Read Tobelo O AMSAL 19 Bible Online

O AMSAL 19 - Tobelo bible

O AMSAL 19

¹Iholoi yaoa o mihikini manyawa manga wowango iriko-rikoto, ngaro deo nyawa bodo yöigo-igo yoeluku.

²O magawe koiwa maganako, itorou, o nyawa imatö tai-taiti aha yodiai o howono.

³O nyawa wohirugi aidiri mahirete mangale aibodo de ipaha ma Jou wihihowono mangale o hali gënanga.

⁴O kaya manyawa aidodiawo salalu yodogo; o mihikini manyawa iholoi iwimalaika aidodiawo.

⁵O nyawa woelu-eluku o juruhakimoka, ahai wïrehenua o hukumanga.

⁶Moi-moi o nyawa ihidailako yol̄ë o hininga duru iparalu; mata-mata o nyawa yomau imakohobata deo nyawa manga hininga imura-mura.

⁷O mihikini manyawa iwïlegaikaua ai riadodoto, okia hongoli ai dodiawo. Ngaro hokokia ünanga wohidailako, ünanga wakunua wätauru önanga.

⁸O naguna wanïki o ganako, wödora aidiri; deʼ o naguna wöhininga okianaga woma doto-dotoko, aha woutumu.

⁹O nyawa woelu-eluku o juruhakimoka marai aha iwihukumu deʼ iwibinaha.

¹⁰Ipatutua o nyawa bodo wowango dema boboloi, deʼ ipatutuali o gilaongo wäpareta yokokuaha.

¹¹O nyawa wobobarija wakunu watumungu aidohata. Unanga iwihigogiriri karana wolegaikaua o nyawa manga howono unangika.

¹²Ma koano ai dohata hokä o singa ipoaka; ma koano ai oa hokä o dumunitara yapehaka iwö wango-wangoil̄e.

¹³O ngohaka wobodo-bodo wakunu wïbodito ai ama. O hekata möigo-igo mongamo de motetemo hokä o akere i tututu ibobaretiua.

¹⁴O tau deo arata yakunu hamake o dimonino, mä o hekata mobobarija ganga o ngongike ma Jouino.

¹⁵Imatotebeturu yadiai o nyawa duru yakioko, deʼ mabobaha wototebeturu aha iwihahini.

¹⁶O nyawa yihingou-ngounu ma Jou Madutu Aipareta aha yohalamati, o nyawa yahoromatiua aha yohonenge.

¹⁷Häriwo o mihikini manyawa hokä hihibau ma Jouika; dahaö ma Jou aha wabalahi.

¹⁸Natatoro nohidodiai aningohaka nako kanagahi o ngonganono; nako kowali, mamangarati ngona nöigo manga bodito.

¹⁹Mal̄aikala o nyawa itaiti wongamo mahasili mahirete wamao. Nako ngona nïriwo ünanga duga-duga ngona nödogo ai dohata.

²⁰Nako ngona nöigo nomädotoko deʼ noihene o nasihati, aha ngona nodadi o nyawa yobobarija.

²¹O nyawa mangangöe manga hidailako madatoro, mä idadi duga-duga ma Jou Aiputuhu.

²²O biaha yöngano-nganono o nyawaino genangala aisatia. Iholoi yaoa homihikini ngaro de hodadi hoelu-eluku.

²³Nïhoromati ma Jou, done aningango isanangi; ngona aha namao nosanangi denobebasi deo bodito.

²⁴Naga o nyawa o goguleua aidebeturu; yöhugara o inomo aiuruoko maünanga woluku.

²⁵Nako o nyawa yoede-edenge yähukumu, o nyawa koiwa-iwa manga ganako yamake o dodotoko. Nako o nyawa aiakali maoa-oa iwihidaaere ünanga aha kaidogo wobarija.

²⁶O ngohaka wäaniaya dewäduhu aidimono ganga o ngohaka wahimal̄e-mal̄eke deʼ itorou.

²⁷Ahingohaka, nako ngona noluku nomä dotokoli, ngona aha nawohanga okianaga nomä doto-dotokoka.

²⁸Ihidöaka o hakihi ielu-eluku, mamangarati yolegaikaua o hukumu; yahibodito o nyawa, o nyawa madorou yamao ihemoro.

²⁹O nyawa bodo aihininga ikökurutil̄e maraioka aha iwigohara.