Read Tobelo O MAZMUR 80 Bible Online

O MAZMUR 80 - Tobelo bible

O MAZMUR 80

¹Mangale yonyä nyanyi manga tutuda. Imoteke: o Bunga bakung malugo. O Mazmur o Asaf ai hakihi.

² Ya o Israeloka manga Gogoana, noihene, Ngona nätuda o Yusuf ai difauku hokä o duba matika. Ngona nöbarenuku o dodadi dema gahuhuoka, Notagi mahimangiha de Ani cahaya.

³O Efraim, o Benyamin deʼ o Manasye manga himangoka. Nohimatoko Ani kuaha ngomino, deʼ noboa nomi hihalamati ngomi.

⁴Ya Jou Madutu, nomi higilio ngomi hoihira-hirali; Nomï pulono ngomi de Ani hininga mamura, done ngomi aha mihalamati.

⁵Ya Jou Jou Madutu Duru Noko Kuaha, hiädono muruonoka Ngona nongamo, ngaroko Ani umati mimä niata?

⁶Ngomi nomihidöaka o gari mangale mia inomo, mia kongo dema boboloi mangale mia oke-okere.

⁷Ngona nähigumal̄a o hoana deo berera mia date-datekino imateke ributu mangale tongomi miatonaka mia haturu-haturu yoiete imahisosanangi

⁸Ya Jou Madutu Duru Noko Kuaha, nomi higilio hoihira-hirali; nomï pulono ngomi de Ani hininga mamura, hupaya ngomi mihalamati.

⁹Ani umati hokä o angguru magota mautu o Mesir mabereraka de Natururu. Hagala o hoana deo berera mahomoa Näduhu, daha Nadatomo o gota gënanga toönanga manga bereraka.

¹⁰Ngona nasadia o tonaka mangale enngaa; deʼ ënanga imahingutuku kaha lukuku deʼ imahohe o berera yamode-modekika.

¹¹Enanga yahohonguku hagala o doporono, deʼ majaga-jaga yatamunuku o aras magota mapö pako-pako.

¹²Mararaga itoakika hiädono o Ngöto i Kokoronaika, madubo hiädono o Efrat ma Ngairika.

¹³Ya Jou Madutu, yadodoa Ngona naruba mapagari, hiädono moi-moi o nyawa yakaino yakunu yapagele mahohoko?

¹⁴O ode o hongana yateda-tedamuku hiädono ibodito, deʼ o aiwani o tonaka ilua-luasoka yaol̄omo.

¹⁵Ya Jou Madutu Duru Noko Kuaha, noboali, o horogaka de näpulono deʼ Natailako nohi dodiai Ani umati.

¹⁶Nahihalamati o umati hokä o angguru magota mautu mahirete Nadatomoka, deʼ o angguru madori Nohidadioka ikuata.

¹⁷O haturu yatol̄angoka deʼ yatuhukoka; mal̄aikala önanga Ani dohata yabinaha.

¹⁸Nagoana o nyawa Nä iri-irikoka, o nyawa manga ngohaka Nahi kua-kuatoka mangale Ngona.

¹⁹Done ngomi ka Ngonaka de mirehenokaua; Nogoana tongomi mia ngango, done ngomi aha mini higiriri Ngona.

²⁰Ya Jou Madutu Duru Noko Kuaha, ngomi nomi higilio hoihira-hiraoli, Nomï pulono ngomi de Ani hininga mamura, hupaya ngomi mihalamati.