Read Tobelo O AMSAL 13 Bible Online

O AMSAL 13 - Tobelo bible

O AMSAL 13

¹O ngohaka wososawaro wohigihene wohidodiai nako ama wihidöaka yososawaro manga nasihati; o nyawa woma ede-edenge woluku watarima o dodaaere.

²O nyawa maoa manga demo iao o utumu; o nyawa manga hininga iriko-rikotua yosanangi o gangamoika.

³O nyawa womahidodiai ai demo-demo magoronaka aha ai wowango isanangi; o nyawa wotemo-temo wosabaranga aha iwitapal̄u o bodito.

⁴Wototebeturu ai nahihu mangöe mä kamoiö wadaenua; o nyawa wokarajanga wohauku wamake hagala wonönahihu.

⁵O nyawa manga hininga iriko-rikoto yödohata o tengeluku, o nyawa madorou manga kalakuanga yahimal̄eke deyähohedu.

⁶O hininga marikoto yägoana o nyawa yowango manga hininga irikoto; o dorou yahibodito o nyawa baradoha.

⁷Naga ima ede-edenge hokä yokaya enahioko manga arata koiwa; naga imadiai hokä yomihikini, enahioko yokaya malago-agomo.

⁸O kaya manyawa kokiani ihihupu o tiwi hupaya manga wowango isanangi; o mihikini manyawa yädohatua o nyawa.

⁹O nyawa manga wowango itebini hokä o cahaya itotararono; o nyawa madorou hokä o hilo yato ihonenge.

¹⁰O hininga magurutil̄e mahasili duga-duga o ributu; o nyawa wobobarija womau watarima o dodotoko.

¹¹O kaya yamake dema gapanga aha itaitoli ikuranga; mä o arata mahutu-mahutu yatoomu aha iholoi idogo.

¹²Nako o ngonganono itotomua, nangahininga ihangihara; nako nanga nahihu hohimoteke nangahininga isanangi.

¹³O nyawa kowölegaikaua ma Jou Ai dodotoko, wohibodito ai diri; O nyawa wohingou-ngounu ma Jou Madutu Ai titaika aha wamake ai hewa.

¹⁴O nyawa yobobarija manga dodotoko o utumu matiti; nako naga o nyawa yängamo o dodotoko gënanga yahihalamati.

¹⁵O nyawa de ai akali maoa-oa aha iwihigogiriri; o nyawa iwingakuokaua aha ihuha wowango.

¹⁶O nyawa wobobarija okianaga wodiaiuahi womapikiri; o nyawa bodo wohingahu-ngahu ai bodo.

¹⁷O huhuloko wososawaroua woao o bodito; o huhuloko iwingaku-ngaku maraioka wohasili.

¹⁸O nyawa wolu-oluku iwïdotoko idadi womihikini de okiaua iwidaene; o nyawa watotarima o nasihati aha iwi horomati.

¹⁹Hokokia mahailoa wamake okianaga wonönahihu! O nyawa bodo yoluku imaidulu o dorouino.

²⁰O nyawa wododiawo deo nyawa wobobarija, aha idadi wobarija; o nyawa wododiawo deo bodo manyawa, aha wobodito.

²¹O baradoha manyawa salalu iwïgoginïki o bodito o nyawa maoa salalu watarima o utumu.

²²O nyawa maoa yahipuhaka manga kaya manga ngohaka de manga danongika; o baradoha manyawa manga kaya yagogono mangale o nyawa ai wowango iriko-rikoto.

²³O tonaka mahomoa yakunu ihihasili o inomo mangöe mangale mihikini manyawa; mä koiwa o adili idadi o hababu o tonaka gënanga yakarajangua.

²⁴Wagoharua aingohaka, mamangarati wïhiningaua unangika; nako wïhininga, kokiani wobarani wïgohara.

²⁵O nyawa maoa salalu okia-kiaua yokuranga, mä o nyawa madorou salalu yokura-kuranga.