Read Tobelo O MAZMUR 9 Bible Online

O MAZMUR 9 - Tobelo bible

O MAZMUR 9

¹Mangale yonyä nyanyi manga tutuda. Imoteke o Mut-Laben ma lugo. O Daud ai Mazmur.

²De ahi hininga magahumu ngohi tomau tosyukur Ngonaika, Jou, deʼ tohi ngangahu Ani gao-gao ihö hera-heranga.

³Ngohi tomau ahi hininga iamoko deʼ tomorene karana Ngona deʼ tohigiriri Ani romanga, Jou Duru Nokö Kurutil̄e.

⁴Ani himangoka ahi haturu ima idulu deʼ yopiringana; önanga yopeleke hoyo ruba deʼ yohonenge.

⁵Hababu Ngona nopareta hokä o hakimi woadi-adili; Ngona noriwoka ahi perekara.

⁶Ngona nahukumoka hagala o hoana deo berera deʼ Nä binaha hagala o nyawa madorou; önanga yawohanga kahiado-adonika.

⁷Tongomi mia haturu yomataka yobinaha, toönanga manga kota Ngona nabinaha; moiua yohiningali.

⁸Ma Jou wopareta kahiado-adonika; Unanga wohigoko Ai popareta makuruhi la wohi juru hakimi o dunia.

⁹Unanga wapareta hagala o hoana deo berera dema adili deʼ wä juru hakimi önanga deo hininga i riko-rikoto.

¹⁰Ma Jou gënanga o nyawa yahi kokauku manga hohohongo mangi, manga hohohongo maöraha önanga yahidehotoka.

¹¹O nyawa ini nako-nako Ngona imahi nganono Ngonaika, ya Jou, o nyawa ini huba-huba Ngona nä mal̄aikaua.

¹²Niwi higiriri ma Jou wopopareta o Sionoka! Nihi jarita Ai manarama hagala o hoana deo berera ma nyawaika!

¹³Hababu Unanga wä hininga o nyawa o huha deo hangiharaka deʼ wawohangua toönanga manga boaka; o nyawa yadodiai mahayanga koiwa, Wä hukumu.

¹⁴Namake, o haturu ihi hangihara; nohï dora ngohi, ya Jou, nohihirehene deo honenge,

¹⁵hupaya ngohi toni higiriri Ngona o Yerusalem maberera ma nyawa manga himangoka. Ngohi aha ahi hininga ilamoko toulili karana Ngona nohi hihalamati.

¹⁶O hoana deo berera manyawa ini nako-nakoua Ngona yä otaka o baituku önanga yohai-haiti mahirete; önanga yä tagoko toönanga manga homa mahirete magoronaka.

¹⁷Ma Jou wohi nyataka Ai diri karana Ai putuhu iadi-adili. O nyawa madorou yäotaka mangale manga manarama mahirete.

¹⁸O honenge ganga o nyawa madorou mabobaha manga dodogumu, o hoana deo berera manyawa iwi hohaduliua ma Jou Madutu.

¹⁹Kahiado-adonikaua o mihikini manyawa yäwohanga; ihi gila-gilaua o nyawa yohö hangihara manga ngonganono koiwa.

²⁰Nomomiki, Jou, nahi juru hakimi o hoana deo berera manyawa, uha nahi gumal̄a o nyawa manga diri ihi kurutil̄e.

²¹Mal̄aika önanga layo hawana, ya Jou, deʼ ima oko nako önanga duga-duga kao nyawa.