Read Tobelo O AMSAL 25 Bible Online

O AMSAL 25 - Tobelo bible

O AMSAL 25

¹De ipaha nënanganaga muruono naga o Salomo wososawaro aingaje-ngaje mahomoa yatötuli-tulihi yopopegawe o Hizkia, o Yehuda manga koano aikadatoka.

²Ma Jou Madutu iwihimulia karana okianaga Warörahasia; ma koano iwihoromati karana okianaga waku-akunu wohitararono.

³Hokä o ngöto malago-agomo ilöluku-luku deʼ o dihanga magögurutil̄e, hokogenangoli ma koano aidibanga hakunua hödumunu.

⁴Kokiani yatebini ihira o haaka mapeseke, dahao ihöhailoa yakunu yadiai yogögao-gao manga giama.

⁵O kadatoino yononasihati madorou niatingaka niakökurutika, dahao o popareta ibitumu mangale o adili.

⁶ Nako nïhimanga ma koano kokiani ani hininga itipokouku, uha nomaedenge hokä o nyawa manga pangkati magögurutil̄e.

⁷Inihuloko nahidöaka aningï manga pangkati ihoholoika Iholoi yaoa inihuloko nodoa o ngï ihoholoil̄e mahoromati.

⁸Uha nomataiti nao aniperekara o juruhaikimika; hababu, nako ipahaika ngona igoungu nahowono okiali ngona nakunu nadiai?

⁹O mangarati nimahowono de anidodiawo, niatiai duga-duga dede ünanga, mä o nyawa mahomoa manga rahasia uha nohi ade-ade.

¹⁰Hababu, done ngona ininonako hokä o nyawa manga uru ipida-pidaha deʼ ani romanga ipeseke ho ani ngango maumuru.

¹¹O gamake ihi höhupu-hupu maöraha duru yakokorona hokä o hohoko o gurasi o dodai o haaka magoronaka.

¹²O nyawa yososawaro manga hidaaere o nyawa yomau yoihe-ihenika, hokä o ali-ali o gurasi ekola ihipoporomu o gurasi.

¹³O huhuloko wososatia, yadiai wihö hulo-huloko wosanangi, hokä o akere mamata mangale woutu-utuku ai dumuleoka.

¹⁴Hagala o jaji ihi nyata-nyataua, hokä o lobi deʼ o hidal̄oko koiwa-iwa ma awana.

¹⁵O sabari ihidomoteke o demo-demo yaböbole-bole o nyawa yokokuaha yakunu ihi goungu, deʼ yawedere mata-mata o manarama ilawa-lawani.

¹⁶Uha nol̄omo o madu na amo-amoko; done idadi yatoka nowunanga.

¹⁷Uha kalioli naika-ika nima kokadateke aitauika done ünanga wonïgihounu deʼ wonï dohata.

¹⁸O galaki ielu-eluku yakunu yähohonenge, hokä o oworo, o boboha ekola o toimi madoto idödoto-doto.

¹⁹Nïngaku wososatiaua o huha maorahoka ganga hokä niatedama de ani ingiri igiwi-giwioka ekola nomädagi de ani l̄ou isuga-suga.

²⁰Honyanyi mangale o nyawa yoduka-duka hokä homahekonoka o dumamata magoronaka hokä o suka hohituagi manga naboika.

²¹ Nako ani haturu iwihahini, nihidöaka o inomo wol̄omo; deʼ nako ünanga aikiriti madudungu, nihidöaka ünanga o akere wokere.

²²De hoko gënanga ngona nodiai ünanga iwimal̄eke deʼ ma Jou aha wonihibarakati.

²³O koremie maraioka iao o awana; hoko genangoli o nyawa kahiade-ade madorou maraioka yapuda o gangamo.

²⁴Hogogere o lotenge malibukuoka iholoi hosanangi ngaro de hogogere o tau moi de o hekata moigo-igo o ributu.

²⁵Hodahongo o abari ma oa-oa o berera magögurutino hokä haokere o akere mamata maöraha nanga kiriti madüdudungoka.

²⁶O nyawa maoa imahimoteke o nyawa yososatiaikaua hokä o akere malako igawa-gawa ekola hokä o humu ipese-peseke.

²⁷Itorou nol̄omo o madu iholoi, hoko genangö itorou hahetongo o higiriri iwöe.

²⁸O nyawa yaku-akunua yakuaha manga diri hokä o kota irubaka mabebeno o mehele yatö tumu-tumungu.