Read Tobelo O AMSAL 11 Bible Online

O AMSAL 11 - Tobelo bible

O AMSAL 11

¹Ma Jou wädohata o nyawa yapake-pake o duduga irusi-rusi mä Unanga wosanangi deo nyawa yapake-pake o duduga madiai.

²O nyawa woede-edenge aha iwihikauku; o nyawa aihininga itotipokouku ganga wobarija.

³O nyawa maoa iwituda aihininga marikoto; o nyawa wöigo woeluku wobinaha de ai tengeluku.

⁴Nako nöhimanga o honenge, aniarata koiwa mamangarati; aniwowango aha ihalamati nako ngona anihininga itebini.

⁵O nyawa maoa aingekomo irata mangale aihininga marikoto, mä o nyawa madorou wao ai diri o boditoika.

⁶O nyawa aihininga irikoto wohalamati karana aihininga itebini; o nyawa koiwi ngaku-ngakua, wohodoa mangale ai kal̄il̄u.

⁷Nako o nyawa madorou wohonenge, ai ngonganono mahonenge; wönganono ai kuata mahirete koiwa mamangarati.

⁸O nyawa aiwowango itebi-tebini iwihirehene deo huha; o nyawa madorou yamake o dadatoko.

⁹O nyawa madorou imahikadailako yahibinaha; o nyawa maoa manga barija yahihalamati.

¹⁰O kota ikaramata nako o nyawa manga hiningai riko-rikoto yamake o rejeki; o kawaha youlili deyo hagaga nako o nyawa madorou yohonenge.

¹¹O nyawa manga hininga iriko-rikoto manga barakati o kota yahailoa; o nyawa madorou manga demo yakilianga.

¹²Hahikauku o nyawa mahomoa ganga o fuma mamanarama; o nyawa manga akali isosawaro, aha kokia-kiaua yotemo.

¹³Ihingahu-ngahu o hidal̄oko maabari yakunua yasö o rahasia, mä o nyawa yängaku-ngaku yakunu o perekara yarahasia.

¹⁴O hoana deo berera aha ikilianga nako moiua o tutuda; iholoi yowöe yononasihati idogo itotomo o halamati.

¹⁵Hojaji hofangu o nyawa mahomoa manga nagimi mamangarati homä gahoko o bodito; iholoi yaoa homahiganua o hali gënanga magoronaka hupaya hosanangi.

¹⁶O ngoheka amikalakuanga yaoa-oa mamake o horomati; o nyawa koiwa manga hayanga de manga dora imädoomu o kaya.

¹⁷O nyawa aihininga yaoa-oa aidiri ihiutumu; o nyawa koiwa manga hayanga de manga dora manga diri ihirugi.

¹⁸O nyawa madorou manga utumu ganga o utumu madutuua, o nyawa o oa yododiai manga utumu ganga o utumu madutu.

¹⁹O nagona yotongohono o oa yadiai, aha yowango yosanangi; o nagona imatogowini mangale o dorou yodiai yödumutu o honenge.

²⁰Ma Jou wädohata o nyawa yododiai o dorou, mä Unanga wädora o nyawa yowango mahowono koiwa.

²¹O nyawa madorou maraioka yamake o hukumanga; o nyawa maoa aha yohalamati.

²²O ngoheka amiakali koiwa-iwa hokä o ali-ali o gurasi o ode mangunungoka.

²³O nyawa maoa manga nahihu salalu mahasili maoa-oa, mä yöngano-nganono o nyawa madorou duga-duga kao gangamo.

²⁴Naga o nyawa yöigo ihidöaka, mä kai dogo yokaya, naga yöigo yotalä, mä kai dogo yomihikini deyo hangihara.

²⁵O nyawa ihidöaka mangöe-ngöe aha yamake dema boboloi, o nyawa yoigo-igo yoriwo ahaö yäriwo.

²⁶O nagona ima doporono aha o nyawa yälolai, mä o nyawa yahö huku-hukunu yamake o higiriri.

²⁷O nagona yamagawe o oa yodiai aha o nyawa yäsanangi; o nagona yalingiri o dorou, aha yätapal̄u o huha deo hangihara.

²⁸O nagona ihilamo-amoko o arata aha yotifa hokä o gota mahoka madodimono; o nyawa manga wowango itebi-tebini aha yohero hokä o gota madori.

²⁹O nyawa o huha yödiai manga rumah tangga, aha yahihanga hagala mata-mata. O nyawa bodo aha yäleleani o nyawa yobobarija.

³⁰O nyawa manga wowango itebi-tebini aha idogo itotomo manga halamati; o nyawa yobobarija yödogo yanö ninïki.

³¹ Nako o duniaka nënanga o nyawa maoa mayatarima mabalahi, maraioka o nyawa madorou deʼ o baradoha manyawa aha yamake o hukumanga.