Read Tobelo O PENGKHOTBAH 4 Bible Online

O PENGKHOTBAH 4 - Tobelo bible

O PENGKHOTBAH 4

¹Ipaha tohohiningali hagala iadi-adilua idödadadi o duniaka nënanga. O nyawa yatötuku-tuku yoari deʼ koiwa yomau yäriwo önanga. Moiuaö o nyawa yomau yariwo önanga, karana yatö tuku-tuku gënanga toönanga manga kuaha kohä amoko.

²Ngohi ahi hininga isanangiua tohininga hagala o nyawa yohonenge mado deka-dekanoka karana önanga iholoi youtumu ngaro de hagala o nyawa kayo wango-wangohi.

³Mä iholoi youtumoli enagënanga hagala o nyawa ima kokil̄auuahi, hababu önanga yamakeuahi o dorou yadodiai o duniaka nënanga.

⁴Ngohi tohiöriki o nyawa yokarajanga hoko gënanga makuata, duga-duga karana manga hininga isanangua yolega-lega imakokadateke manga hidailako mahasili. Mata-mata gënanga kaparahaja mata-mata hokä ihidailako yoginïki o hidal̄oko.

⁵Mudukua, duga-duga o nyawa bodo dika yogogeruku manga giama imalugoino deʼ yamal̄aika manga diri o hahini ihihonenge.

⁶Maraioka gënanga itiai, mä iholoi yaoa o arata mahuhutulu imanïki o hininga irirïdi ngaro de yokarajanga i kuata ihipake manga giama hinoto deʼ yoginïki o hidal̄oko.

⁷Kanagaohioli kaparahaja o ngango nënanga magoronaka.

⁸Naga o nyawa yowango kaima tengoka koiwa manga ngohaka, ekola manga riadodoto. Ngaro hoko gënanga, ünanga womanarama makuata kaitaurika deʼ ai hininga komaiwa yawedono de ai arata. Mangale o nagona ünanga wateo ai gahauku deʼ waoluku hagala o sanangi? Genangö kaparahaja, deʼ o ngango madodagi moi ihohangihara.

⁹Yahinoto iholoi youtumu ngaro de o diri womatengo. Nako önanga yokarajanga, mahasili aha iholoi yaoa.

¹⁰Nako womatengo iwi otaka mahomoa yakunu wiriwo. Mä nako womatengo iwi otaka, ena hioko ünanga womatengoka, wobodito ünanga, karana moiua yakunu iwiriwo.

¹¹O huhutu mamamatoka, yahinoto imaidu imatuoniha yakunu ima borihauku, mä sarakia o nyawa yakunu yodadi yohauku nako imatengoiha?

¹²O nyawa yahinoto yöiki imanïki yakunu yalawani o parangi, mä o nyawa imatengo igapanga yähihanga. O gumini o ramini hange ihi rugihi idadi moi, ihuha yatöaka.

¹³O nyawa mihikini yakunu wodadi o koano, deʼ womatengo iwitumu-tumunguku yakunu womatururu o pareta makuruhi mal̄okuika. Mä nako ma koano gënanga ai umuru ikurutoka duruhe wobodo mangale watarima o nasihati, done okia idadi de ünanga iholoi itorou ngaro deo goduru womömihikini mä wosawaro.

¹⁵Tapikiri mangale mata-mata o nyawa o duniaoka nënanga, daha ngohi tamao toönanga manga hidogoronaka maraioka naga o goduru womatengo aha iwitagali ma koano.

¹⁶O kawaha watötuda-tuda mudukua wakunua waetongo manga ngöe, mä wöiki ibotino, koiwa yotarima kasi yohininga ai oa-oa. I goungu, mata-mata kaparahaja hokä ihidailako yoginïki o hidal̄oko.

¹⁷Nimahi dodiai nako nimau nioiki ma Jou Ai Tauika. Iholoi yao nioiki genangika mangale nima dotoko deʼ ngaro ihihuba o huhuba, hokä yadodiai hagala o nyawa bodo. Onanga genanga yakunua ihilihowono kiaka itiai de kiaka ihowono.