Read Tobelo O AMSAL 16 Bible Online

O AMSAL 16 - Tobelo bible

O AMSAL 16

¹O nyawa yakunu yodiai o manarama madatoro, mä ma Jou Madutu wohidöaka maputuhu.

²O nyawa moi-moi ai manarama yakunu idadi yaoa aibobulonoka mahirete, mä ma Jou watakihiri aihininga madungutu.

³Ani manarama madatoro mata-mata nohidöaka ma Jouika, done ngona aha nohasili nadiai.

⁴Hagala moi-moi ma Jou wadodiai naga dema dumutu; deʼ madumutu mangale o nyawa madorou ganga o binaha.

⁵O nyawa yoede-edenge mata-mata ma Jou wädohata; Unanga wohigumal̄aua önanga yörehene o hukumanga.

⁶O nyawa wososetia ma Jou Madutuika aha wamake o apongo; o nyawa wïmodo-modongo aha iwihirehene de hagala o dorou.

⁷Nako ngona nasanangi ma Jou Ai hininga, hagala anihaturu wadiai anidodiawo.

⁸Iholoi yaoa mahasili mahuhutulu deo hininga iriko-rikoto, ngaro deo hasili mangöe makoiadilua.

⁹O nyawa yakunu wadiai o manarama madatoro, mä ma Jou Madutu wohitantu aiwowango mangekomo.

¹⁰Ma koano watarima o kuaha ma Jou Madutuino, hoʼ, ünanga wahowonua ai putuhu magoronaka.

¹¹Ma Jou womau o nyawa idadi manga hininga irikoto o bubukunu magoronaka, ikali wapake o duduga deʼ wohitiba-tibanga.

¹²Wokokuaha, wodiai o dorou ganga o peseke, hababu aipareta ibitumu karana o adili.

¹³O hitararono ma ade-ade madiai yasanangi wokokuaha, ünanga wädora o nyawa yotemo-temo de manga hininga iriko-rikoto.

¹⁴Ma koano ai dohata ganga hokä yähukumu yähohonenge ma abari; o nyawa wobobarija aha wohidailako warïdi!

¹⁵Ma koano aihininga maoa iao o wowango isosanangi, hokä o lobi ihiguti o awana o ngogoro maörahoka.

¹⁶Hamake o barija iholoi yaoa ngaro de hamake o gurasi; hamake o ganako iholoi iragane ngaro deo haaka.

¹⁷O nyawa maoa imatingaka magurutika deo dorou; o nyawa watötailako ai wowango madodagi, wögoana ai diri.

¹⁸O edenge mahasili o gilianga; o hininga magurutil̄e mahasili o bodito.

¹⁹Iholoi yaoa o hininga itotipokouku deʼ o arata makoiwa, ngaro de yänïki o nyawa yoede-edenge deʼ yajame toönanga manga arata yaora-oraino.

²⁰Nohininga nohidodiai okianaga inïdoto-dotoko ngonaika, done ngona aha namake okianaga yaoa-oa. Nïngaku ma Jouika, done ngona aha noutumu.

²¹O nyawa wobobarija iwinako ai dibangoka idoto; madodagi wotemo nanga hininga yadaene, yadiai ai demo-demo idogo hangaku.

²²O dibanga idoto-doto genangala o nyawa manga hininga ihöhailoa manga wowango mautumu matiti; o nyawa bodo ai bodo mahirete iwihangihara.

²³O nyawa aiakali maoa-oa yadiai ai demo-demo wobarija, deʼ aidodotoko kaidogo yangaku.

²⁴O demo ibole-bole marupa o madu; hamao mamutiti deʼ nanga röehe yatumuloa.

²⁵ Naga o ngekomo hölega-lega irikoto, mä mabaha o ngekomo gënanga yödumutu o honenge.

²⁶O nahihu mangale o ngol̄omo yahititila o nyawa mangale womahidailako; karana aimamata, pakisa ünanga wokarajanga.

²⁷O nyawa madorou wohidailako wahibodito aidodiawo o nyawa; ai demo-demo itorou, hokä o uku ingaboho.

²⁸O nyawa yorusi-rusi yapuda o ributu; woföfitana wakilianga o hobata madutu.

²⁹O nyawa aidora de aihayanga koiwa wätipu aidodiawo, deʼ wä ao önanga o bodito magoronaika.

³⁰Nomahitiari o nyawa imahöhumuiete deʼ inihilölako bikini, ünanga magogiria watatoro itotorou aihininga magoronaka.

³¹O nyawa ai hininga iriko-rikoto aha iwihidöaka ikurutu aiumuru; aidudutu hokä o makota ileto-letongo.

³²Itaitua hongamo iholoi yaoa ngaro de nanga kuahaoka; hakuaha nanga diri iholoi yaoa ngaro deo kota hautumu.

³³Mangale hanako nanga nasib, o nyawa youndi; mä ihitö tantu mabobaluhu duga-duga ma Jou mahirete.