Read Tobelo O AMSAL 27 Bible Online

O AMSAL 27 - Tobelo bible

O AMSAL 27

¹ Uha noma edenge notemo-temo mangale yarehe mawange, karana ngona nohiorikua okianaga dahao aha idadi.

²Uha nohigiriri ani diri mahirete; mal̄aikala o nyawa mahomoa yadiai o hali gënanga, maboboloi o nyawa nänako-nakoua.

³O helewo deʼ o dowongi gënanga kaiuwinohi nako hohitero deo hininga mahiri yadodiai o nyawa bodo.

⁴O gangamo gënanga koiwa mahayangi deʼ yakilianga, mä hohimanga o hininga mahiri o nagona yataana?

⁵I holoi yaoa o hidaaere ihi totararonika ngaro deo dora yaiu-iunu.

⁶O dodiawo wogohara deo hayangi, mä o haturu wokololo deo biha.

⁷Nako inapunuhuku, o madu mahaoluku; nako inähahini, mamali-mali mahamao ihemoro.

⁸O nyawa wamal̄a-mal̄aika aitau, hokä o totaleo yamal̄aika maigutu.

⁹Hokä sarakia o minya mabounu ihemo-hemoro deʼ iböbou-bounu yasanangi o hininga, hoko genangö o dodiawo manga oa o jiwa yatumuloa.

¹⁰Uha nïwohanga anidodiawo ekola ani ama aidodiawo. O huha magoronaka uha nogahoko aniriadodoto manga bobatumu; nima kokukere itigi-tigino iholoi yobaraguna ngaro de aniriadodoto manga gögurutika.

¹¹Ahingohaka, kokiani ngona nosawaro, hupaya ngohi tosanangi deʼ yakunu tohaluhu nako ihihohedu.

¹²O nyawa yososawaro imahirehene nako yamake o bodito; o nyawa bodo wotagi wogila-gila deo bodito iwibanga.

¹³O naguna womau watagongo o nyawa mahomoa manga nagimi, i patutu yal̄ë to ünanga ai kianaga hokä aijaji madodanu.

¹⁴O naguna o ngoru-ngorumino de wïhoromati aidodiawo de aiilingi makuatil̄e, yapulono hokä wohi demo o lolai.

¹⁵O hekata möigo-igo o ributu hokä o awana mailingi o wange moi yatuhutu.

¹⁶Idadiua münanga imihuloko momarïdi, hokä o hidal̄oko yakunua hatumungu deʼ o igono magohaka yakunua hahokoto.

¹⁷Hokä sarakia o waja hohigihoro o waja hoko genangoli o nyawa imadotoko o nyawaika.

¹⁸O naguna wapaliara o gota mautu, aha waol̄omo mahohoko. Wolöleleani aha iwihoromati nako wïhayangi aituanga.

¹⁹Hokä sarakia o akeroka ihidumutu ani rupa, hoko genangoli ani hininga ihidumutu anidiri.

²⁰O nyawa hohone-honenge maduniaka, salalu naga o ngï; hoko genangoli o nyawa nanga nahihu koiwa mabatingi.

²¹O haaka deʼ o gurasi yauji o uku mangï magoronaka; iwinako o nyawa imoteke aijojobo o higiriri mahimangoka.

²²O nyawa bodo ngaroko iwigohara genangö makuata, ma aha koihihangua aibodo.

²³Napaliara aniaiwani o gigini nohidodiai,

²⁴karana o kaya aha koikakaliua, maboboloi o kuaha mangale yopareta ma aha hirahi kahiado-adonikaua.

²⁵O momo o dumuleoka deʼ o l̄okuoka yapoporo deʼ yatoomu mangale aniaiwani o gigini gënanga, mä itai-taitino gënanga iwango o momo mahungi.

²⁶Hagala aniduba-duba magogo ngona namake o pakeanga, deʼ o hidoku moi hagala anikabingi mabubukunu maijaino ngona yakunu noija o tonaka mahungi.

²⁷Hagala anikabingi mahomoaino ngona namake o huhu mangale anidiri deʼ anitau manyawa inoli hagala inïloleleani.