Read Tobelo O AMSAL 28 Bible Online

O AMSAL 28 - Tobelo bible

O AMSAL 28

¹O nyawa madorou yopiringana moiua yaginïki, mä o nyawa manga hininga iriko-rikoto, yobarani hokä o singa.

²Nako o hoana deo berera yobaradoha, yokokuaha imateke totagali; nako o tutuda wobarija, o hoana deo berera aha yotongohono deʼ kahirahi youtumu.

³Yokokuaha yatuku-tuku o mihikini manyawa hokä o awana mariki-rikimi yabodito yautu-utukino.

⁴O naguna wahaduliua o tita, wahiriwo o nyawa madorou; o naguna wohingounu o tita wälawani o nyawa manga kalakuanga itotorou.

⁵O adili yomangaratiua o nyawa yososatiaua, mä o nyawa iwihuba-huba ma Jou, igou-goungu yomangarati.

⁶Iholoi yaoa o mihikini manyawa manga hininga itebi-tebini ngaro deo nyawa kaya yorörusi-rusi.

⁷O goduru wohingou-ngounu o tita ganga o nyawa yobobarija. Mä o nyawa yododiawo de o nyawa ihigogogule manga arata wihimal̄eke aiama.

⁸O naguna wodadi wokaya wo l̄ë o tiwimabunga deʼ wotoomu o utumu duru wawöe-wöe, aikaya aha yäditifa o nyawaika de manga dora de manga haya-hayangoka o mihikini manyawaika.

⁹Nako ngona nohingounua ma Jou Madutu Aitita, ma Jou Madutu ma aha waemono anininiatika.

¹⁰O naguna wïbaja o nyawa aihininga iriko-rikoto hupaya wodiai o dorou, ünanga mahirete iwiotaka o dadagoko magoronauku. O nyawa aihininga madebi-debini aha iwihibarakati hiädono woutumu.

¹¹O nyawa kaya salalu wamao aidiri wobarija, mä o nyawa mihikini aihininga yaoa-oa wohiöriki demadiai ünanga o naguna.

¹²Nako o nyawa maoa wokuaha, mata-mata o nyawa yosanangi, nako o nyawa madorou wopareta o kawaha imangiunu.

¹³O naguna wagogono ai baradoha aka kowoutumua. O naguna womangaku deʼ waumo aha ma Jou wïdora.

¹⁴Nihoromati ma Jou salalu, done ngona aha noutumu. Nako ngona nïlawani Unanga ngona namake o bodito.

¹⁵O nyawa madorou yäkokuaha o nyawa yokö kura-kuranga, hokä o singa ipoaka ekola o beruang yaino yägoli.

¹⁶Wokokuaha wätuku-tuku o nyawa mahomoa, koiwa aiakali maoa; wokokuaha wödoha-dohata o rusi aha wopareta dema tao-taongo.

¹⁷Womatengo wotoma-toma aha wamao iwiginïki kahokogenangika hiädono aiajali; kaimatengo mayakunua ünanga iwitumungu.

¹⁸O nyawa yowö wango-wango koiwa mahowono aha yohalamati. O nyawa itiko-tiko manga ngango, aha yäotaka.

¹⁹Wototumule wokarajanga ihauku aha ai inomo iwiwedono; o nyawa yaumo-umo o oraha aha yahikuranga.

²⁰O nyawa manga hininga iröriko-rikoto aha ma Jou wahibarakati, mä o nyawa yonahihu itaiti yokaya yo otanua deo hukumanga.

²¹Itorou hoiriki dehotingaka o nyawa; mä nagaö o hakimi yomau yoadilua duga-duga mangale yamake o tiwi mahuhutulua.

²²O nyawa wokokalilu wönahihu itaiti wokaya; ünanga kowamaoua igoungu o mihikini itaiti yatapal̄u aidiri.

²³O nyawa wohidoa-doaka o hidaaere mabaha iholoi iwihoromati ngaro de o nyawa wöigo wahigogiriri.

²⁴O naguna wädohiki aidimono deʼ watobote gënanga o baradohaua, kaimaketero deyo tohi-tohiki mahomoa.

²⁵Hohikauku nanga diri mahirete yapuda o ributu; ngona iholoi noutumu nako nongaku ma Jouika.

²⁶O naguna wangaku aidamake mahirete, aiakali madumuloa koiwa. O naguna wanïki o nyawa yobobarija aidodotoko aha wohalamati.

²⁷O nagona yahidöaka o mihikini manyawaika aha koyo kura-kurangua. O nagona manga lako yatamunu o mihikini manyawaika okianaga yopöparalu, aha yädaene o lolai.

²⁸Nako o nyawa madorou yokuaha, o kawaha imangiunu; nako o nyawa madorou yobinaha, o adili manyawa aha watuda de aihininga mahuka.