Read Tobelo O MAZMUR 81 Bible Online

O MAZMUR 81 - Tobelo bible

O MAZMUR 81

¹Mangale yonyä nyanyi manga tutuda. Imoteke: o Gitit malugo. O Asafino.

²Hohinyanyi o higiriri mangale ma Jou Madutu, tongone nanga kuata, houlili de hogarago mangale o Yakub ai Jou Madutu.

³Nitakoro o damunu, nigoraka o nyanyi, nikuti o gambus deʼ o kecapi deʼ nia nou-nouhu.

⁴ Niwuwu o trompet nanga wange ma amokoka o mede magil̄au deo mede manobo marameanga.

⁵Hababu o hali gënanga moi o datoro o Israel mabereraka, moi o pareta o Yakub ai Jou Madutuino.

⁶Unanga wohi dadi o hitatapu moi o Israel ma nyawaika, maöraha Unanga wotagi Ai himangika walawani o Mesir. Ngohi toihene o bahasa tanako-nakoua,

⁷”Ngohi tagorakoka o gina ani belekaka, deʼ talapahi o karaja namö moku-moku ani giamoka.

⁸ Nia huha magoronaka ngini nimahi böaka, deʼ Ngohi tini hihalamati ngini. Tinï baluhu ngini o dotorekino o ngï Ngohi toma ngiunu; Tini uji ngini o Meriba ma akere malakoka.

⁹Ni ihene Ahi hohininga, hei Ahi umati, Israel, nako ngini nimau nihi higihene Ngohi!

¹⁰ Uha nia hidogoronaka naga o gikiri mahomoa, uha nia huba o gikiri maporetino.

¹¹Ngohi nanga ma Jou nia Jou Madutu, Tinï tuda-tuda ngini o Mesir mabereraka de nihupu. Maöraha ngini inï hahini ngini Tinihiol̄omo.

¹²Mä Ahi umati yoluku ihihigihene Ngohi, o Israel yoluku ihingounu Ngohino.

¹³Hababu gënanga Ngohi tämal̄aika önanga manga häeke itogowini; mal̄aika önanga yanïki toönanga manga mau mahirete.

¹⁴Ah, nako Ahi umati yomau ihi higihene Ngohi, nako önanga yomau ihingounu Ngohino,

¹⁵done Ngohi itaiti tahi tuduku toönanga manga haturu, deʼ tähohihanga mata-mata toönanga manga lawani.

¹⁶O nyawa ihï doha-dohata Ngohi aha imaponu Ngohino, önanga aha Tähukumu kahiädo-ädonika.

¹⁷”Mä Ahi umati aha Tahi ol̄omo o gandum yairi-irikika, deʼ Tähi punuhu deo ohungu magula o honganika.”