Read Tobelo O PENGKHOTBAH 11 Bible Online

O PENGKHOTBAH 11 - Tobelo bible

O PENGKHOTBAH 11

¹Nagogonoani tiwi anihidailako magoronaka o negara mahomoaoka. Maraioka namake o utumu o wange maduruino.

²Nagogono anitiwi madaimatiti irupa-rupa imahöhuku-hukunika; nolingiri o hidailako nawöe-wöe. Hababu o nyawa paralu imahitiari, o huha yabanguahi.

³Mameta okiaika o gota gënanga iruba, kahirahi aha itigirangika ënanga iruba-ruba mangïoka. Nako o lobi madol̄a o akere yodokemoka, o awanö iuti dema rikimi o duniauku.

⁴O nagona yodamä hiädono o hidal̄oko deʼ o gitawa itiai, aha yodatomua deʼ yopageluaoli mahasili.

⁵Ma Jou Madutu wodiai hagala moi-moi, deʼ o nyawa hakunua homangarati Ai manarama; hokogenangoli ünanga womangaratiua iwango o wowango mahungi, o ayo momatengo amimamata magoronaka.

⁶Nia datomo niagihihi maöraha o ngorumino deʼ uha nima togumu o wange yohutuuku. Hababu ngone hanakoua o dadatomo kiaka yaoa iwango. Mudukua hinoto iwango de madiai.

⁷O wange madararono yadiai iutumu; hokokia masanangi nako yakunu yajame.

⁸Kokiani ngona nosukur nako aniumuru idogo. Mä nohininga, ngaroka ngona nowango itedekana o duniaoka, ma ani öraha o honenge malamoko iholoiohi itedekanoli. Ho, okia nomau nonganonoli? Mata-mata kaparasuma deʼ kaparahaja.

⁹Noma hisanangi maöraha noma göikahi, hei o gikiri magö gö! Nomorene madekana ngona kanogoduruohi. Nohitotomo hagala ani jiwa mamau, nadiai mata-mata ani hininga ma adekati. Mä nohininga, ma Jou Madutu naga o horogaka, aha wa adili ani manarama mata-mata.

¹⁰Naduhu o hawana deʼ o huha anihiningaka hababu maöraha nomagö ikahi itaiti ipaha.