Read Tobelo O AMSAL 10 Bible Online

O AMSAL 10 - Tobelo bible

O AMSAL 10

¹Nenanga doka o Salomo wososawaro ai ngaje-ngaje: O ngohaka wobobarija ganga aiama aihininga ilamoko; o ngohaka wobodo-bodo ngoi ayo amihininga wahuha.

²O kaya yamake deo rusi yahidöaka o utumu; i idulu yaino o hininga marikoto aha yahihalamati.

³Ma Jou aha wohigumal̄aua o nyawa maoa yahahini; mä Unanga wätatoko o nyawa madorou hupaya o nyawa gënanga wamakeua wonönahihu.

⁴O nyawa yototebeturu aha yomihikini; mä o nyawa yämomagawe aha idadi yokaya.

⁵O nyawa wobobarija aha wotoomu o gandum o gugutuku maorahoka, mä o nyawa kawoma idu-idu dika o gugutuku maorahoka, wodotagao o mal̄eke ai dirika.

⁶O nyawa maoa aha wamake o barakati. O dohata deo gangamo ima ngiunika o nyawa madorou manga demo-demo maporetoka.

⁷Hähohininga o nyawa maoa marupa o barakati, mä o nyawa madorou itaiti yäwohanga.

⁸O nyawa yososawaro, yöigo yatarima o nasihati; o nyawa manga ade-ade ibodo aha o ngekomo yörehene.

⁹O nyawa manga hininga irikoto, aha yosanangi; o nyawa yotipu-tipu aha yahiöriki.

¹⁰O naguna wagogono o diai, wapuda o huha; o naguna wohidaaere wohi totiaika, wohidailako o dame.

¹¹O nyawa maoa ai demo-demo yadiai o wowango isanangi, mä o nyawa madorou manga demo-demo maporetoka imangiunika o hininga ipese-peseke.

¹² O dohata yapuda o ributu; o ngigo deʼ o hayangi ya apongo hagala o howono.

¹³O nyawa ai dibanga idoto-doto wohi demo o barija mademo-demo; o nyawa bodo iparalu hïgohara.

¹⁴O nyawa wobobarija watoomu o ganako; nako o nyawa bodo wotemo-temo wanonai o bodito.

¹⁵O kaya yägoana yokaya-kaya, o mohikini yabodito o mihikini manyawa.

¹⁶Nako o oa yodiai, mahewa ganga o wowango isosanangi; nako o baradoha yodiai, mabaha iholoi iwöe o baradoha.

¹⁷O nagona yolegaika o dodaaere aha yowango yohalamati, o nagona yomangakua manga howono naga o bodito magoronaka.

¹⁸O nyawa yaiu-iunu o dohata ganga yotipu-tipu. O nyawa ihigogerewoto o fitana ganga yofuma.

¹⁹Iholoi iwöe o demo, iholoi iwöe yakunu idadi o baradoha; o nyawa yaku-akunu yatumungu manga akiri ganga yobarija.

²⁰O nyawa maoa manga demo hokä o haaka madutu; o nyawa madorou manga dibanga koiwa mamangarati.

²¹O nyawa maoa manga demo, marupa o barakati mangale o nyawa manga ngöe; o bodo manyawa manga bodo yatoma manga diri mahirete.

²²Karana dema Jou Ai barakati dika o nyawa idadi yokaya; o karajanga itubuho yakunua yädogo o arata.

²³O bodo manyawa yosanangi yadiai o howono; o nyawa yobobarija yöigo yalingiri o barija.

²⁴O nyawa manga hininga itebi-tebini yamake okianaga yonönahihu; o nyawa madorou yamake okianaga yömodo-modongo.

²⁵Nako o rato yakorona, o nyawa madorou yohihangoka; mä o nyawa manga hininga iriko-rikoto kahirahi yobitumu kahiado-adonika.

²⁶Uha nïhuloko o nyawa wototebeturu, ünanga duga-duga anihininga dika wahuha, hokä o suka yakiohiki aniingiri ekola o nofo anilako yahïhi.

²⁷Kokiani nïhoromati ma Jou, done ngona aha nowango itedekana; o nyawa madorou yohonenge koyadonowahi maöraha.

²⁸O nyawa maoa manga ngonganono yadiai ünanga wosanangi; o nyawa madorou manga ngonganono mata-mata kaohomoa.

²⁹Ma Jou wägoana o nyawa manga hininga iriko-rikoto, mä Wäbinaha o nyawa yododiai o dorou.

³⁰O nyawa manga hininga itebi-tebini aha yowango yosanangi de yohalamati; o nyawa madorou aha koyögogerua o tonaka o puhaka.

³¹O nyawa manga wowango itebi-tebini yaheto-hetongo o barija mademo-demo; o nyawa madorou aha manga uru itamunu.

³²O nyawa manga wowango itebi-tebini manga demo-demo yasanangi o hininga; o nyawa madorou manga demo-demo salalu yahiri o hininga.