Read Tobelo O AMSAL 22 Bible Online

O AMSAL 22 - Tobelo bible

O AMSAL 22

¹O romanga maoa iholoi maragane ngaro deo arata mangöe-ngöe; o nyawa inädora iholoi yaoa ngaro de inähidöaka o gurasi deo haaka.

²O nyawa kaya deʼ o nyawa mihikini manga hali moi imaketero; ma Jou dika wahidadi önanga mata-mata.

³O nyawa wobobarija nako wölega-lega o bodito womahirehene; o nyawa bodo wotagi gila-gila daha iwitapal̄u o bodito.

⁴O nyawa wïmodo-modongo ma Jouika deʼ wohitipokouku aidiri, aha woutumu, okia-kiaua wokuranga deʼ iwihoromati.

⁵O dadagoko deʼ o modoi yamake o nyawa yorusi-rusi manga ngekomoka; nomahitingaka nakökurutika mata-mata gënanga nako ngona nöigo nohalamati.

⁶Nïdotoko aningohaka womatengo o wowango ipatu-patutu madodagi mangale ünanga, done hiädono iwipereki ünanga wowango hoko gënanga.

⁷O kaya manyawa yäkuaha o mihikini manyawa; o nyawa yahiböbau-bau yäkuaha o nyawa yoböbau-bau.

⁸O nyawa yodödato-datomo o rusi aha yautuku o bodito; mabaha ai kuaha mangale okianaga wodiai ai hininga mahuka aha ihihanga.

⁹O nyawa yaoa-oa ai hininga ma Jou wihibarakati, karana ünanga wohikodoku o rijiki deo nyawa yokura-kuranga.

¹⁰Nia duhu o nyawa yöigo-igo yahikauku, done o ributu, o haturu deʼ imateke hohohedu imatogumu.

¹¹O nyawa wöigo-igo ai hininga itebini deʼ ai demo imutiti, aha wodadi ma koano ai hobata.

¹²O nyawa yorusi-rusi manga tengeluku yakilianga, ma Jou wögoana hupaya o ganako madiai kahirahi yapaliara.

¹³Wototebeturu wöigo wogögogere o tauoka; ünanga wotemo, ”Naga o singa maporetoka, ngohi yakunu ihigoli o ngekomo mahidogoronaka.”

¹⁴O ngoheka manga röehe yahuku-hukunu manga bobaja marupa o modoi; o nyawa ma Jou wängamo-ngamo yohodoa magogoronauku.

¹⁵Hoko gënanga iböto o ngoha-ngohaka yadiai hagala o hali ibodo-bodo, mä o gogohara yakunu önanga yädotoko yangali manga kalakuanga.

¹⁶O naguna womau wodadi kaya de wätuku o mihikini manyawa de wahidöaka o ngongike o nyawa dema ena-enangika mabaha aha wohangihara dewo mihikini.

¹⁷Noihene ngohi aha tonïdotoko ngonaika o nyawa yososawaro manga nasihati. Nöhininga nohidodiai ahidodotoko.

¹⁸Ngona aha nosanangi nako ahidodotoko gënanga nagogono anihininga magoronaka. Karana de hoko gënanga ngona nomahidiainoka nako ngona nomau napake.

¹⁹Ngohi tonihidotoko ngonaika örahanënanga karana ngohi töigo ngona de aningongakuoka ma Jouika.

²⁰Yamoruange o nyawa yososawaro manga ngaje-ngaje tatulihoka mangale ngona — yososawaro manga ngaje-ngaje gënanga naga demaganako deʼ o nasihati maoa-oa;

²¹deʼ aha inïdotoko ngonaika okianaga igou-goungu itiai. Dahaö, nako ngona inileha, ngona yakunu nohidöaka o bobaluhu yakokorona.

²²Uha nihirugi o mihikini manyawa, duga-duga karana ünanga wobole; deʼ o juruhakimoka uha naora o nyawa okia-kiaua wakunu ai haku.

²³Hababu, ma Jou wöriwo toönanga manga perekara deʼ wal̄ë o nyawa yätuku-tuku önanga manga jiwa.

²⁴Uha nïdodiawo o nyawa wöigo-igo wongamo deʼ itaiti ai awunu idoa.

²⁵Done ngona aha nïduru ünanga, deʼ yakunokaua nahohihanga o biaha gënanga.

²⁶Uha nojaji mangale natagongo o nyawa mahomoa manga nagimi.

²⁷Done nako ngona nakunua namata nafangu, aningidu-ngidu mangï ma aha yal̄ë.

²⁸Uha hakali-kali naheloro o tonaka mabatingi ihi totatapuoka ani ete de ani tohora.

²⁹Ngona nïmakeoka o nyawa wakunu wadiai aikarajanga? O nyawa gënanga aha iwihikarajanga o kokoano manga kadatoka, ko o nyawa biahaua manga tauoka.