Read Tobelo O AMSAL 4 Bible Online

O AMSAL 4 - Tobelo bible

O AMSAL 4

¹Hei o ngoha-ngohaka, kokiani nihigihene niaama ai nasihati! Kokiani nöhohininga nohidodiai gënanga, done ngona aha idadi nosawaro.

²Toni doto-dotoko ngonaika nënanga yaoa, hababu gënanga kokiani uha ngona napulono okiaua yadaene.

³Maöraha ngohi kahi alu-aluhohi, ahidimono manga ngohaka tomatengo-tengoka,

⁴ngohi ahiama wohïdotoko. Unanga wotemo, ”Kokiani nöhohininga hagala ahinasihati, kokiani uha hakali-kali ngona nawohanga. Nadiai hagala ahihidumutu, hupaya aningango i sanangi.

⁵Idadi nobarija deʼ nosawaro! Kokiani nöhohininga hagala ahinasihati deʼ uha naumo.”

⁶Kokiani nohilamoko o barija, done o barija aha inihidöaka o roriwo; kokiani ënanga nöhohininga done ënanga aha ngona inïgoana hupaya kahirahi nosanangi.

⁷O hali duru ipöparalu kokiani madodihiraka nadiai enaganga nomahihuha laidadi nobarija. Okia dika ngona nanï niki duru natotihira ena ganga nomahihuha namake o mangarati.

⁸O barija animumukoka natamil̄e, done ngona aha ënanga inihikurutil̄e. Enanga kokiani nakololoino, done ënanga aha inïdotagao o horomati ngonaika.

⁹Enanga aha inihidöaka ngonaika o bunga yauri-urituku mahöhailoa la idadi animakota.

¹⁰Nohihigihene ngohi, ahingohaka! Kokiani nöhininga nohidodiai hagala ahinasihati done aniumuru aha ikurutu.

¹¹Ngohi tonï dotokoka o barija ngonaika deʼ tonihidumutu o wowango madiai madodagi.

¹²Nako ngona nowango hoko gënanga, done ngona aha initätatokua maöraha ngona notagi, deʼ aha konopelekua maöraha nomapopäta.

¹³Kokiani nöhininga salalu o dodotoko natotarimaka ngohioko. Nogoana nohidodiai, hababu de o dodotoko gënanga aniwowango aha ihasili.

¹⁴Uha nödomoteke o nyawa madorou manga wowango madodagi deʼ uha nöduru toönanga manga manarama.

¹⁵Kokiani uha nomälegaika onangika. Nätingaka önanga noma kökurutika deʼ notagi gila-gila!

¹⁶O nyawa madorou yodiaiowahi itötotorou yakunua imäidu. Yäbodito owahi o nyawa mahomoa önanga koyäkiokua.

¹⁷O dorou deʼ koiwa o hayanga deo dora ganga hokä toönanga manga inomo de manga akere.

¹⁸O nyawa madorou manga ngekomo ihuhutu hokä o hutu-hutu mahagahutu. Onanga yopeleke deʼ yoruba koihiorikua. I idulu yaino, o ngekomo o nyawa maoa yanönonu ganga hokä o wange malako iboa; idogo itedekana kaidogo itararono, hiädono mabaha idadi kaitotararono.

²⁰Kokiani nöhininga nohidodiai ahidemo-demo, ahingohaka! Nohigihene hagala ahinasihati!

²¹Kokiani uha naumo, duga-duga kokiani nagogono salalu anihininga magoronaka.

²²O nyawa yanako-nako aha yowango deʼ idadi yotumuloa.

²³Kokiani nögoana anihininga nohidodiai, hababu anihininga ihitantu aningango mangekomo.

²⁴Kokiani uha hakali-kali nohidemo okianaga moi itotiaiua. Kokiani natingaka nakökurutika o tengeluku mademo-demo deʼ o demo-demo madungutu lao nyawa yahongohu o ngekomo madiai.

²⁵Kokiani anirupa ihimatoko anihininga irikoto; iparaluua ngona nomadiai hokä naga o dode o helewo maporetoka.

²⁶ Nodiaiowahi kokiani natibanga nohidodiai, done ngona aha nohasili hagala anihidailako magoronaka.

²⁷Kokiani nätingaka o dorou nomakökurutika, deʼ kokiani nowango de anihininga irikoto. Kokiani uha hakali-kali norehene deo ngekomo madiai.