Read Tobelo O PENGKHOTBAH 10 Bible Online

O PENGKHOTBAH 10 - Tobelo bible

O PENGKHOTBAH 10

¹O guhuru mahonenge yamel̄a o minya mabou-bounu o boto moi, o bodo mahuhutulu yahihanga o barija i kökurutil̄e.

²Biaha nako o nyawa yososawaro yadiai o manarama maoa-oa, deʼ o nyawa mabodo yadiai o dorou.

³Ai bodo hamake hagala ai jako-jakoka. Deʼ o nyawa mata-mataika wohidumutu ai fuma.

⁴Nako ngona ini ngamo yokokuaha, uha nomä gahoko nomatogumu nokarajanga. Ngaroka anihowono ilamoko, ngona inihi apongo nako norïdi deʼ nosabari.

⁵Naga o dorou mahomoa tamake o duniaka, enagënanga yamotekua manga pareta yokökokuaha.

⁶O nyawa bodo yahidöaka o gogere imomulia enahioko o nyawa kayäheto-hetongo okia-kiaua imä make.

⁷Mamoi iböto tamake o gogilaongo yobarene o kuda enahioko o nyawa yomomulia imadagi yal̄ou-l̄ou hokä o gilaongo.

⁸ O nagona yofaiti o guhu yaotaka magoronauku; o nagona yaohana o bebeno o mehele aha yägoli o dodiha i biha-biha.

⁹O nagona yokarajanga o helewo yofai-faitoka, aha yapeleke deʼ yäl̄abo. O nagona yobelaka o gota, maraioka mamoi wamake o bodito.

¹⁰Nako anidia ibongono deʼ naihorua, ngona kiani nokarajanga de iholoi nomahihuha de nomahi kangela. Napake aniakali isosanangi, deʼ nadiai o datoro iholoi ihira.

¹¹Nako o dodiha inigoli nadanauahi de o matara, done o dodiha maedo-edoko koiwakali mabaraguna.

¹²O nyawa wososawaro ai demo iwidiai ünanga iwihoromati, ma o nyawa bodo wobinaha karana ai demo-demo mahirete.

¹³Unanga womuläenge de o ade-ade ihohomoa biaha, mä mabahaka ai ade-ade hokä o nyawa yatotogohanga.

¹⁴Igoungu, o nyawa bodo manga demo mangöe. O wange nanga himangika i iunika mangale ngone mata-mata. Mamoiua yakunu ihidodemo idö dadadi ngone kade inaiwaka de.

¹⁵Duga-duga o nyawa bodo wohiorikua ai tauika mangekomo, ünanga wokarajanga magiria deʼ woma togu-togumua.

¹⁶O bodito o berera ma koano duru kawo gö ohi, deʼ ainyawa yolago-agomo o hutu yahaiwatiki kayo rorameanga.

¹⁷Iutumu o berera ma koano de ai kumati, ainyawa yolago-agomo yol̄omo maorahoka, yoigoua yadaluku deʼ yosawaro yatumungu manga diri.

¹⁸O tau makatu aha ipipidaha nako hohidiaiua, deʼ mabaha o tau gënanga ibabiti o debeturu mahasili.

¹⁹O rameanga idiai o giete, deʼ angguru idiai o morene. Mä kokiani naga o tiwi mangale mabobangu.

²⁰Uha niwï ngelo ma koano, ngaroka de anihininga magoronaka. Uha nähohedu o kaya manyawa, ngaroka nimä idu-idu makamaroka. Mudukua moi o totaleo ihene okia nohidöa demo-demo, daha ihiädono geunangika.