Read Tobelo O AMSAL 8 Bible Online

O AMSAL 8 - Tobelo bible

O AMSAL 8

¹ Ni ihene! O barija ipoa-poaka o barija mailingi yagoraka.

²Enanga imaokoino o doporono-doporonoka o ngekomo madatekoka, deʼ o ngekomo mahago-hagoka.

³O ngorana malago-agomoka, o ngekomika iwohama o kotaika, genangokadau hoihene mailingi.

⁴”Hei o umati o nyawa, nginika ngohi topoaka; moi-moi o nyawa o duniaka, ni ihene nihidodiai ahihigaro!

⁵Ngini nia nönako-nakouahi, nimädotoko de niadibanga idö doto-doto; ngini nifuma-fuma, nimädotoko idadi nianako.

⁶Ni ihene nihidodiai ahidemo-demo, karana mata-mata duru yakorona deʼ iluku.

⁷Tahö heto-hetongo, mata-mata itiai, hababu ngohi tödohata o tengeluku.

⁸Ahi demo-demo mata-mata irikoto kamoi makoiwa ipopeleoko ekola ihowono.

⁹O nyawa yososawaroika, ahidemo itiai, o nyawa yanö nako-nako, ahidemo duru yakorona.

¹⁰Nihibaraguna ahinasihati iholoi deo haaka madutu, nihilamoko o ganako iholoi deo gurasi madutu.

¹¹Ngohi nanga o barija, ahi ija iholoi de o intan de o folori; yakunua nohitero de okiadika nonönahihu.

¹²Ngohi nanga o barija; ngohioka naga o mangarati, o sawaro deʼ o ganako.

¹³Niwihoromati ma Jou mamangarati niodohata o dorou; ngohi toigoua o edenge deo hininga magurutil̄e. Ngohi tödohata o kalakuanga madorou deʼ o akali madorou mademo-demo.

¹⁴Ngohi nanga tohidoa-döaka o hidumutu. Deʼ ngohiö tadodiai manyonyata, ngohi tosawaro deʼ ikali tokuata.

¹⁵O kokoano täbatumu ihidagi o popareta, yokokuaha täriwo ihigogoko o adili.

¹⁶Karana ahimanarama maoa, o gikiri yolago-agomo de yomomulia yopareta deʼ ihidagi o adili.

¹⁷Ngohi tädora önanga ihïigo-igo ngohino; ihilingi-lingiri ngohi, aha ngohi ihimake.

¹⁸Ngohioka isadia o kaya ikali o horomati deʼ okiaua ikuranga.

¹⁹Namö make-make ngohino iholoi deo gurasi madutu iholoi maija deo haaka madutu.

²⁰Ngohi tanïki o adili mangekomo, ngohi töaguru iröriko-rikoto mangekomika.

²¹O nyawa wohidora-dora ngohi, tihidadi wokaya; ai tau tohiomanga deo arata.

²² Ngohi wohihidadi ma Jou hokä madodihiraka, ngohi nanga Ai gao-gao mahasili ipaha-pahaika kahuruoninohi.

²³Ngohi ihituku kamadodihirakahi, madodihiraka, o dunia idadiuahi.

²⁴Ngohi tomakil̄au o ngötoilago-agomo idadiuahi, o akere matiti ipudauahi.

²⁵Ngohi tomakil̄au hagala ol̄oku itubouahi, hagala o doporono itoporonuahi,

²⁶ma Jou wohidadiuahi o dunia deʼ matonaka ilua-luasi, maboboloi wohidadiuahi o tonaka mapupuka madodihiraka.

²⁷Ngohi tahakihi maöraha o dihanga ihihohe, de ogitawa yatauru deyatïngi o ngöto mal̄okuino.

²⁸Maöraha ma Jou wohigogere o lobi o gitawaka, deʼ wahelenga o ngöto ilago-agomo matiti,

²⁹maöraha Unanga wapareta o ngöto magahi hupaya uha yatilakuru mabati-batingi. Ngohi matohimangika dokengoka maöraha o dunia mahohol̄e Wögelenga.

³⁰Ngohi naga Ai datekoka hokä Aingohaka Wïhaya-hayangi, o wange higetongo ngohi ganga Ai sanangi; salalu ngohi toule-ule Ai himangoka.

³¹Ngohi tomahi sosanangi o dunia mal̄okuoka, deʼ tamao toutumu o nyawa manga hidogoronaka.

³²Karana gënanga, nihihigihene ngohi, hei nigogoduru! Namoteke ahihidumutu, done ngona aha noutumu.

³³Nia tarima yososawaro manga ngaje-ngaje deʼ nidadi nisawaro, kokiani uha nia haduliua.

³⁴Youtumu o nyawa ihihigihe-gihene ngohi o wange ihi getongo yogogeruku yotamä ahi tau mangoranoka, deʼ yogoa-goana ahi ngï mangorana malamo-amokoka.

³⁵O naguna womämake ngohi, wamake o wowango, ma Jou Ai hininga yadaene unangika.

³⁶O naguna womämakeua ngohi, wohirugi ai diri mahirete; o nyawa ihï doha-dohata yöigo o honenge.”