Read Tobelo O AMSAL 9 Bible Online

O AMSAL 9 - Tobelo bible

O AMSAL 9

¹O barija ihigokoka o tau, deʼ ihi belohoka maliate tumido.

²Enanga yatoakoka o aiwani o gigini la yorameanga, yodiaioka o angguru mateongo deʼ yasadiaka o inomo deo hiode.

³O ngongoheka yolöleleani wähuloko yoiki la yopoa-poaka o ngï ikökurutil̄eoka o kotaka.

⁴”O nagona yanakouahi, togahoko yaino.” Manga akali maoa-oa koiwa-iwaika o barija yätemo.

⁵”Naino naol̄omo ahi inomo deʼ nataili o angguru tadodiaiukuoka.

⁶Namal̄aika o bodo, hupaya ngona nowango nosanangi. Nanïki o nyawa yanönako-nako manga ngekomo.”

⁷Nako o nyawa wolu-oluku nïdotoko nihidumutu ai howono, ünanga aha wonigogiete. Nako o nyawa madorou nïngamo, ünanga aha woni doa-doana.

⁸Uha nïhohedu o nyawa wolu-oluku nïdotoko, ünanga aha wonï dohata. Mä nako o nyawa wobobarija nohidumutu ai howono, ünanga aha woni horomati.

⁹Nako o nyawa wobobarija nïnasihati, ünanga aha wodadi iholoi wobarija. Deʼ nako o nyawa wihingou-ngounu ma Jou Madutuika nïdotoko, ai ganako aha idogo.

¹⁰ Mangale yodadi yobarija, madodihiraka o nyawa kokiani de manga horomati deʼ manga modongo ma Jouika. Nako ngona nï nako Duru wotö Tebi-tebini, ngona aha namake o mangarati.

¹¹O barija aha ini hidöaka ngonaika ani umuru ikurutu.

¹²Nako o barija naga ngonaka, ngona mahirete noutumu. Mä nako o barija ngona natila, ngona mahireteoli norugi.

¹³O bodo ganga hokä o ngoheka amidemo-demo iwoekokia-kiaua manako deʼ amimaleke koiwa.

¹⁴Ami ngï ganga ami tau mangoranoka ekola o kota mangorana malamo-amokoka.

¹⁵Genangino de münanga mäboa-boaka o nyawa yakokaino. O nyawa manga hininga itebi-tebini mäbaja,

¹⁶”Niaino nitulu, hei ngini kokia-kiauahi nianako!” Deʼ o nyawa manga akali maoa koiwa-iwa münanga mätemo,

¹⁷”O dohikino ma akere majame imutiti, deʼ hol̄omo homa ngiu-ngiunu iholoi ihemoro.”

¹⁸Onanga yodadi ami inomo koyanakoua o nyawa imïdulu-dulu gënanga kagenangoka deyohonenge; deʼ önanga yowoha-wohamoka amitauika, o oraha nënanga naga o nyawa yohone-honenge manga dunia magoronaka.