Read Tobelo O AMSAL 17 Bible Online

O AMSAL 17 - Tobelo bible

O AMSAL 17

¹Iholoi yaoa o gandum o uru moi demaributu koiwa, ngaro deo inomo ihemo-hemoro dema boboloi madema ributuoka.

²O gilaongo wososawaro aha wäkuaha o ngohaka wododiai o mal̄eke; deʼ aha watarima o puhaka kamamoi deo ngohaka gënanga ai roriadodoto.

³O gurasi deʼ o haaka yataili o ukuika, mä o nyawa manga hininga ma Jou wataili.

⁴O nyawa madorou wodomoteke o hidumutu itotorou, wototengeluku wöigo wohigihene o fitana.

⁵O naguna wahohedu o nyawa huha deo mihikini, wïhikauku ma Jou Madutu Ai dodadi. O naguna womorene deo nyawa manga bodito, maraioka wamake o hukumanga.

⁶O nyawa yäpoperekioka manga hininga ganga manga ngohaka de manga danongo; o ngoha-ngohaka yahiamo-amoko genangala manga dimono.

⁷O nyawa de manga horomati ipatutua wahetongo o tengeluku mademo-demo; o nyawa bodo ipatutua wahetongo o demo-demo iböbaraguna.

⁸Naga o nyawa yatobote o tiwi o uru mabobokumu yakunu yadiai ihö hera-heranga; deo tiwi o uru mabobokumu hagala moi-moi yakunu idadi.

⁹Nako nönahihu o nyawa inï igo, nahi maaf manga howono yadodiai onanga. Natumomiki o howono duga-duga natoaka nia hobata.

¹⁰Moi o dodaare iholoi mamangarati mangale o nyawa yaoa-oa manga akali ngaroka deo gogohara maratuhu moi o nyawa bodoika.

¹¹O nyawa madorou salalu wapuda o huru-hara, mä o honenge iboa unangika hokä o huhuloko koiwa aihayanga de aidora.

¹²Iholoi yaoa homakamake de o beruang ma ayo ihihihangoka mangohaka, ngaro deo nyawa bodo wototasibu de aibodo.

¹³O naguna wabalahi o oa deo dorou, o dorou ma aha koyakunua ihihupu aitauino.

¹⁴Yamulaenge o ributu ganga hokä niobelenga o akere mangekomo; karana gënanga nimadohuku ihira dei mulaenge o ributu.

¹⁵Ma Jou wädohata o nyawa yahihowonua o nyawa yososetiaua, deʼ yahihowono o nyawa yahowo-howonua.

¹⁶Parasuma o nyawa bodo wamata-mataka aitiwi walingiri o barija, hababu ünanga aidibanga koiwa madumuloa.

¹⁷Womatengo aihobata salalu wosetia ai dodiawoika, mä womatengo airiadodoto womahimoteke watagongo aihuha.

¹⁸O nyawa wojäjaji womahimoku aidodiawo ainagimi ganga o nyawa bodo.

¹⁹O nyawa wöigo-igo o baradohaika, wöigo imateke ributu. O nyawa manga uru ilamo-amoko yalingiri o gilianga.

²⁰O nyawa womatengo wotipu-tipu aha woutumua, o nyawa aiakiri ihago aha wamake o bodito.

²¹Imamake o ngohaka yofuma-fuma mamangarati yamake o hininga mahuha; yodadi o ngohaka ibodo-bodo manga ama yahidoakua o morene.

²²O hininga imore-morene o röehe yatumuloa; o hininga kaihühuhaika yatobiki o hininga mabuturungu.

²³O hakim worusi-rusi, watarima o tiwi o uru mabobokumu warahasia, deʼ kowohidagiua o adili.

²⁴O nyawa womö mangarati aidumutu ganga mangale wamake o barija, mä o nyawa bodo aidumutu hohiöriki madiaiua.

²⁵O ngohaka wobodo-bodo wïdiai o huha ai ama, deʼ ngoi ayo amihininga wahuha.

²⁶Ipatutua niwibobangu o nyawa wahowo-howonua, deʼ ipatutua niwituku o nyawa aihininga irorahai.

²⁷O nyawa ai dibanga idoto-doto, wotemo iwöeua. O nyawa wobobarija salalu ai hininga irïdi.

²⁸Womatengo o nyawa bodo aha yatobote wosawaro deʼ wobarija nako ünanga woma rirïdi de aiuru watamunu.