Read Tobelo O AMSAL 3 Bible Online

O AMSAL 3 - Tobelo bible

O AMSAL 3

¹Kokiani uha nawohanga okianaga tonï doto-dotokoka ngonaika ahingohaka. Kokiani nöhohininga salalu ahipareta,

²hupaya aniumuru ikurutu deʼ isanangi aniwowango.

³Kokiani ngona kahirahi nongaku deʼ nosetia ma Jou Madutuika deʼ nimahi kokanyawaika. Kokiani nöhininga gënanga deʼ nagogono anihininga magoronaka,

⁴ hupaya ngona inisanangi deʼ wonietongo ma Jou Madutu deʼ o nyawa.

⁵Kokiani nïngaku ma Jou Madutuika de anihininga magahumu, de kokiani uha nonganono animangarati mahirete.

⁶Kokiani nomä hininga ma Jouika hagala moi-moi nadodiai magoronaka, done Unanga aha wonihidumutu ngonaika o wowango maoa-oa madodagi.

⁷ Uha nomamao anidiri iholoi isawaro namoteke madiai dika; nihingounu ma Jou deʼ natingaka nakökurutika itotorou.

⁸Ani manarama gënanga aha idadi hokä o houru ngonaika yatötogu-togumu aniroehe deʼ yasanangi anihininga.

⁹Nïhoromati ma Jou de nohihuba Unangika duru yaoa-oa hagala tongona aniarataino deʼ anitonaka mahasilino,

¹⁰done ani gandum matau aha iomanga deo gandum, deʼ aniangguru mateongo aha demaboboloi hiädono nagogono koyawedonua mangï.

¹¹ Nako ma Jou wonigohara ngona, ahingohaka, natarima gënanga hokä o hohininga moi, deʼ uha anihininga imatoduba Ai dodotokika gënanga.

¹² Ma Jou wägohara o nyawa Wahohininga, imatero hokä womatengo o ama wïgohara aingohaka wïhaya-hayangia.

¹³Youtumu o nyawa yodadi yobarija deʼ yamake o mangarati.

¹⁴Mautumu iholoi ilamoko ngaro deyamake o haaka, deʼ iholoi maragane deo gurasi.

¹⁵O barija iholoi demaragane ngaro deo intan deo folori; mata-mata nonönahihu yakunua imahitero.

¹⁶O barija inihidöaka ngonaika o umuru ikurutu, o kaya deʼ o horomati.

¹⁷O barija yadiai aningango isanangi deʼ ihalamati.

¹⁸O nyawa imahijojö ikekete o barijaika aha yamao o ngango madutu deʼ yosanangi.

¹⁹Deo barija, ma Jou wohidadi o dunia; de Ai akali isosawaro Unanga wohi hohe o dihanga mangïoka.

²⁰De Ai ganako Unanga wodiai o akere matiti o tonaka matimioka ipooteke deʼ ihahuru ma akere inoli o lobi o dihangoka yakopoa ma akere o duniauku.

²¹Hababu gënanga, noma hi jojö o barijaika deʼ o dibanga magohakika, ahingohaka! Uha hakali-kali napidili,

²²done aningango aha yapaliara — ihailoa deʼ isosanangi.

²³Ngona aha notagi nosanangi, deʼ aha konopelekua.

²⁴Ngona aha noiki nomäidu namaoua nohawana, deʼ ngona nomäidu duru inikioko o hutu yahaiwatiki.

²⁵I paraluua ngona nömodongo o bodito itodokanino iboa hokä o rato, deʼ yätapalu o nyawa madorou.

²⁶Ma Jou aha wonï goana ngona. Unanga aha wohiguml̄aua ngona nohodoa o modoiuku.

²⁷Nako ngona de anidagakunu mangale o oa nodiai o nyawaika yöpoparalu ani oa, kokiani uha noluku mangale nadiai o hali gënanga.

²⁸Kokiani uha nähuloko anidodiawo o nyawa yotamä hiädono yarehino, nako o öraha nënanga dika ngona yakunu nïriwo.

²⁹Kokiani uha nödatoro okianagamoi yahirugi anidodiawo o nyawa yogögogere imahitigi-tigika ngonaika deʼ iningaku.

³⁰Uha nimateke ributu mahababu koiwa deo nyawa womatengo komaiwa wodiai itotorou ngonaika.

³¹Uha nädohata o nyawaika yäpopakisa o nyawa, deʼ uha nomäduru toönanga manga kalakuanga.

³²Hababu, ma Jou wädohata o nyawa yadodiai o dorou, mä Unanga wädodiawo deo nyawa manga wowango iriko-rikoto.

³³Ma Jou wälolai o nyawa madorou manga tau, mä Wohibarakati manga tau o nyawa iwihingou-ngounu Unangika.

³⁴ Ma Jou wädohata o nyawa manga hininga ikökurutil̄e, mä Wahibarakati o nyawa manga hininga itotipokouku.

³⁵O nyawa yososawaro aha manga romanga mabounu mahemoro idogo, ma o nyawa bodo kaidogo itorou.