Read Tobelo O MAZMUR 89 Bible Online

O MAZMUR 89 - Tobelo bible

O MAZMUR 89

¹ O Etan o Ezrahi manyawa ai dodotoko manyanyi.

²Ani dora de Ani hayangi, Jou, tomau tohi nyanyi kahokogenangika, Ani setia aha tohingangahu ingohaka dei danongo.

³Hababu ngohi tohiöriki Ani dora ikakali kahiado-adonika, Ani setia ibitumu hokä o dihanga.

⁴Ngona notemo, ”Ngohi todiaioka o jaji de Ahi ngongiriki manyawa; Ngohi tokobotoka o Daudika, Ahi gilaongo:

⁵ ’Ani popareta makuruhi Tatumungu takekekete kahiado-adonika, ani ngohaka de ani danongo manga difauku aha yögogere.’ ”

⁶O doomu ilago-agomo o horogaka ihigiriri Ani manarama ihöhera-heranga, deʼ ihi nyanyi Ani setia, Jou.

⁷O dihangoka koiwa naga hokä Ngona, ya Jou, koiwa naga o dodadi o horogaka imahitero de Ngona.

⁸Ngona ini horomati yotebi-tebini manga doomuoka, iholoi inï modongo de Ani higilolitino mata-mata.

⁹Jou, Jou Madutu Duru Noko Kuaha, o nagona manga kuata imaketero hokä Ngona? Ngona nostia hagala moi-moi magoronaka ya Jou.

¹⁰Ngona nakuaha o ngöto dema luluaka, deʼ narïdi ma moku-moku yömodo-modongo.

¹¹O ngo Rahab, o ngöto managa, Natoma deʼ Nawede-wederuku. de Ani giama ikö kua-kuata Nähohihanga hagala Ani haturu.

¹²O dihanga deʼ o dunia ganga kato Ngona, o dunia deʼ madol̄a mata-mata ka Ani dodadi.

¹³Ngona ganga nohi dadi o koremie deʼ o korehara, o Tabur deʼ o Hermon mal̄oku iulili dei hagaga mangale Ngona.

¹⁴Hokokia ma amoko Ani kuaha, deʼ hokokia yömodongo Ani kuata.

¹⁵O adili deʼ o tita ganga Ani popareta mahohol̄e, o dora deʼ o setia inyata hagala Nadodiai magoronaka.

¹⁶Youtumu o hoana deo berera yopuji-puji de manga morene, yowö wango-wango Ani himanga macahaya magoronaka, Jou.

¹⁷O wange magurutu önanga yomorene deʼ kahirahi yobitumu, karana Ani oa.

¹⁸Ngona nomihidöaka ngomi o utumu ihöhailoa, karana Anioa hongomi miutumu.

¹⁹Hababu tongomi mia gogoana ganga Ani ngongiriki manyawa, ya Jou; tongomi miakoano ganga o Israeloka manga Jou Madutu wotebi-tebini.

²⁰Mahiraino o lolega magoronaka, Ngona nïtemo Ani gilaongo wososatiaika, ”Ngohi tïriwoka womatengo wonö nau-nauru, womatengo Tï iri-irikoka o kawahaino Tï gorakil̄eoka.

²¹ Ngohi tïmakeoka o Daud, Ahi gilaongo, deʼ Ngohi titede ünanga deo upacara maminya.

²²Ahi kuata aha salalu iwï goana, Ahi kuaha aha iwihi kuata ünanga.

²³Unanga aha o haturu iwi hohihangua, deʼ aha koiwi tukua o nyawa madorou.

²⁴Mata-mata ai haturu aha Täbinaha, Tätoma o nagona dika iwi doha-dohata ünanga.

²⁵Ngohi aha kahirahi tïdora ünanga deʼ tosetia unangika, deʼ tadiai ünanga kaidogo wokuaha.

²⁶Ai popareta aha Tohiwoata, o Ngöto i Kokorona de yaino hiädono o Efrat mangairika.

