Read Tobelo O PENGKHOTBAH 3 Bible Online

O PENGKHOTBAH 3 - Tobelo bible

O PENGKHOTBAH 3

¹Hagala moi-moi o duniaka nënanga idadi de maöraha ma Jou Madutu wohi tötatantu.

²Ma Jou Madutu wohitantu maöraha mangale yahingohaka deʼ maöraha mangale yohonenge, maöraha mangale yodatomo deʼ maöraha mangale yärahuku,

³maöraha mangale yätoma deʼ maöraha mangale yahitogumu, maöraha mangale yakilianga deʼ maöraha mangale ihigoko.

⁴Ma Jou Madutu wohitantu maöraha mangale yoari deʼ maöraha mangale yoiete, maöraha mangale yododora deʼ maöraha mangale yoselo,

⁵maöraha mangale imakoröehe moi deʼ maöraha mabohono imakoröehe moi, maöraha mangale yakololo deʼ maöraha mangale yatumungu manga diri.

⁶Ma Jou Madutu wohitantu maöraha mangale yamake deʼ maöraha mangale ihihanga, maöraha mangale yagogono deʼ maöraha mangale ihikabarihi,

⁷maöraha mangale yakakihi deʼ maöraha mangale yauriti, maöraha mangale imarirïdi deʼ maöraha mangale yotemo-temo.

⁸Ma Jou Madutu wohitantu maöraha mangale yähininga deʼ maöraha mangale yädohata, maöraha mangale imateke parangi deʼ maöraha mangale imaka dame.

⁹Okia mahasili hagala tongone nanga huha de nanga kangela?

¹⁰Ngohi tohiöriki ma Jou Madutu wonahidöaka o gina i totubuho ngoneino.

¹¹Unanga wohitantu o öraha yakokorona mangale hagala moi-moi. Unanga wonahidöaka ngone o ngigo mangale hohiöriki o wange nangahimangika, mä ngone hakunua homangarati ma Jou Madutu ai manarama mamuläenge de yaino hiädono mabaha.

¹²Ngohi tohiöriki mangale ngone koiwa iholoi yaoa mahomoa de homorene deʼ hajame o ngango tongone nanga umuru magurutu.

¹³Kayaoa ngone mata-mata hol̄omo deʼ hokere ikali hajame tongone nanga karajanga mahasili. Genanga ganga ma Jou Madutu ai ngongike.

¹⁴Ngohi tohiöriki hagala ma Jou Madutu Ai gao-gao aha kahirahi naga kahiado-adonika. O nyawa hakunua hodogo ekola ha kuranga. Deʼ ma Jou Madutu wodiai hoko gënanga hupaya ngone himodongo Unangika.

¹⁵Oraha nënanga idadadi, kowahi de gënanga idadioka. Aha naga, madekanoka naga. Ma Jou Madutu wohitantu idödadadioka, idadioli.

¹⁶Nagali tamake o duniaka nënanga: kiaka kokiani naga o adili deʼ o oa-oa, genangoka naga o dorou.

¹⁷Tomapikiri, ma Jou Madutu aha wä adili o nyawa maoa yaoa o nyawa madorou, hababu o hali magetongo deʼ o manarama magetongo aha idadi maöraha ma Jou Madutu wohitä tantuoka.

¹⁸Tatoomu taino enagënanga: Ma Jou Madutu wonä uji ngone mangale wohi dumutu okia idadi dede ngone imahowonua de okia i dadi deo aiwani.

¹⁹Sarakiaö dika, okia idadi o nyawa deʼ o aiwani ganga kao rupa moi. Moi aha ihonenge, hoko genangö mahomoa. Hinoto ganga kao dodadi mata-mata. Ho, o nyawa iholoiua youtumu deo aiwani, hababu mangale hinoto i wango gënanga kaparahaja.

²⁰Onanga yameta mangï kaimatero. Onanga manga ahali o kafoino aha yolio o kafoika.

²¹Ngone hohiorikua, boteka o nyawa mawomaha idoa yakail̄e deʼ o aiwani mawomaha iuti o tonaka magoronauku.

²²Hababu gënanga ngohi tamao koiwa iholoi yao mangale o nyawa wajame ai karajanga mahasili. Mahomoa gënanga koiwa wakunu wadiai. Koidadiua ünanga wohiöriki okia aha idadi ünanga wohonenge ibotino.