pupuji mangï o bereraka nënanga.

⁹O nabi-nabi deʼ o nonako ihera-heranga mia makeokaua, deʼ moiua ihiöriki hiädono muruonoka kahokonenangika.

¹⁰Hiädono muruonoka, ya Jou Madutu, o haturu ini hohedu Ngona? Hiädono madekanino önanga ihikauku Ani romanga?

¹¹Yadodoaho Ngona nomi riwookaua ngomi? Yadodoaho Ngona nomi pidiloka ngomi?

¹²Kama dodihirakahi Ngona ganga ahi koano, ya Jou Madutu, Ngona ganga nomi hihalamati ngomi.

¹³ De Ani kuata hö modo-modongo Ngona nabelaka o ngöto, deʼ Napooteke o ngotika managa mapea.

¹⁴ Ngona nawede-wederuku o Lewiatan mapea deʼ ënanga nadiai o tonaka ikokakaha yogö gogere manga inomo.

¹⁵Ngona nohi hahuru o akere malako deʼ o ngairi; o ngairi ma ago-agomo Nadiai itore.

¹⁶Ngona nohidadi o hutu-hutu deʼ o wange-wange, inoli nohi tantu mangï o wange malako deʼ o mode.

¹⁷Ngona nohi tatapu o dunia mabatingi-mabatingi, nadiai o ngogoro deʼ o awa-awana.

¹⁸Nomä hininga sarakia o haturu ini hikauku Ngona, ya Jou, o hoana deo berera ini nako-nakoua Ngona Ani romanga yafitana.

¹⁹Uha nahilapahi Ani umati ima ngaku-ngakunua o haturu manga hayanga koiwa-iwa manga giamika. Uha mangale kahiado-adonika nawohanga Ani umati yobobodito manga nasib.

²⁰Noma hininga Ani jaji nadodiai dede ngomi, hababu o nyawa yodiai ipö pakisa o ngï mahohuhutu yögetongo o bereraka nënanga.

²¹Uha nohigumal̄a o nyawa yatö tuku-tuku yahimal̄eke, tanu o nyawa yohö hangihara deʼ yomö mihikini ini higiriri Ngona.

²²Nomomiki Noma okoino ya Jou Madutu, nöriwo Ani perekara! Hababu o wange magurutu Ngona ini hohedu o nyawa yongaku-ngakua Ngonaika.

²³Uha nawohanga Ani haturu-haturu yopöa-pöaka, hagala Ani lawani yogigoro iholoi ikuatil̄e.