Read Tobelo O AMSAL 20 Bible Online

O AMSAL 20 - Tobelo bible

O AMSAL 20

¹O daluku ikua-kuata deihauku yadiai o nyawa yanakoua o adati deʼ yogigoro. Yobodo o nyawa yoke-okere hiädono yädaluku.

²Ma koano aidohata hokä o singa ipoaka; o nyawa yamömomiki aidohata mamangarati yabodito manga diri mahirete.

³Duga-duga o nyawa bodo yöigo imateke ributu; o jako ihöhailoa ganga homahitingaka o ributu.

⁴Wototumule iwitotebeturu wakarajangua aidumule maörahoka; mabaha o gugutuku maörahoka aitonaka mahasili okia-kiaua.

⁵O nyawa manga hininga madol̄a matero-tero o humu maakere ilöluku-luku; mä o nyawa de manga mangaratioka yakunu yauiti.

⁶Manga ngöe o nyawa imahetongo ganga nanga dodiawo mä igou-goungu yosatia ihuha hamake.

⁷O ngoha-ngohaka youtumu nako manga ama yaoa de ai wowango irikoto.

⁸Nako ma koano wogogeruku o juruhakimi makuruhioka, ünanga wakunu wamake mata-mata itotorou.

⁹Boteka naga o nyawa wakunu wotemo, ”Ahihininga itebini, ngohi tobebasoka deo baradoha?”

¹⁰Ihi tiba-tibanga deʼ o duduga irusi-rusi ma Jou wasanangiua.

¹¹O ngohaka aimanaramino yakunu yanako aikalakuanga yaoa deʼ irikoto.

¹²O ngauku mangale hoihene deʼ o lako mangale hopulono, hinoto ma Jou wohidadi.

¹³O nyawa yöigo-igo imaidu aha yomihikini. O nyawa yämomagawe yokarajanga manga inomo iwöe.

¹⁴Woija salalu wotaiana mangale maija mahali. Mä nako waijaka, ünanga aihininga ilamoko maijaino.

¹⁵O demo-demo de maganako iholoi maragane ngaro deo gurasi deʼ o intan.

¹⁶O naguna womau watagongo o nyawa mahomoa manga nagimi, i patutu yal̄ë aikiahonanga hokä aijaji madodanu.

¹⁷O arata o tipu mahasilino, madodihiraka mahemoro, mä deipaha hamao hokä o helewo o karo.

¹⁸O datoro ihidödailako mangale o dibanga; mangale gënanga, uha nimanarama de niadiaiua o datoro nihi dodiaino.

¹⁹O nyawa yosanangi yahiade-ade o nyawa mahomoa, yakunua yagogono o rahasia; uha nimateke dodiawo deo nyawa yotö temo-temo iwöeholi.

²⁰O nyawa wälololai ai dimono, aha ihihanga ai ngango hokä o hilo ihone-honengoka o hagahutuoka.

²¹O arata madodihiraka yamake dema japati; mabaha inyata o barakatiua.

²²Uha niabalahi o dorou deo dorou; niwingaku ma Jouika, Unanga aha winïriwo.

²³Ihi tiba-tibanga deʼ o didibanga mahelewo irusi-rusi ma Jou wasanangiua.

²⁴Ma Jou wohitantuoka o nyawa nanga wowango mangekomo o duniaka nënanga; mahababu gënanga o nyawa yakunua homangarati nanga wowango mangekomo mahirete.

²⁵Napikiri nohidodiai ihira de nohijaji o huhuba ma Jouika. Yakunu idadi aha ngona noma toduba maduruino.

²⁶Ma koano wobobarija wohiöriki o nagona o nyawa madorou; ünanga aha wähukumu önanga koiwa maapongo.

²⁷O nyawa nanga hininga madararono marupa o dararono ma Jouino. Yatararono o hininga madol̄a yangodumu.

²⁸Nako ma koano wopareta de aidora, aihininga irikoto, deʼ iadili, done ünanga aha kahirahi wokuaha.

²⁹O gikiri magö yäheranga karana manga kuata, deʼ o dimo-dimono yähoromati karana manga dudutu.

³⁰Naga mamoiani yamao-maoka mamali-mali yaehe o dorou, deʼ yatebini o nyawa manga hininga.