Read Tobelo O AMSAL 6 Bible Online

O AMSAL 6 - Tobelo bible

O AMSAL 6

¹Ahingohaka, mudukua mamoi iböto ngona nïjaji womatengoika la noma hitagongo ai nagimi.

²Deʼ yakunu idadi anidemo-demo initipuoka deʼ anijaji mahirete iniotaka o huhauku.

³Nako itiai hoko gënanga, ahingohaka, ngona nagaka o nyawa gënanga ai kuaha magoronaka. Mä nënangadoka madodagi ngona yakunu nomahirehene: itaiti noiki o nyawaika gënanga; kokiani duru nogahoko hupaya ünanga wömodeke ngona wonihibebasi.

⁴Wahiohi noiki nomäidu, deʼ uha nomahibatongo.

⁵Ani diri nohilapahi o dadagokino gënanga hokä o totaleo ekola o maijanga madiri ilapahi yolimo-limorino.

⁶O nyawa yototebeturu kokiani yatailako ihidodiai o ngago mawowango madodagi deʼ imädotoko enangika.

⁷O ngago gënanga koiwa matutuda, koiwa yäkokuaha ekola yatötailako,

⁸mä madekanino o gugutuku maöraha ënanga imädoomu o bilaono mangale o habirokata maöraha.

⁹Hiädono muruonoka madebeturu gënanga wömodeke womä idu? Muruonoka ünanga wömodeke womomiki?

¹⁰ Unanga wogogeruku womalugöino la womahibatongo, deʼ ünanga wotemo, ”Ah, ngohi tomäidu tohijai-jai, ngohi ihikioko.”

¹¹Mä magogiriaka ünanga womäidu, ünanga iwitapal̄u o kuranga deʼ o mihikini iboa hokä yoora-ora de manga daeoka.

¹²O nyawa madorou deʼ yanakoua o adati yoelu-eluku kiaika honanga.

¹³Unanga wahilölakobikini deʼ wohinonako mangale wäbudi.

¹⁴Ai dibanga itorou iomanga de odatoro madorou de wodiai o ributu kiaika honanga.

¹⁵Mata-mata gënanga aha idadi o hababu itodokanino o bodito yatapal̄u ai diri mahirete, deʼ ünanga wowede-wederuku.

¹⁶Naga o perekara o gahumu tumidi ma Jou wödohata deʼ yakunua wohigumal̄a: O jago iede-edenge, o uru ielu-eluku, o giama yätoma-toma o nyawa manga howono koiwa-iwa, o dibanga yatätatoro o hali itotorou, o l̄ou itai-taiti yödumutu o dorou, o hakihi woelu-eluku, deʼ o nyawa yododiai o haturu o dodiawo mahidogoronaka.

²⁰Ahingohaka, nadiai okianaga ani ama wohipopareta, deʼ uha nawohanga hagala minasihati ngoni ayo.

²¹Kokiani nohohininga salalu toönanga manga demo-demo deʼ nagogono gënanga anihininga magoronaka.

²²Hagala manga dodotoko toönanga aha ngona inituda o dodagi magoronaka, ngona inïgoana o hutu-hutu, deʼ ihihidöaka o hidumutu ngonaika maöraha ngona nomimikino.

²³Hagala manga hidumutu anidimo-dimono hokä o hilo itotararono; toönanga manga dodaaere inihidumutu ngonaika o wowango maoa-oa madodagi.

²⁴De hoko gënanga ngona inihitingaka magurutika deo ngongoheka yonaka-nakali, deʼ o nyawa mahomoa manga hekatika manga bobaja ibiha-biha.

²⁵Uha ngona inihibaja de toönanga manga hailoa, uha anihininga ilakete de toönanga manga lako inihi ole-olete.

²⁶O ngoheka manga röehe yahuku-hukunu yakunu yahihewa deo gandum o dodai moi maija, mä yohowono deo nyawa mahomoa manga hekata kokiani ihi fangu de manga jiwa.

²⁷Kaiyakunu o nyawa yatotirino o uku de manga baju youkuua?

²⁸Kaiyakunu o nyawa yadoko o uku mangaboho de manga lou youkuua?

²⁹Genanga mabodito imatero dehädodiawo o nyawa mahomoa manga hekata. O naguna wadiai hoko gënanga aha iwï rehenua o hukumanga.

³⁰Nako o nyawa wotohiki o inomo, ngaroka karana iwihahini, ünanga aha iwihikauku.

³¹Deʼ nako ünanga iwitagoko kokiani ünanga wofangu wohigilio ilape tumidi; mangale gënanga kokiani ünanga wahihanga toünanga ai arata mata-mata.

³²Mä sarakia deo nauru wohöhowo-howono? Unanga wabodito ai diri mahirete! Unanga duru wobodo!

³³Unanga aha iwihangihara deʼ iwihohedu. Ai romanga aha idadi ipeseke kahiado-adonika.

³⁴Hababu, de ai manarama gënanga o ngoheka amirokata gënanga idadi ai hininga mahiri, hiädono ai dohata kahägiria. Deʼ nako ünanga womahibalahi, ünanga aha koiwa ai dora de ai hayanga.

³⁵Unanga yakunua iwihibaja deo tiwi; o hewa hokokia ma amoko mayakunua yahihanga ai dohata.