Read Tobelo O MAZMUR 84 Bible Online

O MAZMUR 84 - Tobelo bible

O MAZMUR 84

¹Mangale yonyä nyanyi manga tutuda. Imoteke: o Gitit ma lugo. O Korah ai ahaluku manga Mazmur.

²Hokokia masanangi Ani tau Nogö gogere mangï, ya Jou Madutu Duru Nokokuaha!

³Ahi hininga duru kayö hohininga Ani Tau, ahi jiwa de ahi röehe iulili mangale ma Jou Madutu wowango-wango.

⁴Maboboloi o totaleo o totoai imä make o tau deʼ o totaleo o awana magagawi maigutu o gahumu moi, hiädono ënanga yakelenga mangohaka Ani huhuba mangï madatekoka, ya Jou Duru Noko Kuaha, ahi Koano deʼ ahi Jou Madutu.

⁵Igoungu youtumu o nyawa yogogere Ani Tauoka, deʼ salalu ihi nyanyi o higiriri Ngonaika.

⁶Youtumu o nyawa yamö make-make o kuata Ngonaino, deʼ yomau yoiki o ngï ikokaramati o Sion mal̄okuika.

⁷Magogiriaka önanga yotagi yanonu o Baka mawai, o ngï gënanga önanga yangali imadadi o akere malako, o awana madodihiraka ihiholoino deo barakati.

⁸Toönanga manga kuaha iholoi kaidogo, maöraha yotagi o Sionika, ma Jou Madutu Ai ngï ika hagala o gikiri imahimatoko.

⁹Noihene ahi niniata, ya Jou Madutu Duru Noko Kuaha, noihene, ya o Yakub ai Jou Madutu.

¹⁰Nihi barakati tongomi mia koano, ya Jou Madutu, Nähohongino o nyawa Nä iri-irikoka.

¹¹Holoi yaoa o wange moi Ani Tauoka dengaro o wange o ribuhu moi o ngi mahomoaka. Ngaro detogogere o nyawa modorou manga tauoka ngohi tomä ngiriki todadi ahi Jou Madutu Ai Tau mangorana magogoana.

¹²Hababu ma Jou o Jou Madutu tongone nanga gogoana deʼ o koano womomulia, wonahi döa-döaka ngone o dora deʼ o horomati. Unanga komaiwa watila okianaga ma oa-oa o nyawaika manga ngango koiwa mahowono.

¹³Ya Jou Duru Nokokuaha, youtumu o nyawa yongaku-ngaku Ngonaika.