Read Tobelo O AMSAL 18 Bible Online

O AMSAL 18 - Tobelo bible

O AMSAL 18

¹O nyawa wohi tinga-tingaka ai diri de o nyawa mahomoa mamangarati wohiakunu ai diri mahiretedika; moi-moi manga damake o nyawa mahomoa ünanga wöngelo.

²O nyawa bodo wöigoua iwihidöaka o mangarati; ünanga duga-duga wöigo wohiade-ade aihininga madol̄a.

³O baradoha deo hikauku itagi imanïki; nako itorouoka, maraioli yahohedu.

⁴O nyawa manga demo-demo yakunu marupa o barija matiti malukuku hokä o ngöto ilago-agomo, mamäta hokä o akere ihähahuru.

⁵Itorou homahiganu o nyawa yososetiaikaua, deʼ hätuku o nyawa manga howono koiwa-iwa.

⁶Nako o nyawa bodo wotemo-temo, ünanga wapuda o ributu deʼ wogahoko iwigohara.

⁷O nyawa bodo aidemo wawedere aidiri; ünanga iwiliko aidemo-demo mahirete.

⁸O fitana gënanga ihemoro majame; o nyawa yöigo yal̄ahiri.

⁹O nyawa wolölegaikaua ai manarama imatero mamodorou deo nyawa yöigo-igo yakilianga.

¹⁰Ma Jou gënanga hokä o candi ikökua-kuata; genangika o nyawa aihininga iriko-rikoto woiki deʼ wamake o ngï isosanangi.

¹¹Mä o kaya manyawa watobote aiarata iwïgoana ünanga hokä o bebeno o mehele ikökurutil̄e deʼ ikuata yakilolitino o kota.

¹²O nyawa aihininga ikökurutil̄e aha iwiotaka, o nyawa aihininga ipöpoluluku aha iwihoromati.

¹³Woihenowahi dewohaluhu ganga o nyawa bodo ai manarama deʼ itorou.

¹⁴Mangale aimau wowango, wakunu watagongo o huha deo hangihara; aimau gënanga ihihanga, ihihangö hagala ai ngonganono.

¹⁵O nyawa aiakali maoa-oa salalu wökiriti madudungu mangale o ganako; o nyawa yososawaro salalu wönahihu wamake o dodotoko.

¹⁶O ngongike yahelenga o ngekomo deʼ o nyawa yängotaka o nyawa yolago-agomika.

¹⁷Wotö temo-temo madodihiraka o juruhakimi magoronaka salalu yamake hokä itiai, mä manyonyata imulaenge yauji nako woboa ailawani.

¹⁸Deo undi, o ributu yakunu ihibobaha, maboboloioli o galawani o nyawa yokokuaha manga hidogoronaka mayakunu yatiai.

¹⁹O riadodoto ai hininga yahiri-hirioka iholoi ihuha iwïdigika ngaro deo kota malago-agomo; o ributu hokä o kota mangorana malago-agomo madadatoko dema bebeno meheloka.

²⁰Mangale o demo-demo yaheto-hetongo naga mahasili kokiani yamao.

²¹O akiri dema kuaha mangale ihihalamati o wowango ekola yakilianga; o nyawa kokiani watagongo aidemo mahasili.

²²O nyawa yamömake-make o hekata, yamake o utumu, o hekata ganga o ngongike ma Jouino.

²³O mihikini manyawa wogahoko dema adati; o kaya manyawa wohaluhu womarohu-rohu.

²⁴Naga o hobata wososetiaua, nagali iholoi yotigi deo riadodoto.