Read Tobelo O MAZMUR 78 Bible Online

O MAZMUR 78 - Tobelo bible

O MAZMUR 78

¹O Asaf ai dodotoko manyanyi. Niihene ahi dodotoko, hei ahi hoana de ahi berera, nihidodiai niihene ahi demo-demo.

² Ngohi tomau tahetongo o dolabololo deʼ o hitotero, deʼ tohitararono o sumu-sumu ihira-hiraino,

³o hali ngomi mï ihe-ihene deʼ ngomi mia totarima, ihi jojarita tongomi mia ete de mia tohora.

⁴Ngomi mioluku mia hirahasia tongomi mia ngoha-ngohakika; ngomi mimau mihingangahu o gogo yoto turu-turuino mangale ma Jou Ai kuaha deʼ Ai gao-gao ilago-agomo, inoli hagala Ai manarama ihö hera-heranga.

⁵O Israel manyawaika wohidöaka Ai tita, deʼ o Yakubika de aidifauku wohidöaka Ai pareta. Unanga wähuloko tongone nanga ete de nanga tohora yädotoko toönanga manga ngoha-ngohakika,

⁶hupaya manga ngohaka de manga danongo maduruino yanako, de ihi gila-gila toönanga manga ngoha-ngohakika.

⁷De hoko gënanga onangö aha ima hinganono ma Jou Madutuika, deʼ koyawohangua Ai manara, mä salalu ihingounu Ai paretaika,

⁸hupaya önanga hokä toönanga manga ete de manga tohoraua yöigo-igo yolawani deʼ yohianati; o ngohaka deo danongo manga ngongaku igiwi, deʼ yosetiaua ma Jou Madutuika.

⁹O Efraim aihöana manga dae o toimi deʼ madoto, ihi oara manga diri maöraha yoparangi.

¹⁰Onanga yatilakuru ma Jou Madutu Ai jaji dede önanga, deʼ yoluku ihingounu Ai titaika.

¹¹Onanga yawohanga hagala Ai manarama, deʼ o hali-o hali ihera-heranga Wohinyö nyata-nyata onangika.

¹² Toönanga manga ete de manga tohora manga himangoka, ma Jou Madutu wodiai ihera-heranga o Mesir mabereraka o Zoan matonaka irata-rataka.

¹³ Unanga wabelaka o ngöto, daha Wahidobongo önanga ma honongaika; o akere Waokoil̄e hokä o akere mabebeno.

¹⁴ Unanga wä tuda önanga o wangeoka deo lobi, deʼ o hutu yahaiwatiki deo uku madararono.

¹⁵ Unanga wabelaka ol̄oku o helewo o tonaka ikokakahaka, deʼ Wahidöaka önanga yokere dema boboloi.

¹⁶O doporono o helewo wahuloko ihihupu o akere, daha Wohi hahuru o akere hokä o ngairi.

¹⁷Mä önanga ima togu-togumua yobaradoha ma Jou Madutuika, o tonaka ikokakahaka önanga iwilawani Duru Wokö Kurutil̄eika.

¹⁸ Onanga yohangaja iwi taili ma Jou Madutu, de iwi pakisa yogahoko o inomo önanga yonönahihu.

¹⁹Onanga iwi lawani ma Jou Madutu de yotemo, ”Mode kawakunu ma Jou Madutu ngone Wonahiol̄omo o tonaka ikokakahaka.

²⁰Igoungu Unanga wagohara ol̄oku o helewo itotogowini, hiädono o akere ihahuru kahä kuata. Mä mode kawakunoli Wasadia o roti deʼ Wahidöaka o hiode ma akeme Ai umatika?”

²¹Woihene gënanga, ma Jou Madutu wongamo deʼ wängika Ai umati deo uku; Ai gangamo onangika kaidogo-dogo,

²²hababu önanga iwi ngakua ma Jou Madutuika, Ai kuahaika yaku-akunu yahihalamati önanga.

²³Ngaroko hoko gënanga Unanga wohi pareta o dihanga mangale yahelenga mangora-ngorana.

²⁴ Unanga Wohi guti o gandum o horogauku, o manna mangale toönanga manga inomo.

²⁵Unanga Wahidöaka önanga o inomo dema boboloi; önanga yaol̄omo o malaekat maroti.

²⁶Unango Wahuloko o hidal̄oko o wange mahiwariha iwuwu; mangale Ai kuaha o hidal̄oko o koreharauku italoko.

²⁷Unanga Wohiguti o totaleo-totaleo mangale Ai umati, mangöe hokä o dowongi yakunua yaetongo.

²⁸Watifa o totaleo-totaleo gënanga manga tau-tau madoomuoka önanga imä tau-tau mangï magilolitino.

²⁹De önanga yol̄omo hiädono yäpunuhu, hababu ma Jou Madutu wahidöakoka okianaga önanga yonönahihu.

³⁰Mä toönanga manga nahihu yakihounowahi; hoʼ magogiriaka önanga kayol̄omohi,

³¹ma Jou Madutu wongamo deʼ Walawani önanga; Watoma o Israel manyawa o gömaduru deʼ yopoputurungu.

³²Ngaroko hoko gënanga Ai umati kahirahi yobaradoha, Wadodiai ihöhera-heranga önanga koyongakua.

³³Done ma Jou Madutu wohibobaha toönanga manga ngango hokä o ngomaha moi, toönanga manga taongo imata o modongo magoronaka.

³⁴Toönanga manga hidogoronaka wohi geto-getongo ma Jou Madutu wätoma yamuruono naga, mahomoa ima toduba deʼ ima kilioro Unangika.

³⁵Onanga ima hininga ma Jou Madutu toönanga manga gogoana, deʼ duru Wokö Kurutil̄e wahihohalamati önanga.

