Read Tobelo O AMSAL 5 Bible Online

O AMSAL 5 - Tobelo bible

O AMSAL 5

¹Ahingohaka, nohihigihene ngohi! Natailako nohidodiai ahi barija deʼ o mangarati tonïdoto-dotoko ngonaika,

²hupaya ngona nohiöriki sarakia ngona kokiani nao anidiri deʼ notemo-temo hokä o nyawa de manga ganako.

³O ngoheka monaka-nakali amiuru mamutiti hokä o madu deʼ amidemo-demo yatauru anihininga,

⁴mä nako mata-mata ipahaka igögogere duga-duga mamali-mali deʼ o huha deʼ o hangihara.

⁵Ngona monitatauru o nyawa yohone-honenge manga duniauku; o ngekomo manönonu madumutu o honengika.

⁶Münanga motatapua o ngekomika yödumu-dumutu o ngango; koma nakoua münanga morehenoka o ngekomino gënanga.

⁷Hababu gënanga, o ngoha-ngohaka, kokiani nihigihene ahidemo-demo deʼ kokiani uha niahaduliua.

⁸Nomatingaka nomakökurutika deo ngoheka hokogënanga! Maboboloi uha nomahitigi amitauika.

⁹Nako ngona nododiawo deo ngoheka gënanga, ngona aha anihoromati ihihanga deʼ anijiwa aha yaora o nyawa yanako-nakoua o dora deo hayanga kanoma göikahi.

¹⁰Ani kaya aha imata o nyawa mahomoa yaol̄omo, deʼ nomahi kokangelaika mahasili idadi tonyawa mahomoa nänako-nakoua.

¹¹Mabaha ngona aha notaiana, nako aniröehe imata o panyake yaol̄omo.

¹²De ngona aha notemo, ”Uwee, yadodoaho ngohi todohata o nasihati. Yadodoaho ngohi toluku ihitaaere?

¹³Ngohi toluku tahigihene ahiguru-guru deʼ toluku tadomoteke önanga.

¹⁴Tanako-nakoua ngohi ihiotakoka o kawaha manga lakoka.”

¹⁵Hababu gënanga nosetia ngonihekatika mahirete deʼ nomi hidöaka anihayangi munangika dika.

¹⁶Koiwa mafaida ngonaika nolingiri o sanangi o nyawaika de kongoni hekatua.

¹⁷O sanangi gënanga itingakoka mangale ngona de ngoni hekata, ko deo nyawa mahomoaua.

¹⁸Hababu gënanga, kokiani nosanangi de ngoni hekata mahirete; nalingiri o ngongike isosanangi o momolehika nomi kawi-kawingoka —

¹⁹o moholehe mohöhailoa deʼ mopalesa hokä o maijanga. Mal̄aikala amiröehe maduku mahöhailoa salalu yadiai nomi hidodogohanga deʼ amidora de amihininga ngona nohidaluku.

²⁰Okia mafaida nänahihu o ngoheka mahomoa, ahi ngohaka? Mangale okia nädodiawo o ngoheka yonaka-nakali?

²¹Ma Jou wamake hagala moi-moi yadodiai o nyawa. Kiaikadika o nyawa yoiki ma Jou watötailako.

²²O nyawa madorou manga baradoha hokä o dadagoko yaliko o nyawa gënanga mahirete.

²³Unanga wohonenge karana watarimaua o nasihati. Ai fuma iwi ao ünanga o boditoika.