Read Tobelo O MAZMUR 77 Bible Online

O MAZMUR 77 - Tobelo bible

O MAZMUR 77

¹Mangale yonyä nyanyi manga tutuda. Imoteke: o Yeduton. O Asaf ai Mazmur.

²Toma kua-kuatil̄e ngohi toma hiböaka ma Jou Madutuika; toma kua-kuatil̄e ngohi toma hiböaka, deʼ Unanga woihene.

³O hidehoto magoronaka ngohi tomä niata ma Jouika; o hutu yahaiwatiki tagoraka ahi giama Unangika koihikihounua, mä ahi hininga ioluku yalaru.

⁴Nako ngohi toma hininga ma Jou Madutu, ngohi katokokururihi, nako ngohi tatötakihiri, ahi hininga kaidogo tamao ihi bole.

⁵Ma Jou wadiai ngohi takunua ihikioko o hutu-hutu, ngohi ahi hininga ihuha hiädono takunua totemo-temo.

⁶Tapiki-pikiri o wange ipaha-pahaika töhohininga deʼ tatötakihiri o taongo ipaha-pahaika.

⁷O hutu-hutu ngohi tapiki-pikiri, deʼ toma leha-leha ahi hininga magoronaka,

⁸”Mangale kahi ädo-ädonika ma Jou wohi umo deʼ wohi igo okaua?

⁹Boteka Unanga woma togumoka womï dora ngomi? Kowalioka Unanga watotomoli Ai jaji?

¹⁰Ma Jou Madutu wawohangoka mangale womï dora? Unanga wongamo, hiädono koiwa Ai hayanga de Ai dora?”

¹¹Daha ngohi totemo, ”Nënanga doka yahö hiri-hiri ahi hininga, Duru Wokö Kurutil̄e Wokuaha okaua.”

¹²Ngohi tomau tohininga hagala Ani manarama Jou, tohininga Nadodiai ihera-heranga mahiraino.

¹³Ngohi tomau tatötakihiri hagala Nadodiai, deʼ tapiki-pikiri Ani gao-gao duru ihöhailoa.

¹⁴Ya Jou Madutu, hagala Ani manarama itebini, nagona manga amoko hokä tongomi mia Jou Madutu?

¹⁵Ngona ganga ma Jou Madutu nododiai ihöhera-heranga, Ani kuaha nohi nyataka o hoana deo berera manga hidogoronaka.

¹⁶De Ani kuata nahi bebasi Ani umati, o Yakub deʼ o Yusuf manga difauku.

¹⁷Ini make Ngona, ya Jou Madutu, o akere idadi ihahara, ya, o ngöto matiti makaima hidahaharuku.

¹⁸O lobi yakopoa o awana, o dotoreke iruruhu; o leletongo iutuku ima kokepeleke.

¹⁹O dotoreke itutuhu, o leletongo ijanga-janga, o dunia igiwi deʼ kaima hidahaharuku.

²⁰Ngona nomä dagi Nanonu o moku-moku, Natoaka o ngöto, mä Ani rio hamakeua.

²¹Hokä o gogoana Ngona nätuda Ani umati, o Musa deʼ o Harun yodadi o dodohanga.