Read Tobelo O AMSAL 21 Bible Online

O AMSAL 21 - Tobelo bible

O AMSAL 21

¹Hokä ma Jou watatoro o ngairi ma akere hupaya ihahuru, i moteke Ai mau, hoko genangö Unanga watuda ma koano aidibanga.

²O nyawa manga manarama moi-moi yakunu idadi yaoa imoteke aibubulono mahirete magoronaka, mä ma Jou dika wögelenga aihininga madungutu.

³O manarama iadi-adili deʼ itiai iholoi ma Jou iwi sanangi ngaro de hagala o huhuba.

⁴O nyawa madorou gënanga wobaradoha, karana iwi kuaha ai hininga magurutil̄e deʼ aiedenge.

⁵O nyawa yämomagawe manga hidailako madatoro yägao okianaga dema boboloi; okianaga yodiai imatai-taiti mabaha yahidukuranga.

⁶Yamake o kaya deo hininga irikotua itaiti ihihanga deʼ yaao o nyawa o lungunu mabaitika.

⁷O nyawa madorou woluku wanonu o tita; ünanga wohangihara mangale koiwa aidora de aihayanga mahirete.

⁸O nyawa wahö howo-howono, itiko-tiko aingekomo; o nyawa maoa salalu ai wowango irikoto.

⁹Hogogere o lotenge malibukuoka iholoi isanangi ngaro de hogogere homa kataumoi deo hekata möigo homateke roributu.

¹⁰O nyawa madorou salalu wöigo wodiai o dorou; o nagonaika dika maünanga koiwa aidora de aihayanga.

¹¹O hukumanga o nyawa yoede-edengika idadi o dodotoko mangale o nyawa koiwa-iwa manga ganako. Nako o nyawa aiakali maoa-oa iwihidaaere, ünanga idogo wobarija.

¹²Ma Jou Madutu Duru wo Adi-adili wohiöriki okianaga idädadi o nyawa yososatiaua manga tau magoronaka. Unanga aha wäditila önanga hiädono önanga yobinaha.

¹³O naguna woluku wohigihene o nyawa yokökura-kuranga manga huha ihidaiana aha koiwilegaikaua nako ünanga mahirete wogahoko o roriwo.

¹⁴Hupaya ihihanga aigangamo deʼ aidohata, niwihidöaka o ngongike okianaga kania iu-iunu.

¹⁵Nako o adili ihidagi, done o nyawa maoa yamao yosanangi mä o nyawa madorou yamao hokä o huha.

¹⁶O nyawa wamote-motekua o wowango maoa-oa madodagi, marai aha wadono o nyawa yohone-honenge manga duniaika.

¹⁷O nyawa wöigo-igo womahi sosanangi aha kahirahi wokuranga; o nyawa wöigo-igo womahiliba-liba aha koidadiua wokaya.

¹⁸Nako ma Jou wähukumu o kawaha, ko o nyawa maoaua, duga-duga o nyawa madorou yamake o huha.

¹⁹Iholoi yaoa hogogere o tonaka ikokakahaka, ngaro de hogogere de nanga hekata yöigo yotetemo deʼ yongamo-ngamo.

²⁰O nyawa wososawaro kahirahi o kiaua wokuranga deʼ wokaya; mä o nyawa bodo wohigogule aiarata.

²¹O naguna wohidailako hupaya o adili deʼ o dora deo hayangi wadiai, aha wamake o sanangi, o horomati deʼ o umuru ikurutu.

²²O nyawa wososawaro wakunu waora o kota yögoa-goana o tentara yopoputurungu; ünanga waruba hagala o bebeno o mehele önanga yöngano-nganono.

²³Mangale homahirehene o huha deo hangihara, kokiani homahidodiai de nanga demo-demo.

²⁴O nyawa yoede-edenge deʼ manga hininga ikökurutil̄e yöigo yohohedu deʼ o adati yanakoua.

²⁵Yototebeturu yolu-oluku yokarajanga; yatoma manga diri mahirete de manga nahihu.

²⁶O wange magurutu ünanga duga-duga wapikiri mangale okia ünanga wonönahihu. I idulu yaino, o nyawa aiwowango iriko-rikoto wakunu wohidöaka de maboboloi.

²⁷Ma Jou wosanangua deyososatiaua manga huhuba, maboboloi nako ihihuba de manga dungutu ihowono.

²⁸Woelu-eluku aihakihi aha koyangakua; mä o nyawa wohiori-oriki o perekara madodagi aidemo-demo aha yatarima.

²⁹O nyawa aihininga iriko-rikoto wangaku aidiri; o nyawa madorou aibiono ipirini.

³⁰Koiwa naga o sawaro, o pikiranga idoto ekola o barija yakunu itongohono ma Jou Aihimangoka.

³¹Ngaroka o parangi yasadiauku deo kuda ihipoparangi ihitötantu mautumu ganga ma Jou.