Read Tobelo O AMSAL 30 Bible Online

O AMSAL 30 - Tobelo bible

O AMSAL 30

¹Nënanga doka o demo-demo wahö heto-hetongo o Agur o Yake aingohaka o Masa mabereraino: ”Ngohi tokangela, ya Jou Madutu, ngohi tokangale! Koiwaka ahibuturungu!

²Ngohi tobodo hokä o aiwani, koiwa ahimangarati.

³Komaiwa tomä dotoko o barija, kama huhutulo de tohiorikua mangale ma Jou Madutu.

⁴O nyawa okia yauti döaka o horoga? Mamoi iböto ünanga wahokotino o hidal̄oko aigiama magoronaka, deʼ wahawoino o akere aibaju magoronaka, ekola wohitatapu o dunia mabatingi-batingi? Unanga o naguna, deʼ o naguna aingohaka? Maraioka ngona nihiöriki!”

⁵Ma Jou Madutu watotomo Ai jaji moi-moi. Unanga hokä dadatoko mangale mata-mata yaino-ino imahohongo Unangino.

⁶Nako ngona nödogo okianaga Wahöheto-hetongo, done ünanga aha wonitaaere deʼ wohi nyata igoungu ngona noelu-eluku.

⁷”Ya Jou Madutu, ihira detohonenge ngohi togahoko nohihidöaka, ngohino o hali hinoto nënanga.

⁸Uha hiädono ngohi tohidemo o rusi deʼ o tengeluku mademo-demo, deʼ uha nohigumal̄a ngohi tomihikini ekola tokaya. Nohihidöaka ngohino duga-duga okianaga topöparalu.

⁹Hababu, nako ngohi tokaya, yakunu ngohi aha totemo ngohi tonïparalua Ngona. Deʼ nako ngohi tomihikini ngohi aha totohiki hiädono tapeseke Ani romanga.”

¹⁰Uha wïfitana womatengo o gilaongo ai tuangika, done ngona inihilolai deʼ yanako nahowono.

¹¹Naga o nyawa yahilolai manga ama deʼ yäetongikaua manga ayo.

¹²Naga o nyawa wanako aidiri itebini enahioko ünanga duru wopeseke.

¹³Naga o nyawa womamao ai diri duru yaoa — o goguleua yaoa!

¹⁴Naga o nyawa imälingiri manga ngol̄omo de manga ngokere madodagi koiwa mahayanga; önanga kayätoha-tohatika deʼ yähokoto o mihikini manyawa deʼ o nyawa yobole-bole.

¹⁵O awunu wohïhihihi aingohaka yähinoto; yahinotö manga romanga ”Mangale Tongohi!” Naga o hali iata komaiwa yakihounu:

¹⁶o nyawa yohone-honenge manga dunia, o ngoheka komaiwa mongohaka, o tonaka madüdudungu yokiriti madudungu o awana, deʼ o uku ial̄e-al̄eme okiaika honanga.

¹⁷O nyawa yahohedu manga ama ekola manga ayo yapoperekioka, i patutu yahikaweli maporetika hupaya manga lako o totaleo o wogono yatudili deʼ manga mayeti yaol̄omo o totaleo o rajawali.

¹⁸Naga o hali iata duru ihuha ngohino la tomangarati:

¹⁹o totaleo o rajawali ihöhoho o gitawaka, o dodiha imatahe-tahe o helewo o nuha mal̄okuino, o kapa ihö hide-hidete o ngöto mahidogoronaka, deʼ o goduru deo moholehe o habimoi magogiria imä mane.

²⁰Nënanga doka ami akali o ngoheka momatengo mososatiaua amirokatika: Mohowono de iböto, münanga mol̄omo dema ehe ami uru, de ipaha motemo, ”Ngohi okia-kiaua todiai!”

²¹Naga o hali iata ihuha yatarima o dunia yamode-modekika:

²²o gilaongo womatengo wodadi o koano, o bodo manyawa womatengo wamake hagala wonönahihu.

²³O ngoheka momatengo mohasili mokawingi enahioko münanga o nyawa imï igoua, momatengo o gilaongo maora ngomi nyonya amingï.

²⁴O duniaka nënanga naga o rupa iata o aiwani ma alu-aluhu ma duru isawaro, enagënanga:

²⁵O ngango, o aiwani ikua-kuatua, mä yasadia mainomo o ngogoro maörahoka.

²⁶O pelanduk, o aiwani ibö bole-bole, mä imädiai matau o doporono helewoka.

²⁷O kahoho, o aiwani koiwa ma koano, mä ituono imatatoro ihidodiai.

²⁸O sosipohuku, o aiwani yakunu hatagoko de nanga giama, mä yamake ma koano ai kadatoka.

²⁹Naga o hali iata nanga hininga yadaene nako hatötailako madodagi imädagi, enagënanga:

³⁰O singa o aiwani ikökua-kuata hagala o aiwani mahidogoronaka deʼ okia dika makoyömodongua;

³¹o kabingi manauru, o kuru-kuru manauru imädagi imatotail̄e, deʼ ma koano aikawaha manga himangoka.

³²Nako karana anibodo ngona de ani edenge nödatoro o perekara-perekara madorou, nomahidodiai!

³³Hababu, nako ngona nosapuru nohiruae o huhu namake mahasili o mentega. Nako ngona nagohara o nyawa manga ngunungu, ihupu o awunu. Nako ngona napuda o gangamo, ngona nosapuru o ributu magoronaka.