Read Tobelo O AMSAL 29 Bible Online

O AMSAL 29 - Tobelo bible

O AMSAL 29

¹O naguna kahokogenangika woluku wamoteke nako iwinasihati, o öraha mamoiuku aha wobinaha deʼ yakunokaua iwihitiaioli.

²Nako o nyawa yoadi-adili yopareta, o kawaha yomorene. Mä nako o nyawa madorou yokuaha, o kawaha yamao yohangihara.

³O naguna wöigo o barijaika, wasanangi aiama aihininga. O naguna wädodiawo manga röehe yahöhuku-hukunu aha wohigogule aitiwi.

⁴Nako wokokuaha wöhininga wohidodiai o adili, aiberera ibitumu. Mä nako ünanga wohi amoko o tiwi, aiberera aha ikilianga.

⁵O naguna wägora-goraka aidodiawo o nyawa, o modoi wohiakana mangale aidiri.

⁶O nyawa madorou iwililiko ai baradoha, o nyawa aihininga iriko-rikoto wamao wosanangi deʼ woutumu.

⁷O nyawa maoa ihioriki o nyawa yobole-bole manga haku, mä o nyawa madorou yomangaratiua.

⁸O nyawa yöigo-igo yohohedu yakunu yaburakati o kota, mä o nyawa yobobarija yarïdi okianaga idadadi.

⁹Nako o nyawa wobobarija deʼ o nyawa bodo imaperekara, o nyawa bodo gënanga duga-duga wongamo wakaika wakaino dewoiete hiadono ipuda o gigoro.

¹⁰O nyawa yaoke-okere o awunu yadohata o nyawa manga hininga itebi-tebinika, mä o nyawa maoa yägoana.

¹¹O nyawa bodo yongamo ihi totararonuku mä o nyawa yobobarija yosabari deʼ yatumungu manga gangamo.

¹²Nako wokokuaha wöhohininga o tengeluku ma abari, ai pegawe aha idadi yatorou mata-mata.

¹³O mihikini manyawa womatengo deʼ witö tuku-tuku kaimatero; yahinoto ma Jou wahidöaka o lako la yamake o ngango macahaya.

¹⁴Nako ma koano wöriwo o nyawa yobole-bole manga haku, dema tao-taongo aha ünanga wopareta.

¹⁵O dodotoko mahasili deʼ o hidaaere yahidadi o nyawa yobarija. O ngohaka salalu yödomoteke aimau aha womihimal̄eke ngoi ayo.

¹⁶Nako o nyawa madorou yokuaha, o dodilakuru idogo-dogo. Mä o nyawa manga hininga iriko-rikoto aha yakunu yamake o nyawa madorou manga bodito.

¹⁷Nïdotoko aningohaka, done ünanga wohidöaka o hininga marïdi ngonaika, deʼ idadi o lolaru ngonaika.

¹⁸O hoana deo berera yamö make-makeua o tutuda ma Jouino idadi o hoana deo berera iomanga deo huru-hara. Youtumu o nyawa ihi ngou-ngounu ma Jou Aititaika.

¹⁹O gilaongo womatengo yakunua iwïdotoko duga-duga deo demo-demo. Unanga womangarati, mä aha kowö hiningaua.

²⁰Iholoi iwöe o nganono o nyawa yofuma-fumaika, Ngaroka deo nyawa yotemo-temo de yapikirua ihira.

²¹O gilaongo iwihi mote-moteke kawoma gö ikahi, mabaha aha idadi itogowini aihäeke.

²²O nyawa itötai-taiti yongamo yadiai manga ngöe o nyawa imateke ributu deʼ yobaradoha.

²³O nyawa manga hininga ikökurutil̄e aha yahitipokouku; o nyawa manga hininga itotipokouku aha yahigiriri.

²⁴O nyawa imateke rimoi yokarajanga de yotohi-tohiki, mamangarati yodohata manga dirimahirete. Nako ünanga wohi totararonuku o juruhakimoka, ünanga aha iwïgelenga o hukumanga. Mä nako ünanga woma rirïdoka dika, ünanga aha iwikorona ma Jou Madutu Ailolai.

²⁵Nömodongo o nyawa manga damake mabahaika o huha. Nïngaku ma Jouika, done ngona aha nosanangi.

²⁶Manga ngöe o nyawa yöigo o higiriri imälingiri yokokuahaika, mä wohidoa-döaka o adili, duga-duga ma Jouika.

²⁷O nyawa maoa yosanangiua de o nyawa madorou; o nyawa madorou yädohata o nyawa maoaika.