Read Tobelo O MAZMUR 83 Bible Online

O MAZMUR 83 - Tobelo bible

O MAZMUR 83

¹O Asaf ai Mazmur: o gahumu moi o nyanyi.

²Ya Jou Madutu uha noma tomouoka, uha nomalugoino deʼ nomarirïdoka.

³Namake Ani haturu koyoridokaua, o nyawa ini doha-dohata Ngona imalawani.

⁴Onanga yodiai o datoro o akali itotorou yälawani Ani umati; deʼ ima hikadailako yälawani o nyawa Nagö goa-goana.

⁵Onanga yato, ”Niaino ngone häbinaha o Israel manyawa, hupaya toönanga manga romanga yohiningaokaua.”

⁶Hagala o hoana deo berera imateke toomuoka, deʼ imateke fakati ini lawani Ngona.

⁷O Edom deʼ o Israel manga hoana de manga berera, o Moab deʼ o ngo Hagar manga nyawa;

⁸O Gebal mahoana dema berera, o Amon deʼ o Amalek, Filistea mahoana dema berera inoli o Tirus yogö gogere.

⁹O Asyurö ima higanuoka dede önanga, idadi o Lot aidifauku manga l̄ou de manga giama.

¹⁰ Nädiai önanga hokä o Midian manyawa, hokä o Sisera deʼ o Yabin o Kisyon ma Ngairoka,

¹¹yabobinahaka o Endor mabereraka, deʼ idadi o houru yaboburere mangale o tonaka.

¹² Nähidiai toönanga manga tutuda hokä o Oreb deʼ o Zeeb, niahohihanga toönanga manga popareta hokä o Zebah deʼ o Salmuna,

¹³karana önanga yotemoka, ”Niaino ngone hogogere ma Jou Madutu Ai tau mangï matonaka.”

¹⁴Ya Jou Madutu, nahi barihi önanga hokä o kuhuhunu, hokä o gandum maröehe madoolenge o hidal̄oko yawuwu.

¹⁵Hokä o uku yatuhuku o hongana, o uku madokara yatuhu-tuhuku hagala ol̄oku.

¹⁶Näginïki önanga de Ani hidal̄oko irörato-rato, nätodokana önanga de Ani rato mangutuku.

¹⁷Ya Jou, mal̄aikala önanga yahikauku, hupaya önanga ihigoungu Ani kuaha.

¹⁸Mal̄aikala önanga kahokogenangika yahi mal̄eke de yohawana, mal̄aikala önanga yohonenge o hikauku magoronaka.

¹⁹Tanu önanga ihiöriki duga-duga Ngona ganga Duru Nokö Kurutil̄e, Jou, nakokuaha o dunia yamode-modekika.