Read Tobelo O MAZMUR 96 Bible Online

O MAZMUR 96 - Tobelo bible

O MAZMUR 96

¹Nihi nyanyi o nyanyi malugo mahungi mangale ma Jou! Ninyanyi mangale ma Jou, hei o dunia yamode-modekika!

²Ninyanyi mangale ma Jou deʼ niwi higiriri Unanga; o wange ihi getongo nihi ngangahu o morene ma abari igoungu Unanga wona hihalamatoka ngone.

³Nihi jarita Ai mulia hagala o hoana deo bereraika, deʼ hagala Ai manarama ipoputurungu umati o nyawaika.

⁴Hababu ma Jou woamoko, deʼ duru iwihigogiriri, kokiani niwï modongo iholoi de hagala o gikiri.

⁵O hoana deo berera mahomoa manga gikiri duga-duga kao gomanga madulada, mä ma Jou ganga o gitawa ma amoko madodadi.

⁶Unanga iwi hawoino o kabaharanga deʼ o mulia, Ai Tau iomanga deo kuaha deʼ o hailoa.

⁷ Niwi higiriri ma Jou, hei o nyawa o umati, nihigiriri Ai kabaharanga deʼ Ai kuata.

⁸Nihigiriri Ai romanga imomulia, deʼ niao o huhuba Ai Tau magoronaika.

⁹Niwi huba ma Jou de nima hinoa o pupuji mapakeanga! Nihahara Ai himangoka, hei o dunia yamode-modekika!

¹⁰Nihi ngahu hagala o hoana deo bereraika, ”Ma Jou gënanga ma Koano! O dunia ibitumu koigiwiua; Unanga aha wahi juruhakimi dema adili.”

¹¹Nimorene, hei o dihanga deʼ o dunia! Niruruhu hei o ngöto deʼ madol̄a mata-mata!

¹²Nimorene, hei o tonaka ilua-luasi deʼ hagala yodato-datomo! O gota-o gota mautu o honganoka aha iulili dei hagaga.

¹³Hababu ma Jou woboa wopareta o duniaka, Unanga aha wahi juruhakimi hagala o hoana deo berera dema adili deʼ o hininga iriko-rikoto.