Read Tobelo O AMSAL 1 Bible Online

O AMSAL 1 - Tobelo bible

O AMSAL 1

¹ Nënanga doka o Salomo o Daud aingohaka, o Israeloka manga koano wososawaro ai ngaje-ngaje.

²Madumutu ena gangala mangale yäriwo o nyawa sarakia idadi yobarija, deʼ ihiöriki o wowango madatoro yaoa-oa inoli yakunu yanako ihi benga-bengail̄e naga demamangarati ilö luku-luku.

³Yososawaro manga ngaje-ngaje yadotoko sarakia o nyawa yakunu yowango de manga barija, yorusi-rusiua, yoadili deʼ yotiai.

⁴O nyawa manga ganako koiwa-iwa yadotoko hiädono manga dibanga idoto, deʼ o gikiri magö idadi o nyawa yososawaro deʼ yakunu imatibanga hokä o balu-baluhu.

⁵De yososawaro manga ngaje-ngaje nënanga o nyawa yobobarija ma aha idogo manga ganako, deʼ o nyawa imadoto-dotokoka aha yamake o tutuda.

⁶De hoko gënanga önanga yakunu yödumunu yososawaro manga ngaje-ngaje magoronaka toënanga mamangarati deʼ yanako o nyawa yobobarija manga demo-demo inoli o loleha ihühuha önanga yo ao-ao.

⁷ Mangale yamake o ganako madutu, madodihiraka o nyawa kokiani de manga mamao o horomati deʼ o modongo ma Jouika. O nyawa bodo yaetongikaua o barija deʼ yoluku yadotoko.

⁸Kokiani natailako nohidodiai okianaga yaheto-hetongo ngoni ayo de aniama ngona ika, ahingohaka,

⁹hababu toönanga manga dodotoko yödogo aniakali maoa hokä o poromu anihaekoka deʼ o gule yahailoa anirupa.

¹⁰Nako o nyawa baradoha inibaja ngona, ahingohaka, uha nodomoteke toönanga manga bobaja.

¹¹O demo maade önanga yotemo, ”Ika, naino ngone holingiri o nyawa deʼ hïguruhe ünanga. Homa hiliba-liba, naino ngone hängika o nyawa yohowo-howonua.

¹²Oraha nënanga önanga yowango yosanangi deʼ manga dödumuloa, mä dahaö önanga aha yodadi hoka o nyawa yatoka yohonenge.

¹³Ngone hal̄ë toönanga manga bara-baranga dema ija-ijaka, hupaya tongone nanga tau iomanga de o baranga haora-oraino.

¹⁴Naino nonïki. Dahaö nanga dohiki mahasilino ngone homa hikodoku homa koketero!”

¹⁵Kokiani uha nonïki deo nyawa hoko gënanga, ahi ngohaka! Nätingaka önanga noma kökurutika.

¹⁶Onanga yakunua imarïdi nako yodiaiowahi o dorou. Onanga yönahihu itai-taiti yotoma.

¹⁷Barikua o totaleo maaha koiwohamua o homa magoronaika yatotatauri awa fuma! Hiadono muruonoka ngini nimau kahirahi hoko gënanga? Muruonoka yadono maöraha niolegaikaua o ganako deʼ nia tila o dodotoko,

¹⁸mä o nyawa madorou genanga koaholi ihi akana o modoi mangale manga diri mahirete o modoi aha yahibodito onanga.

¹⁹Igoungu, o nyawa imalingiri manga baajanga demakuatoka aha ihifangu demanga nyawa mahirete.

²⁰ Niihene! Obarija iahoko hagala o ngekomoka di imapoaka hagala lapangoku!

²¹Enanga iahoko hagala o ngorana ma ago-agomoka de hagala ongï irame-rameoka:

²²Hei hagala o nyawa nibodo-bodo! Hiadono muruonoka ngini nimau kahirahi hoko genanga? Muruonoka iboa maöraha ngini nimatogumu niolegaikaua o ganako de niatila o dodotoko?

²³Ngohi nihihigihene nako ngohi tinï taaere, done nginika aha tohinyata ahi hininga madol̄a deʼ tinihidotoko ahi ganako.

²⁴Ngini tinï ahokoka, ma ngini niatila deʼ nimalegaikaua.

²⁵Mata-mata ahi nasihati ngini niahaduliua deʼ ahi dodaaere ngini niatila.

²⁶Karana gënanga, nako ngini nibodito, ngohi aha tinï gogiete ngini. Nako ngini nihawana, ngohi aha tinïhohedu ngini.

²⁷Ya, ngohi aha tinïhohedu ngini nako ngini niahininga i huha deʼ niamao o hangihara karana o bodito inïtapal̄u iboa hokä o rato.

²⁸O öraha gënanga ngini aha nihiahoko, mä ngohi aha tohaluhua. Ngini aha nihilingiri kiaika honanga mä ngohi aha konihi makeua.

²⁹Ngini aha hokä o nyawa komaiwa yöigo yamake o ganako, deʼ yoluku iwihingounu ma Jou.

³⁰Ngini komaiwa nimau niatarima ahi nasihati ekola niö hohininga nihidodiai ahidodaaere.

³¹Karana gënanga, ngini aha niamao mahasili hagala nia manaramino deʼ hagala nia datoro itotorou.

³²O nyawa koiwa-iwa manga ganako aha yohonenge karana ngohi ihilegaikaua, deʼ o bodo manyawa aha yobinaha karana ihilegaikaua.

³³Mä o nyawa ihihigihe-gihene ngohi aha iwipaliara. Unanga wowango wosanangi deʼ iparaluua wohawana.