Read Tobelo O AMSAL 12 Bible Online

O AMSAL 12 - Tobelo bible

O AMSAL 12

¹O nyawa yöhohininga o ganakoika yosanangi yamake o dodaaere; mä o nyawa yoigo-igoua yähidaaere ganga o nyawa fuma.

²O nyawa maoa ma Jou wäsanangi, mä o nyawa ihidödailako o dorou aha yatarima o hukumanga.

³Ka o nyawa moiö makoiwa naga yakunu kahirahi youtumu mangale o dorou; mä o nyawa manga hininga iriko-rikoto kahirahi yobitumu, koyogiwiua.

⁴O hekata maoa ganga ami rokata ai hininga ilamoko deʼ ami rokata ai utumu, o hekata madodiai ami rokata iwi mal̄eke ganga hokä o kobongo mapanyake iwede-wederuku.

⁵O nyawa manga hininga iriko-rikoto yapikiri hagala o hali maoa-oa; o nyawa madorou yatatoro o tengeluku.

⁶O nyawa madorou manga demo-demo yähohonenge; o nyawa manga hininga iriko-rikoto manga demo-demo yähihalamati.

⁷O nyawa madorou aha yäotaka deʼ yabinaha manga rio makoiwa; mä o nyawa maoa aha kahirahi yobitumu yongohaka deyo danongo.

⁸O nyawa iwihigiriri imamoteke de ai barija; o nyawa iwihikauku imamoteke de ai fuma.

⁹Iholoi yaoa yodadi o kawaha biaha de manga karajangoka, de imadiai o nyawa yolago-agomo enahioko o inomo yahikuranga.

¹⁰O nyawa maoa watailako wohidodiai ai aiwani o gigini; mä o nyawa madorou wahangihara.

¹¹Yototumule yokarajanga ihauku manga inomo iwöe, mä o nyawa yaumo-umo manga öraha mangale o hali mafaidä koiwa-iwa ganga o bodo manyawa.

¹²O nyawa madorou yönahihu yamake o utumu o nyawa yososetia inoua; o nyawa maoa hokä o gota mautu ihohoko.

¹³O nyawa madorou yätagoko mangale toönanga manga demo-demo itotorou yahö heto-hetongo; o nyawa maoa yahirehene deo huha deo hangihara.

¹⁴Moi-moi o nyawa yamake mabalahi imamoteke de manga demo-demo deʼ manga manarama; moi-moi yahidöaka o hewa imadae-daene.

¹⁵O nyawa fuma womamao ai diri komaiwa wahowono, mä o nyawa wobobarija wöigo woihene o nasihati.

¹⁶Nako o nyawa bodo womal̄e mangale, o öraha gënanga dika wohi nyata ai hininga mahiri; mä yobobarija yohaduliua nako yohohedu.

¹⁷Dede waheto-hetongo o diai wohimatoko o adili; deo tengeluku o nyawa wohimatoko iadi-adilua.

¹⁸O ade-ade isosabaranga yakunu yal̄abo o nyawa manga hininga hokä o oworo ihitopoko; o barija mademo-demo hokä o houru yahitö togu-togumu.

¹⁹O lako dadawi o tengeluku aha ikilianga, mä o diai mademo-demo aha kahirahi o öraha magurutu.

²⁰O nyawa i hidödailako o dorou yöigo iadi-adilua, o nyawa ihidödailako o oa aha youtumu.

²¹O nyawa maoa aha koyamakeua o bodito; o nyawa madorou aha salalu yäkorona o huha.

²²Ma Jou wädohata yototengeluku, mä Unanga wosanangi deo nyawa manga hininga iriko-rikoto.

²³O nyawa wobobarija wohidumu-dumutu ai ganako; o nyawa bodo wohingahu-ngahu ai bodo.

²⁴O karajanga ihauku yadiai o nyawa yokuaha; o debeturu yapakisa o nyawa yodadi o gilaongo.

²⁵O mamao o hawatere yatobiki manga nauru, mä o demo-demo mabole-bole o hininga yalamoko.

²⁶O nyawa maoa iholoi yautumu de imakokadateke; o nyawa madorou yangohu o ngekomo karana manga dorou.

²⁷De ima totebeturu aha koya makeua yonönahihu; deo karajanga ihauku o nyawa yamake o kaya.

²⁸O nyawa yanönonu o ngekomo madiai aha yowango yosanangi; o nyawa yanönonu o ngekomo itotorou yödumutu o honengika.