Read Tobelo O AMSAL 7 Bible Online

O AMSAL 7 - Tobelo bible

O AMSAL 7

¹Kokiani nöhohininga ahidemo-demo, ahingohaka, deʼ uha nawohanga okianaga tonihi popareta ngonaika.

²Namoteke hagala ahinasihati hupaya ngona nowango nosanangi. Namoteke hagala ahidodotoko nohidodiai hokä ngona nögoana anilako magomono mahirete.

³Nöhohininga salalu hagala ahidodotoko gënanga, deʼ nagogono anihininga magoronaka.

⁴Nadiai o barija hokä anidodoto deʼ o ganako hokä anidodiawo madutu.

⁵O barija aha inihitingaka ngona yakökurutika deo ngoheka monaka-nakali, deo ngoheka ami bobaja de ami demo-demo mamuti-mutiti.

⁶O wange moiuku ahitau majangelaino de topulo-pulono.

⁷De ngohi tämake manga ngöe o goguduru okia-kiaowahi yanako; mä duru titötailako womatengo mahidogoronaka wobodo.

⁸O bimaoauku itigi-tigi ihuhutu, o goduru gënanga wotagi-tagi womahitigi-tigi. Tigika ongekomo madupukoroka mamota ongï mogogere momatengo ongoheka.

¹⁰Ongoheka genanga mamao mosanangua momagogogere ami tauoka. O öraha utu munanga naga o ngekomo madatekoka, ipaha o lapangoka, ekola momaokoino mototama o ngekomo madupukoroka. Ami kalakuanga mobarani de manakoua o mal̄eke. Tomimake munanga mohupu de momapakeanga hokä o ngoheka ohuhutu yanïniki, de mimake o goduru genanga de ami datoro oakali madorou.

¹³Munanga mikololo o goduru genanga de miame. Moma hohamal̄ekua mitemo unanga,

¹⁴”Owange nenanga ngohi kiani tofangu ahijaji, de mangale genanga ngohi tohihuba ka ohuhuba.

¹⁵Genanga mahababu ngohi tohupu mangale tonilingiri ngona, hupaya ngona hol̄omo ahitauoka. O öraha nenanga ngohi toni makeoka ngona!

¹⁶Ahi dangiri tomaidu-idu tata munukuoka de o siperei irupa-rupaka ma bunga o Mesirino,

¹⁷de tabuonoka de o mur, o cendana de o kayu manis mabounu ihemo-hemoro.

¹⁸O öraha nenanga, naino ngone homahi more-morene de hamao nanga rorasa homahisanangi o hutu hahaiwatiki.

¹⁹Ahirokata kowiwa otauoka, unanga magogiria wodagi magogurutika.

²⁰Unanga woao tiwi kohaamoka, de aha wolioua o mingguhinoto magoronaka.”

²¹Hokogenanga o ngoheka genanga melaru o goduru genanga de o bobaja yatauru ai hininga hiadono migoda unanga.

²²Wapikirikau unanga woniki o ngoheka genanga hokä o hapi yatatauru mangï yatoa-toakika de hokä o nyawa yatumunguku yaao mangale yatarima ohuku mangi yasosadiaka mangale o nyawa bodo;

²³öraha mahuhutulohi otoimi madatoaha yatotara ai gate. Hokä ototaleo ihoho yameta o modoika, hokogenanga o goduru genanga woma nako-nakoua ai jiwa iboditoka.

²⁴Nababu genanga ngoha-ngohaka, nihihigihene ngohi Niohininga ngihidodiai hagala ahi nasihati.

²⁵Uha mimi mal̄aika ongoheka hokä hokogenanga matauru ani hininga, uha noiki womilingiri munanga,

²⁶hababu munanga mawederoka manga wowango o nau-nauru komangangoe. Haetongo hakunua mangangoe yobinaha karana munanga.

²⁷Noiki ami tanika mamangari yale o ngekomo madipoko mameta o honengika.