Read Tobelo O AMSAL 31 Bible Online

O AMSAL 31 - Tobelo bible

O AMSAL 31

¹Nënangadoka o demo-demo mahö heto-hetongo o Lemuel ngoi ayo, amingohakika o Masa ma koano,

²”Ahingohaka ahi gate mabelaka, tonihi ngohaka hokä ahininiata mabobaluhu. Okia aha tahetongo ngonaika?

³Kokiani uha nohigogule anibuturungu ekola nohibarihi anikuata o ngohekaika. O koano manga ngöeoka yobodito karana o ngoheka.

⁴Kokiani nöhohininga, Lemuel! Nokere o angguru deʼ namal̄aokaua o daluku ibiha-biha, ipatutua mangale yokokuaha.

⁵Hababu, nako ma koano wokere o daluku ibiha-biha, ünanga wawohanga o tita deʼ kowölegaikaua o nyawa yobole-bole manga haku.

⁶O daluku ibiha-biha ganga mangale önanga yopopanyake deʼ manga hininga ihühuha.

⁷Onanga yokere la yawohanga toönanga manga mihikini deʼ manga huha.

⁸Kokiani näriwo önanga yaku-yakunua yöriwo manga diri mahirete. Nöriwo mata-mata o nyawa imagaku-gakunua manga haku, deʼ nodadi o hakimi iadi-adili. Nögoana o nyawa mihikini deʼ o nyawa yätuku-tuku manga haku.

⁹Niariwo niagou-goungu mangale önanga, deʼ nidadi o hakimi yoadi-adili. Niöriwo o mihikini manyawa manga haku deʼ o nyawa yätuku-tuku.”

¹⁰O hekata mososawaro ihuha hamake; münanga amiragane iholoi ngaro deo intan deo folori.

¹¹Ami rokata aha okia-kiaua wokuranga, karana womingaku munangika.

¹²Münanga komaiwa modiai o dorou amirokatika; amiumuru magurutu münanga modiai o oa unangika.

¹³Münanga imimagawe motoomu o dewili deo duba magögo daha motasibu mokarajanga mouriti.

¹⁴Magögurutino münanga moao o inomo, hokä yadodiai hagala o kapa imahuku-hukunu.

¹⁵O ngoru-ngorumino kamahohuhutuohi münanga momomiki masadia amitau madol̄a manga inomo, deʼ mangale mahikodoku o manarama imïlo leleani ika.

¹⁶Münanga molingiri o tonaka oloa moi, daha maija; ami lilingiri matiwiino münanga mohidailako o angguru madumule o gahumu moi.

¹⁷Münanga masadia amidiri la mokarajanga hokokia amikuata de amibuturungu.

¹⁸Münanga mohioriki hagala moi-moi madodiai, imihi utumu; münanga mokarajanga hiädono hutu madekanuku.

¹⁹O lawe mohirugihi deʼ o ngöere mouriti.

²⁰Münanga mödurüa o nyawa yokura-kurangika; münanga amihininga yaoa o nyawaika yopöparalu o roriwo.

²¹Münanga mohawaterua nako o dumamata maöraha iboa, karana amitau madol̄a manga alo mabaju masadiaka.

²²Münanga mahirete modiai amitikara; amipakeanga o ngöere o lenan maungu mahöhailoa.

²³Ami rokata ganga o nyawa iwihöheto-hetongo o nyawa moi o kota matutuda manga hidogoronaka.

²⁴Münanga modiai o pakeanga deʼ o gorona maninikutu, daha mahukunu imahuku-hukunika.

²⁵Münanga mokumati deʼ imihoromati; deʼ mohawaterua mangale o wange maduruino.

²⁶Demabole dei aluhu münanga motemo-temo amidemo-demo mobarija.

²⁷Münanga salalu imimagawe mokarajanga deʼ möhininga mohidodiai amitau madol̄a mahidailako.

²⁸Münanga amingoha-ngohaka imihoromati, deʼ amirokata womihigiriri.

²⁹”Naga manga ngöe o ngoheka maoa,” amirokata wato, ”mä ngona iholoi yaoa ngaro de önanga mata-mata.”

³⁰O rupa ihöhailoa yakunua hangaku, deʼ o rahai aha i hihanga; mä o ngoheka mohi ngou-ngounu ma Jouika ipatutu mamake o higiriri.

³¹Nabalahi hagala ami oa-oa; münanga o ngoheka ipatu-patutu imihoromati kiaka de kiaka dika. 1