³⁶Mä önanga iwi eluku Unanga, toönanga manga demo-demo kai eluku mata-mata.

³⁷ Onanga yosetiaua Unangika deʼ ima hijojoua Ai jajika.

³⁸Mä ma Jou Madutu wädora deʼ wä apongo Ai umati, deʼ wä binahaua önanga. Wohi gali-gali Unanga watumungu Ai dohata, deʼ wohi gila-gilaua Ai muruka.

³⁹Unanga womä hininga önanga duga-duga o dodadi ikokakaliua, hokä o hidal̄oko yakaino deʼ ima idulokaua.

⁴⁰Hokokia mamanaro önanga ima lawani Unangika, deʼ Ai hininga yahiri maöraha o tonaka ikokakahaka.

⁴¹Yogogilio önanga iwi taili ma Jou Madutu, iwi hidadi huha Wotö Tebi-tebini, o Israeloka manga Jou Madutu.

⁴²Onanga imähiningaua Ai kokuaha, mawange Unanga wahi bebasi önanga manga lawanino.

⁴³Maöraha Unanga wodiai ihöhera-heranga o Mesiroka, deʼ ihöhera-heranga o Zoan matonaka ikokakahaka.

⁴⁴ Toönanga manga ngai-ngairi Wangali idadi o awunu, hiädono önanga yakunua yaokere ma akere.

⁴⁵ Unanga Wahangihara önanga deo guhuru iwöe-wöe, deʼ Wodogumal̄aika toönanga manga tonaka o ngotara yabinaha.

⁴⁶ Unanga Wödotagao o pipiti deʼ o kahoho, yamata-mataka o gugutuku mahasili deʼ o dumule mahasili.

⁴⁷ Unanga Wabodito manga angguru maröehe deo awana o helewo, deʼ toönanga manga ara ma röehe deʼ o dumunitara ma dodogowini.

⁴⁸Unanga Wodogumal̄aika o awana o es yatapal̄u toönanga manga aiwani o gigini, deʼ o leletongo yautuku toönanga manga aiwani.

⁴⁹Unanga Wohi gila-gila Ai dohata itötoka-tokara deʼ Wähuloko o duduono moi o honenge mamalaekat yadiai toönanga manga nganono itoaka.

⁵⁰Unanga watumungua Ai dohata ekola Wahayangua toönanga manga ngango, mä Wäbinaha önanga de o panyake o luti.

⁵¹ Unanga Wätoma o ngoha-ngohaka o nauru yoria-riaka o Mesir manyawa manga tau madol̄a yögetongo.

⁵² De Unanga Wätuda Ai umati hokä o duba matika, deʼ Wätuda önanga yanonu o tonaka ikokakaha.

⁵³ Ai tutuda magoronaka önanga yosanangi deʼ yohawanua, ena hioko manga haturu yalutu o ngotuku.

⁵⁴ De Ai umati wä ao Ai tonaka itebi-tebinika, ol̄oku mabuturungika Unanga mahirete Waora-oraino.

⁵⁵ Ai umati manga himangoka Unanga wäduhu yogogogere genangokadau daha wahikodoku o berera gënanga mata-mata o Israel manga hoanika, Ai umati, hiädono önanga yakunu yögogere manga haturu manga tau-tau.

⁵⁶ Mä önanga iwimalawani deʼ iwi taili ma Jou Madutu Duru Wokö Kurutil̄e, Ai pareta-pareta önanga yoluku ihingounu.

⁵⁷Onanga yosetiaua hokä toönanga manga ete de manga tohora, deʼ yakunua yängaku hokä o toimi mal̄eha mabobeleoko.

⁵⁸Onanga iwi lawani ma Jou Madutu deo gomanga mahuhuba mangï, deʼ yadiai Unanga Wödohata toönanga manga dulada-dulada.

⁵⁹Wamake gënanga, ma Jou Madutu duru Wongamo, deʼ Wä umo önanga kamamoiuku.

⁶⁰ Unanga Wamal̄aika Ai Tau o Silo mabereraka, Ai gogere mangï o nyawa nanga hidogoronaka.

⁶¹ Unanga Wödogumal̄aika Ai jaji ma Peti yaora; Ai mulia manonako Ai lawani yaoa.

⁶²Unanga wängamo Ai umatika, Ai puhaka madutu, deʼ wä mal̄aika önanga yätoma deo oworo.

⁶³Toönanga manga gogoduru o uku yäolomo; moiua yäkawingi toönanga manga momoholehe.

⁶⁴Toönanga manga imam-imam yätoma deo oworo, toönanga manga bobobao yakunua yododora.

⁶⁵De ma Jou Womomiki de Woma okoino hokä o nyawa ima iduoka de yomomiki, hokä o nyawa yokua-kuata o angguru yokere ibotino.

⁶⁶Unanga Wä hidodohuku Ai lawani, deʼ Wahohihanga önanga kahiädo-ädonika.

⁶⁷Mä Unanga wätila o Yusuf ai difauku deʼ Wäirikua o Efraim aihöana.

⁶⁸Wä iriki ganga o Yehuda aihöana, deʼ o Sion ma Doporono Wöhohininga.

⁶⁹Unanga Wohi goko Ai Tau hokä Ai gogere o horogaka, deʼ hokä o dunia, ibitumu kahiädo-ädonika.

⁷⁰ Unanga wï iriki Ai gilaongo o Daud, deʼ wil̄e ünanga o aiwani o gigini matikaino,

⁷¹wapöpaliara o duba mal̄eha mangï ino, mangale wägoana o Israeloka Ai umati.

⁷²O Daud wapaliara önanga de ai hininga madebi-debini, deʼ wätuda önanga de ai sawaro.