Read Tobelo O AMSAL 23 Bible Online

O AMSAL 23 - Tobelo bible

O AMSAL 23

¹Nako ngona nogogeruku nol̄omo deo nyawa womatengo yolago-agomo, kokiani nomähininga ünanga o naguna.

²Nako ngona de aninahihu nol̄omo ilamoko, natumungu aninahihu gënanga.

³Uha nohorodo o inomo ihöhemo-hemoro ihidodiaiuku, mudukua ünanga womau wonï budi ngona.

⁴Uha nomahuha de nomakangela mangale idadi nokaya. Kokiani namal̄a anidungutu gënanga.

⁵Hababu o lakodadawi dika aniarata yakunu ihihanga, ënanga hokä demagahuhuoka deʼ ihoho o gitawail̄e hokä o totaleo o rajawali.

⁶Uha nol̄omo deo nyawa yototalaa. Uhali nönahihu aiinomo mahemo-hemoro.

⁷Hababu, ünanga aha wonitemo, ”Naino hol̄omo; ika tanu nomä dogoli,” enahioko aidungutu hoko genangua. Unanga aiuru dema mutiti, mä aihininga haramoioli.

⁸Done okianaga nalahi-lahiroka ngona nohingunangoli, deʼ mata-mata anidemo imuti-mutiti unangika koiwa mafaida.

⁹Uha nänasihati o nyawa bodo; ünanga aha wölegaikaua aninasihati gënanga.

¹⁰Uha hakali-kali naheloro o tonaka o puhaka mabatingi ekola nal̄ë o ngohaka o gohihi manga tonaka.

¹¹Hababu, ma Jou ganga manga roriwo wokua-kuata Unanga dika aha wäriwo wonilawani ngona.

¹²Nöhininga nohidodiai aniguru aidodotoko deʼ nomädotoko duru nawöe-wöe.

¹³Uha nodododato nïdotoko aningohaka. Nako ngona nïgohara ünanga deo gogohara, ünanga aha kowohonengua,

¹⁴aha iholoi wohalamati.

¹⁵Ahingohaka, ngohi duru tosanangi nako ngona nobarija.

¹⁶Ngohi ahihininga ilamoko nako toihene nohi demo o demo-demo duru yakokorona.

¹⁷Uha ani hininga isanangiua o nyawa baradohaika.

¹⁸Nihingounu salalu ma Jou Madutuika hupaya anihimangika namake yaoa, deʼ ani ngonganono koihihangua.

¹⁹Noihene, ahingohaka! Kokiani idadi nobarija. Natailako nagou-goungu aniwowango madodagi.

²⁰Kokiani uha nododiawo deo nyawa yädalu-daluku ekola o nyawa yokokal̄il̄u,

²¹hababu önanga aha idadi yomihikini. Nako ngona kanomä idu-idu dika, done itedekanokaua ngona aha nomahi pakeanga makäkakihi.

²²Nihingounu aniama; hababu, nako unangua ngona koiniwa. Nako ngoni ayo imiperekioka, kokiani nohidumutu ngona nomihoromati münanga.

²³O dodotoko madiai, o barija, o dodotoko mahasili, deʼ o mangarati — mata-mata gënanga ipatutu haija, mä duru demaraganeoka holi mangale hahukunu.

²⁴O ama womatengo aha womorene, nako aingohaka de aikalakuanga maoa-oa; ünanga aha aihininga ilamoko nako aingohaka wobarija.

²⁵Tanu aniama de ngoni ayo manga hininga ihi amoko ngonaika; tanu mosanangi o ngoheka moni hingoha-ngohaka ngona.

²⁶Natailako nohidodiai deʼ nomäduru ahiwowango, ahingohaka!

²⁷O ngoheka yonaka-nakali manga röehe yahuku-hukunu ganga o dadagoko dema bö boditoka.

²⁸Onanga inïdamaoka hokä yoora-ora deʼ yadiai manga ngöe o nau-nauru yohowono.

²⁹Ngona nohiöriki okianaga idädadi o nyawaika yoke-okere o angguru ilamokoholi, deʼ haramangöe yatai-taili o daluku ibiha-biha? O nyawa geünanga wohangihara deʼ wamao mahuha. Unanga salalu imateke ributu deʼ wotaiana wohuha. Ai lako itokara deʼ ai röehe yal̄abo-l̄abo, enahioko mata-mata gënanga wakunu wahohihanga.

³¹Uha nohigumal̄a o angguru inibobaja, ngaroko maangguru mamodokara anihininga yadaene deʼ napulono ileletongo o galahi magoronaka de namao majame iwohama aningomahuku.

³²Yarehe mangorumino ngona namao hokä ini golioka o dodiha ibiha-biha.

³³Ani lako hokä o murumu ipohuku, anidibanga iburakiti deʼ aniuru ihoreto.

³⁴Ngona namao hokä naga o kapa maliaro matubuoka o ngöto mahidogoronaka; anihäeke iloliti deʼ ngona kano lebo-leboto.

³⁵De ngona aha notemo, ”Marupahi ngohi ihigohara deʼ ihipoka o nyawa, mä ngohi takunua tomä hininga okianaga idädadioka. Uwee, ngohi duru ihikioko! Ngohi iparalu tokeroli!”