Read Tobelo O AMSAL 15 Bible Online

O AMSAL 15 - Tobelo bible

O AMSAL 15

¹Deo bobaluhu iböbole-bole, o dohata idadi irïdi; o bobaluhu ikökua-kuata yamomiki o dohata.

²O nyawa wobobarija aidemo-demo yadiai o ganako o hininga yatauru; o nyawa bodo ai demo-demo madol̄a duga-duga kao bodo.

³Ma Jou wamake mata-mata idädadi hagala o ngï; Unanga watailako wohidodiai mata-mata yaoa-oa deʼ itotorou.

⁴O demo-demo maoa yödogo ainauru; o demo-demo o hininga yal̄abo-l̄abo ihibole aimau.

⁵O nyawa bodo wölegaikaua aiama ainasihati, o nyawa wobobarija wöhininga o hidaaere.

⁶O nyawa maoa aitauoka naga mangöe o arata; o nyawa madorou ai kaya ihihanga mangale o bodito.

⁷O nyawa wobobarija ai demo-demo i omanga deo ganako, mä o nyawa wobodo-bodo ai dibanga hoko genangua.

⁸Ma Jou watarima o nyawa maoa manga niniata, mä Unanga wödohata o nyawa madorou manga huhuba.

⁹Ma Jou wödohata o nyawa yososetiaua manga wowango madodagi, mä Unanga wädora o nyawa ihidödailako yadiai Ai mau.

¹⁰O nyawa wadodiai o dorou aha iwihangihara; o nyawa wolu-oluku iwitaaere aha wohonenge.

¹¹Ma Jou wohiöriki o nyawa yohone-honenge manga dunia; kiaka yakunu idadi o nyawa manga dibanga Unanga iwïgiunu.

¹²O nyawa woigo-igo wähikauku wöigoua iwitaaere; ünanga woigoua wogahoko o nasihati o nyawa yobobarijaino.

¹³O hininga kaimore-morene yadiai o biono ihailoa, o hininga kai hühuhaika yatobiki ai kuata.

¹⁴O nyawa wobobarija walingiri o ganako; o nyawa bodo wotasibu deo bodo.

¹⁵O nyawa ai biono iwangorua kokiani gila-gila woma hidailako ai ngango magoronaka, mä o nyawa aihininga kaimore-morenika salalu wosanangi.

¹⁶Iholoi yaoa o arata mahuhutulu mä dema modongo ma Jouika, ngaro deo arata mangöe mä dema pesekoka.

¹⁷Iholoi yaoa hol̄omo o gauku mä dema dora de homäteke hininga, ngaro de hol̄omo o hiode ma akeme mahemo-hemoro mä dema dohatoka.

¹⁸O nyawa isosapati wongamo wapuda o ributu, o nyawa wososabari woao o dame.

¹⁹O nyawa wototebeturu aha salalu wamao o huha deo hangihara; o nyawa aihininga iriko-rikoto wamakeua o huha.

²⁰O ngohaka wobobarija, wasanangi aiama aihininga; o ngohaka wobodo-bodo womilegaikaua ngoi ayo.

²¹O bodo ganga o nyawa yofuma-fuma manga sanangi, o nyawa wobobarija aiwowango irikoto.

²²O datoro koidadiua, nako koiwa madibanga; o datoro ihasili, nako yowöe ihidöaka o nasihati.

²³O demo-demo yahö heto-hetongo yakokorona, maöraha, iao o morene.

²⁴O nyawa wobobarija wanonu o ngekomo idoa-doa madumutu o wowango; wanonua o ngekomo iuti-uti madumutu o honenge.

²⁵Ma Jou aha waruba o nyawa ai hininga ikökurutil̄e ai tau, mä momatengo o bobao ami tonaka Unanga wögoana.

²⁶Ma Jou wödohata o datoro madorouika; mä o demo-demo maoa-oa yasanangi Ai hininga.

²⁷O naguna wolingiri o utumu ihohailoaua, wäwedere ai tau manyawa mahirete. O naguna wödohata o uru mabobokumu matiwi aha wowango wosanangi.

²⁸O nyawa maoa ai demo-demo watibanga; o nyawa madorou wahetongo o hali-hali itotorou.

²⁹Ma Jou woihene nako o nyawa maoa imä niata, mä Unanga woluku wahaduli o nyawa yososetiaua.

³⁰O rupa kai more-morene o hininga yasanangi, o abari maoa o jiwa yarano.

³¹O nyawa wölegaika o dodaaere iwietongo o nyawa wobobarija.

³²O nyawa wolu-oluku iwinasihati, waetongikaua ai diri mahirete; o nyawa watotarima o dodaaere, wodadi de ai akali i sosawaro.

³³Ma Jou himodongo ganga o dodotoko maoa-oa mahohole; o horomati ihihohihira o hininga itotipokouku.