Read Tobelo O PENGKHOTBAH 12 Bible Online

O PENGKHOTBAH 12 - Tobelo bible

O PENGKHOTBAH 12

¹Nihininga ani Dodadika maöraha ngona nomagöikahi, iböauahi hagala o taongo iomanga o hangihara. O öraha gënanga ngona aha notemo, ”Ahi ngango iutumua.”

²Nako iböa maöraha gënanga ani lako itararonokauaoli, hiädono kaihohonguku madararono o wange, o mede deʼ o murumu. O lobi yahöhohongo iao o awana, hirahi ininïki hokä inihi huha.

³Ani giama ihahara deʼ ihidoakuaoli o höhohongo. Ani l̄ou madiri-dirihi aha igiwi koiwa makuata. Ani ingiri ingodumokaua mangale nohi tedama o inomo. Ani lako igawaka hiädono noma lega-lega kama hohahawa.

⁴O rame o ngekomoka hiädono aningaukika de kaitiheika. O musik deʼ o gulinga mailingi ngade-ngadeka noihenua. Ngona nakunua nomä idu inikioko. O totaleo mailingö inidiai ngona nomomiki.

⁵Ngona nomodongo nomahitigi o ngï magogurutil̄e deʼ kokiani nomä dagi de nomahidodiai. Anitadauru yadudutu deʼ ani l̄ou kanatauru maöraha nomä dagi. Done ihihanga hagala animau deʼ aninahihu. Ngone hameta tongone nanga ngïika hogögogere maböbobahaka, hagala o nyawa imahi pake o duka mapake de yododora o ngekomo magurutu.

⁶O rante o haaka aha itöaka deʼ imakokitingakika; o hilo o gurasi itifa deʼ ipooteke; o hia-hia maliliko itöaka deʼ ikilianga; o buyu iwedere deʼ imahi kokabarihika.

⁷Tongone nanga röehe aha ilio, idadi o kafo o duniaka. Tongone nanga wowango mawomaha aha ilio ma Jou Madutuika. Unanga wonahidöaka hokä o ngongike.

⁸Totemo, igoungu mata-mata gënanga kaparahaja, mata-mata parasuma, koiwa mamangarati.

⁹Wapöpiki-pikiri gënanga wosawaro deʼ wobarija. Hababu gënanga wädotoko o umatika hagala ai ganako. Mangöe o hitotero womädotoko daha ünanga wauji madiai.

¹⁰Unanga wohidailako wamake o lolaru mademo-demo, deʼ o demo-demo watö tuli-tulihi ganga irikoto.

¹¹O nyawa wososawaro ai demo gënanga hokä o diki-diki madol̄o-dol̄omo o gogoana womatengo, o diki-diki wapake-pake mangale wohitatoko ai duba. Madoomu o hitotero deʼ o nasihati, hokä o paku imahi beloho makuatuku. Mata-mata gënanga ma Jou Madutuö ai ngongike, tongone nanga gogoana woma Tengo-tengoka.

¹²Ahingohaka, mangale o halimoi ngona kokiani nomahi dodiai. O buku madulihi koiwa mabaha, deʼ iwöeholi homädotoko hakangela nanga jiwa deʼ nanga röehe.

¹³Mata-mata tatibanga iböto, nenangala mabobaha tamake. Nimodongo ma Jou Madutuika deʼ nohingounu hagala Ai pareta, hababu duga-duga mangale gënanga o nyawa wahidadi.

¹⁴Ma Jou Madutu aha wajuruhakimi hagala tongone nanga manarama; maoa-oa deʼ madodorou, de ngaro i iu-iunoli.