Read Tobelo O AMSAL 2 Bible Online

O AMSAL 2 - Tobelo bible

O AMSAL 2

¹Natarima hagala ahinasihati, ahingohaka, deʼ kokiani nöhohininga salalu hagala ahinasihati ngonaika.

²Kokiani nohidodiai okianaga ibobarija deʼ nohidailako nomangarati.

³Ya, ahingohaka, nomahihuha la de anidibanga idoto-doto deʼ nogahoko o mangarati.

⁴Kokiani nalingiri gënanga hokä nolingiri o gurasi, deʼ nakinïki gënanga hokä nakinïki o arata igögogonika o tonakoka.

⁵De hoko gënanga ngona aha nohiöriki okia mamangarati ma Jou himodongo deʼ ngona aha namake o ganako mangale ma Jou Madutu.

⁶Ma Jou ganga wohidoa-doaka o barija; Unangino ganga o nyawa yamake o ganako deʼ o mangarati.

⁷O nyawa manga hininga itebi-tebinika deʼ koiwa mahowono, Wahidöaka o roriwo deʼ o gogoana.

⁸Ma Jou wägoana hagala o nyawa yoadi-adili, deʼ wägoana önanga iwïhohininga Unanga.

⁹Nako ngona nohihimoteke ngohi, ahingohaka, ngona aha nohiöriki okianaga iadi-adili, o hininga iriko-rikoto deʼ o oa. Ngona aha nohiöriki sarakia madodagi kokiani ngona nowango.

¹⁰Ngona aha idadi nosawaro, deʼ aniganako aha yasanangi anihininga.

¹¹Animangarati deʼ anisawaro aha inïgoana,

¹²inoli initatoko ngona nanïki o wowango itotorou madodagi, deʼ nohitingako nakökurutika anidiri deo nyawa manga uruitotorou.

¹³Onanga yoluku yanïki o wowango maoa madodagi; önanga yal̄e o ngekomo ihohuhutu deʼ iomanga o baradoha.

¹⁴Onanga yamake o sanangi toönanga manga manarama itotorouino.

¹⁵Onanga yorusi-rusi deʼ toönanga manga wowango madodagi ipeleoko.

¹⁶Ngona, ahingohaka, aha yakunu naoluku o ngoheka monaka-nakali amibobaja mohidailako moninonai de ami demo-demo mamuti-mutiti.

¹⁷O ngoheka gënanga mosetiaua amirokatika, deʼ mawohangoka amijaji ma Jou Madutuika.

¹⁸Nako ngona noiki ami tauika mamangarati ngona nodumutu o honengika. Noiki dokengika kaimatero dika de noiki yohone-honenge manga duniaika.

¹⁹O nyawa yoi-oiki munangika komaiwa naga imakilioro yodumutu o wowango mangekomika.

²⁰Karana gënanga, ahi ngohaka, namoteke ahi kalakuanga maoa-oa, deʼ kokiani nowango namoteke ma Jou Madutu Ai mau.

²¹Hababu o nyawa yowöwango-wango yamoteke ma Jou Madutu Ai mau, enagënanga manga hininga itebi-tebini, önanga ganga aha yogogere o berera ma Jou wahi jäjaji.

²²Mä o nyawa madorou deʼ yoböbaradoha aha ma Jou Madutu wahikaweli yohupu o bereraino gënanga, hokä o momo o tonakoka deyarahuku.