²⁷Unanga aha wohitemo ngohino, ’Ngona ganga ahi Ama, ahi Jou Madutu, ahi gogoana deʼ nohihihalamati.’

²⁸ Ngohi aha tihidadi ünanga Ahi ngohaka o nauru mariaka, duru womomulia o koano mata-mata manga hidogoronaka.

²⁹Unanga aha kahirahi Tïdora hiädono ikakali, Ahi jaji dede ünanga kahirahi ibitumu.

³⁰Ai popareta makuruhi Tatumunguku madekanino o dihanga naga o dunia mal̄okuoka, aingohaka de ai danongo manga difauku aha yögogere.

³¹Mä nako aidifauku Ahi tita yatilakuru, deʼ yoluku yowango imoteke Ahi pareta,

³²nako önanga koyö legaikaua Tohi totatapuoka deʼ koya haduliua Ahi datoro,

³³önanga Tähukumu deo gogohara karana manga dodilakuru, deʼ Tahi tapal̄u deo bodito karana manga baradoha.

³⁴Mä ngohi aha kahirahi tï dora o Daud, deʼ aha kotohi pongonua Ahi setia.

³⁵Ahi jaji dede ünanga aha ko Tadohukua, Ahi jaji kamoiö makota ngaliua.

³⁶Kahokogenangika kamamoi Ngohi tokoboto de Ahi romanga itebi-tebini; Ngohi aha kotï elukua o Daudika.

³⁷Ai popareta makuruhi aha ima tumunguku madekanino o ho wange malako naga, aingohaka de ai danongo manga difauku aha yögogere.

³⁸Ai popareta kahirahi naga hokä o mede, o hakihi isosetia o lobi-lobioka.”

³⁹Mä öraha nanga Ngona nïngamo ma koanoika, Ngona nïumo deʼ nïtila Ani ngongiriki manyawa.

⁴⁰Nadohuku Ani jaji de Ani gilaongo, ai makota Ngona nohikaweli o pesekuku.

⁴¹Ngona naruba ai kota mabebeno o mehele, ai dadatoko o bebeno o mehele Ngona nadiai o rutuku.

⁴²Mata-mata o nyawa yakokaino yaora toünanga ai kia honanga, ünanga idadi kaohoheduoka waika mangale ima kokadateke.

⁴³Ngona nahidöaka o utumu ai haturu-haturuika, deʼ nadiai mata-mata ai lawani yomorene.

⁴⁴Igoungu ai dae Nadiai koiwa mafaida, Ngona nïriwokaua o parangi magoronaka.

⁴⁵Ngona nohi bobahaka ai kuaha ihöhailoa, ai popareta makuruhi Ngona nohikaweli o tonakuku.

⁴⁶Ngona natipoko ai goduru maöraha, deʼ nïtamunu ünanga deo mal̄eke.

⁴⁷Hiädono muruonoka Ngona noma ngiunu, ya Jou? Hiädono muruonoka Ani dohata ihiru-hiru hokä o uku?

⁴⁸Nomä hininga ngohi hokokia mamo dipoko ahi ngango nënanga, Ngona nohi dadi o nyawa hokä o dodadi ikokakaliua.

⁴⁹O naguna wowango igila-gila deʼ wohonengua? O naguna yakunu woma hirehene deo lungunu?

⁵⁰Ya Jou, kiaka yaika Ani dora ihira-hira manonako, Ngona nihijä jajioka o Daudika mangale Ani satia?

⁵¹Nomä hininga ya Jou sarakia Ani gilaongo nënanga ihi hohedu, ngohi tatagongo mangöe o hoana deo berera manga hikauku.

⁵²Ani haturu-haturu iwi hohedu ma koano Ani ngongiriki, ya Jou, iwi hikauku kiaika dika ünanga woiki.

⁵³Niwi higiriri ma Jou kahiädo-ädonika. Idadi hoko gënanga! Amin!